Hatutan.com, (22 Fevereiru 2023), Díli—Primeiru-Ministru (PM), Taur Matan Ruak, simu hotu asaun  rua hosi Prezidente Repúblika (PR), José Ramos-Horta, relasiona ho mandadu buska no aprrensaun bá rezidénsia  Longunihos Monteiro atuál asesór prinsipál Prezidente Repúblika nian.

Lee Mós : Xefe Kaza Militár Prezidénsia Repúblika “Mosu” iha Buska no Apreensaun iha Rezidénsia Longuinhos Monteiro

Asaun rua (2) ne’ebé Prezidente Repúblika sei foti hasoru Primeiru-Ministru relasiona ho buska no apreensaun bá  rezidénsia Longunihos Monteiro nian mak hanesan; ida) denunsia bá públiku no ida seluk (rua) hapara enkontru semanál ho Primeiru-Ministru.

“Ha’u iha aviaun laran ha’u responde bá Senór Ministru hateten bá Prezidente rua ne’e ha’u simu hotu, denunsia bá públiku no hapara enkontru semanal ho Primeiru-Ministru mós ha’u simu,” Primeiru-Ministru (PM), Taur Matan Ruak haktuir bá jornalista sira iha aeroportu internasionál prezidente Nicolau Lobato, Díli, Kuarta (22/2/2023), bainhira to’o fali iha Timor-Leste hafoin semana ida halo vizita ofisiál bá rai-li’ur.

Primeiru-Ministru (PM), Taur Matan Ruak to’o iha Aeroportu Prezidente Nicolau Lobato, Comoro, Díli, ho aviaun komersiál Batik Air.

Iha Kinta, 09 fulan-Fevereiru 2023, Polísia Sientífika Investigasaun Kriminál (PCIC, sigla portgés), ezekuta mandadu  foun hosi Tribunál Distritál Díli (TDD) ho Númeru Úniku Kriminál (NUC) 0030/23/PCIC, hodi halo buska no apreensaun iha rezidénsia Longuinhos Monteiro iha Aldeia Trans, Suku Vatu Voro, Loes, Postu Administrativu Maubara, Munisípiu Liquiça.

PM Taur Matan Ruak akompaña hosi Ministru Prezidénsia Konsellu Ministru, Fidelis Manuel Leite Mangalhães ho Vise-Primeiru Ministru, José Reis, halo konferénsia imprensa hafoin to’o fali iha Timor Leste iha Aeroportu Internasionál Prezidente Nicolau Lobato, Díli, Sesta (22/2/2023). Foto/GPM

Iha situasaun ne’e, Primeiru-Ministru (PM) Taur Matan Ruak ne’ebé    halo hela viajen hosi Kanberra mai Darwin-Austrália, simu telefone ida hosi Ministru Prezidénsia Konsellu Ministru,  Fidelis Manuel Leite Magalhães, hodi informa katak Prezidente Repúblika preokupadu loos tan Servisu Nasional Intelijénsia (SNI) ne’ebé tutela diretamente bá Primeiru-Ministru halo pasa revista bá Longuinhos Monteiro nia uma ka rezidénsia.

Ho atuasaun ida-ne’e, Prezidente Repúblika, José Ramos-Horta, tatoli hela bá Ministru Fidelis Magalhães hatutan hela bá Primeiru-Ministru (PM), Taur Matan Ruak,  atu hasai tiha diretór SNI nian. Se la hasai,  informasaun ne’ebé Ministru Fidelis Magalhães hatutan katak Prezidente Repúblika foti asaun rua; ida) denunsia bá públiku no ida seluk (rua) hapara enkontru semanál ho Primeiru-Ministru.

Taur Matan Ruak haktuir, “kazu ida Loes, ha’u iha dia 09 ha’u viajen mai husi Kanberra mai Darwin, ha’u iha aviaun laran Senór Ministru Fidelis telephone bá ha’u dehan Prezidente da Repúblika preokupadu loos tanba SNI baáatu revista senór Longuinhos nia uma tanba ne’e husu bá Primeiru-Ministru hasai Diretór SNI nian, sei la hasai Prezidente halo buat rua ida denunsia ba públiku, ida seluk hapara enkontru semanál ho Primeiru-Ministru, ha’u iha aviaun laran ha’u responde ba Senór Ministru hateten ba Prezidente rua ne’e ha’u simu hotu, denunsia ba públiku no hapara enkontru semanal ho Primeiru-Ministru mós ha’u simu.”

Bainhira to’o  iha Darwin, Taur Matan Ruak  haruka nia Xefe Gabinete Azevedo Lourenço Marçal buka hatene saída mak akontese iha Loes no bainhira Taur Matan Ruak buka hatene kona-bá informasaun ne’e nia simu mandatu hosi Tribunál nian entaun Taur Matan Ruak hakfodak.

Primeiru-Ministru, Taur Matan Ruak. Foto/GPM

“Sei ida-ne’e mandatu Tribunál tanba-saida mak Prezidente fó fali ultimatu bá Primeiru-Ministru? ha’u hanoin ida-ne’e abuza poder uitoan, prapotensia uitoan hosi parte Prezidente da Repúblika nian ké labele, Prezidente  Repúblika órgaun no simbolu nasaun nian entaun tenke sukat nia komportamentu hotu ne’e nia sukat kuidadu loos labele hanesan fali coboiada demais, iha Timor ne’e laiha ema ida iha lei nia leten inklui Prezidente Repúblika, hotu-hotu iha lei nia okos, ha’u eis Prezidente ne’ebé ha’u hatene saída mak ha’u koalia, ha’u preokupa uitoan mas ita aprende dalaruma sira ne’ebé fó informasaun bá Nai Prezidente fó sala depois Prezidente envez rona ho kalma lae, bidu uluk mak entaun mak hanesan ne’e,” Taur Matan Ruak tenik.

Iha mandadu buska no apreensaun ba rezidénsia antigu Prokuradór Jerál Repúblika, Longuinhos Monteiro nian iha Loes ne’e, Prezidente Repúblika (PR), José Ramos-Horta, orienta kedas Xefe Kaza Militár interinu Major Francisco da Silva ho nia adjuntu  Superintendente Polísia João Belo, bá akompaña iha terrenu.

Liuhosi entrevista ida ho jornalista sira iha fatin Inséndiu Becusse Sentru,  Díli,  Tersa, 14 fulan-Fevereiru 2023, Prezidente Repúblika (PR), José Ramos-Horta, klarifika katak  prezensa Xefe Kaza Militár iha prosesu buska no apreensaun iha rezidénsia Longuinhos Monteiro nian tamba hetan autorizasaun hosi nia hanesan Komandante Supremu Forsa Armadas, maibé la’ós atu halo intervensaun bá servisu órgaun judisiál, seguransa no defeza nian.

“Prezidente Repúblika nu’udár Komandante Supremu Forsa Armada no nu’udar Prezidente bá Konselu Superiór Defeza Seguransa (KSDS), ha’u haruka atu bá haree hanesan testemuña tékniku indepedente la halo buat ida bá haree de’it,” Prezidente Repúblika José Ramos-Horta hateten.

Lee Mós : Ramos-Horta Mak Husu Xefe Kaza Militár Akompaña Buska no Apreensaun iha Rezidénsia Longuinhos Monteiro

Jornalista : Rogério Pereira Cárceres