Hatutan.com, (19 Novembru 2021), Dili—Investimentu ba Aeroportu internasionál Oecusse “Rota do Sândalo” iha Pante Makasar ho montante orsamentu millaun $129 no inagura ona iha 18 Juñu 2019, to’o oras-ne’e laiha retornu tanba laiha aviaun komersiál ida mak durante ne’e hala’o movimentasaun.

Prezidente Autoridade RAEOA, Arsénio Paixão Bano. Foto/Hatutan.com.

Situasaun laiha retornu ekonómiku ba Rejiaun Administrativa Espesiák Oecusse Ambeno (RAEOA) sei prezudika mós prosesu manutensaun iha futuru bainhira nesesita.

Prezidente Autoridade RAEOA, Arsénio Paixão Bano, hateten durante ne’e aviaun Zona Ekonomia Espesiál Sosiál Merkadu (ZEESM) de’it mak hala’o operasaun iha aeroportu ne’e, nune’e seidauk iha retornu másimu, maibé hanoin ona atu iha futuru sei halo planu atu bele komersializa Aeroportu ne’e ba interese nasionál.

“Neneik ita sei rekopera retornu ne’e iha longu prazu. Oras-ne’e, autoridade halo hela jestaun no ita hein nia retornu iha futuru,” Arsénio Bano hateten iha Palásiu Governu, Sesta (19/11/21).

Autoridade mós konsiente katak, atu haree retornu loloos hosi aeroportu ne’e bainhira iha ona aviaun barak mak movimentu iha ne’ebá no oras-ne’e laiha aviaun komersiál ne’ebé halo operasaun permanente iha Oecusse hanesan saida mós ho aeroportu Internasionál Nicolau Lobato Dili.

Úniku aviaun ZEESM mak hala’o operasaun iha fulan tolu ikus, no husi operasaun ne’e aviaun ZEESM tula ona pasajeiru hamutuk 5.000-resin no kobre reseita domástika hamutuk $100.000.

Jornalista: Vito Salvadór