Hatutan.com, (22 Novembru 2021), Díli–Jogu primeiru jornada entre AD SLB Laulara FC no DIT FC ne’ebé antes ne’e kansela, sei joga fila-fali iha Tersa aban  (23/11/2021). 

Notísia iha Relasaun: Karketu Díli FC Kontinua Konkista Vitória iha Jornada Daruak LFTL

AD SLB Laulara FC bainhira joga kontra Ai Tana FC. Foto/LFTL

Jogu entre ekipa rua ne’e kansela tanba jogadór sira husi AD SLB Laulara  sei reforsa Selesaun Nasional. Nune’e, jogu ne’ebé tuir oráriu  atu  hala’o iha Sabadu liubá (13/11/2021),  labele realiza tanba mós  jogadór AD SLB Laulara Fc nian sei iha hela viajen husi Singapora mai Timor-Leste.

AD SLB Laulara Fc nafatin enfrenta problema relasiona ho auzénsia husi jogadór senior no intimu sira ne’ebé sei nafatin hela iha diaspora hodi reforsa selesaun nasional Timor-Leste no halo hela treinamentu iha Sentru Treinamentu  iha Singapora ba  jogu AFF SUZUKI CUP 2020 ne’ebé tuir oráriu sei hahú iha loron 5 fulan-Dezembru, tinan ne’e.

Vise-prezidente AD SLB Laulara Fc, Domingos Caero hateten, hanesan klube ne’ebé eziste dezde Liga Timorense ne’e hahú, lakohi lakon oportunidade hodi abandona jogu sira, tanba ne’e,  AD SLB Laulara Fc nafatin enfrenta mesmu ho de’it jogadór sira ne’ebé junior.

“Hanesan ita hatene no imi rasik asiste iha ami nia primeiru jogu ami iha frakeza lubuk ida tanba maioria ami- nia jogadór la’ós jogadór prinsipál, tanba ne’e, ami iha frakeza lubuk maibé nafatin enfrenta dezafiu sira ne’e ba Futeból iha Timor-Leste,” Domingos Caero hateten iha konferénsia imprensa iha sede Liga Futeból Timor-Leste,  Bairru Grilu, Díli.

Vise-preszdente ne’e subliña haree ba rezultadu jogu ne’ebé iha kontra Aitana Fc ekipa tekniku husi AD SLB Laulara Fc halo ona avaliasaun no sei hadi’a táktika hodi rekolla vitória kontra DIT Fc.

AD SLB Laulara Fc sei halo esforsu hotu atu bele konkista vitória iha jogu kontra DIT Fc no sei garante jogadór estrela Kornelis Portela sei joga full hodi fó apoiu tomak ba ekipa atu hetan vitória. Mesmu nune’e , Jogadór no ekipa tékniku sira bele halo esforsu, maibé minutu 90 mak fó nia testemuña ba kada ekipa.

Iha sorin seluk asistente treinadór DIT Fc, Samuel António Guterres, garante sei manan AD SLB Laulara Fc iha jogu kontinuasaun LFTL tamba iha ona preparasaun másimu.

“Ami nia ekipa sei mantein ho jogadór sira ne’ebé iha no iha posibilidade boot sei halo rotasaun ba jogadór tuir nesesidade ekipa nian,” Samuel António Guterres afirma.

Kapitaun Ekipa DIT Fc, Feliciano Pinheiro Gonçalves, hateten garante sei manan AD SLB Laulara Fc ho razaun iha ona preparasaun ne’ebé di’ak.

“Aprende husi derrota iha primeira jogu, obriga ami hadi’a atu bele konkista vitória iha segundu jogu, ne’e ami nia prinsípiu tanba-ne’e tenke manan,” Feliciano P. Gonçalves afirma tan.

Jornalista: Vito Salvadór