Hatutan.com, (19 Novembru 2021), Dili—DIT FC obrigadu tenke simu derrota 1:0 hasoru adversáriu As Ponta Leste iha jogu kontinuasaun jornada daruak Liga Futeból Timor Leste (LFTL) primeira divizaun époka ne’e.

DIT FC obrigadu tenke simu derrota 1:0 hasoru adversáriu As Ponta Leste iha jogu kontinuasaun jornada daruak LFTL, primeira divizaun époka ne’e. Foto/LFTL.

DIT FC falla iha liña klaran, nune’e la konsege halo balansu ba adversáriu nia jogu. As Ponta Leste FC konsiente ho saida mak sira nia adversáriu sofre, nune’e hola kedan inisiativa hodi fó presaun no lansa atake hodi hadau oportunidade atu ukun adversáriu no rekolla pontu tolu importante nu’udár bukae ba jogu sira tuir mai.

Notísia iha Relasaun:Falla iha Jogu Dahuluk, Aitana FC Garante Sei Manan Jogu Daruak

As Ponta Leste FC hahú jogu hodi domina kedan bola no halo pasajen hosi ain ba ain hodi mantein ritmu jogu hodi halo kombinasaun diak iha liña kotuk no klaran hodi buka atu bele supply bola ba avansadu sira atu bele hatama golu.

Maski nune’e, sorte seidauk iha tanba hosi ameasa lubuk ne’ebé iha liña defeza DIT FC konsege antisipa hodi halo presaun no la fó biban ba adversáriu.

DIT FC falla iha liña klaran ho nune’e As Ponta Leste FC aproveita hodi lansa atake liu hosi avansadu Expedito da Conceição (10) maibé falla iha ezekusaun.

Maske lakon bola, maibé DIT FC mós halo kontra atake liu hosi bola as ne’ebé soe direita hosi kotuk ba oin no avansadu Venceslau Fatima (22) sempre aproveita oportunidade ne’ebé hodi lansa amiasa maibé seidauk iha rezultadu.

DIT FC hahú halo tranzisaun ba nia tátiku hodi buka atu halo balansu ba ekipa adversáriu nia jogu maibé sei falla no As Ponta Leste FC nafatin domina bola maske nafatin falla iha finalizasaun tanba avansadu sira seidauk aproveita oportunidade ho maximu.

As Ponta Leste FC nafatin halo esfórsu ho hodi hakas an atu bele produs golu hodi lidera uluk iha jogu ne’e.

Tama ba minutu 44, jogadór As Ponta Leste Ricardino Bianco (6) marka golu dahuluk ba nia ekipa uainhira aproveita bola kantu hosi liman los. Golu ne’e halo As Ponta Leste FC lidera provizoriu iha tabela eskor ho rezultadu 1:0.

Tama ba segunda parte ekipa rua nafatin ho ritmu jogu ne’ebé iha no jogadór DIT FC Anito Boavida (13) simu kataun kinur hafóin halo falta hasoru jogadór As Ponta Leste FC Ejivanio da Costa (7) iha minutu 47.

Hafóin avalia atuasaun jogadór nian durante jogu primeira parte DIT FC deside halo substituisaun ba nia jogadór hodi hasai Gilbert Richard (93) no hatama Ruben Faria (10) iha minutu 50.

DIT FC falla iha liña klaran tanba seidauk iha kombinasaun ida diak hodi bele hamate adversáriu nia jogu.

As Ponta Leste FC halo substituisaun ba nia jogadór iha liña avansadu hodi hasai Silveiro Garcia (27) no hatama Olagar Xavier (15) minutu 61.

DIT FC kontinu halo substituisaun hodi hasai jogadór estranjeiru Sewor Mahuse (9) no hatama Serafin Bareto (17) iha minutu 62.

Ekipa rua kontinua halo jogu no ida-idak mantein nia jogu nune’e As Ponta Leste halo tan substituisaun ba nia jogadór iha parte avansadu hodi hasai Ejivanio da Costa (7) no hatama João Halle (17) iha minutu 64.

Liu deit minutu 2 As Ponta Leste FC kontinua halo substituisaun iha liña klaran hodi hatama Jacinto Soares (24) no hasai Revelino Martins (19) iha minutu 66.

Baliza As Ponta Leste Francisco Gusmão (1) obrigadu tenke simu kartaun kinor hafóin kaer bola fóra hosi area grandeal iha minutu 66.

DIT FC hahú halo balansu ba  As Ponta Leste FC nia jogu maibé sei nafatin lakon iha pasajen bola. As Ponta Leste FC kontinua halo substituisaun hodi hasai Expedito da Conceição (10) no hatama Amancio Araujo (18) iha minutu 71.

Kontinua substituisaun hodi hasai Ricardo Bianco (6) no hatama Nelson Antonio (3) iha minutu 86 no DIT FC Edencio da Costa (8) tama no hasai Feliciano Gonsalves (19) iha minutu 88.

Vitori ne’e lori As Ponta Leste ba tur iha terseira klasifikasaun tabela primeira divizaun LFTL epoka 2021.

Hafóin jogu treinador DIT FC Alexandre Cham hateten la espera atu DIT FC nia jogu dahuluk sei sai nune’e tanba durante treinu jogadór sira hatudu progressu diak.

Tanba ne’e ho fuan boot simu derrota no promete sei hadia perfórmanse jogadór dira nian liliu jogadór estranjeiru sira nian iha jogu sira tuir mai.

Iha parte seluk Fransisco de Araujo treinador As Ponta Leste FC hateten jogu primeiru hanesan jogu ne’ebé toban maibé orgullu ho jogadór sira nia esfórsu tanba bele hetan pontus tolu iha jogu dahuluk.

Jornalista: Vito Salvadór