Hatutan.com, (19 Novembru 2021), Díli—Aitana FC sei enfrenta segundu jogu kontra adversáriu AD SLB Laulara iha jogu kontinuasaun Liga Futeból Timor Leste (LFTL) primeira divizaun époka ne’e, iha Sábadu (20/11/2021).

Asistente treinadór Aitana FC ho Vise Prezidente Aitana FC, Mateus da Costa Belo Vito Mau. Foto/Hatutan.com.

Aitana FC sei halo esforsu másimu hodi rekolla vitória iha jogu ne’e atu asegura nia ekipa hosi zona degradasaun.

Notísia iha Relasaun:Lica-Lica Lemorai FC “Hurlele” Santa Kruz FC To’o 6:1

Aitana FC iha ona evaluasaun ba rezultadu jogu dahuluk, tanba ne’e sei hadi’a liña kotuk no klaran, hodi bele iha kombinasaun di’ak atu avansadu sira bele fásil hetan bola ba produsaun golu.

“Ami sei halo rotasaun ba jogadór hodi hadi’a iha kada liña, liu-liu iha parte defeza no médiu, nune’e bele iha balansu ba jogu hodi belle rekolla vitória,” Asistente treinadór Aitana FC, Galucho Carvalho hateten iha edifísiu LFTL Bairru dos Grilhos, Dili.

Asistente treinadór ne’e rekoñese katak,  durante primeiru jogu ekipa Aitana FC falla iha parte médiu, tanba nunka halo pasázen no supply bola ba iha avansadu sira, nune’e sei halo mudansa ba jogadór inklui tátika.

Iha fatin hanesan Vise Prezidente Aitana FC, Mateus da Costa Belo Vito Mau, konsidera derrota iha primeiru jogu, sai nu’udár lisaun ida atu hadi’a jogu tuir-mai.

“Ami optimizmu katak, ho avaliasaun no preparasaun ne’ebé iha, ami sei manan AD SLB Laulara iha jogu daruak,” Mateus da Costa Belo Vito Mau, hateten.

Aitana FC garante duni sei manan adversáriu AD SLB Laulara FC ho skore 2:1, tanba iha ona preparasaun másimu no espesífiku tebes liuliu kona-bá tátika no mós fíziku.

Iha mós treinadór AD SLB Laulara FC, Efren Jerónimo hateten, kuaze jogadór íntimu hosi AD SLB Laularan sei reforsa hela ekipa selesaun nasionál, nune’e AD SLB Laulara FC hasoru difikuldade boot tanba sei uza de’it jogadór suplente ka segunda liña iha jogu époka ne’e.

“Ami-nia ekipa AD SLB Laulara FC oras ne’e iha de’it jogadór juniór tanba ne’e ami sei buka meius bele uza rekursu ne’ebé iha ho másimu,” Efren Jerónimo, hateten.

Treinadór ne’e iha espetativa boot atu rekolla vitória iha jogu aban, maibé ne’e la’ós fásil tanba ekipa adversáriu mós iha ambisaun boot hakarak manan.

Karketu Dili FC Fiar aan ho Jogadór Estranjeiru

Sekretáriu Jerál Karketu Dili FC, Eliseu Isaac akompaña jogadór estranjeiru na’in rua Patrick da Silva ho Mickhel. Foto/Hatutan.com.

Karketu Díli FC optimista sei rekolla tán pontus tolu iha jogu daruak kontra adversáriu Assalam FC iha jogu kontinuasaun primeira divizaun, ne’ebé sei hala’o iha estádiu munisipál Dili, Domingu (21/11/2021).

Ambisaun ne’ebé Karketu Dili FC iha, sira koko realiza liu hosi prezensa jogadór estranjeiru na’in-rua Patrick da Silva no Mickhel ne’ebé sei reforsa ekipa ne’e iha liña avansadu no play maker.

Sekretáriu Jerál Karketu Dili FC, Eliseu Isaac hateten, klubu ne’e sei hala’o jogu ida atrativu hodi anima adeptu sira tanba iha jogadór estranjeiru na’in-rua ne’ebé sei reforsa ekipa ‘Matak Malirin’ iha segunda jogu no iha jogu sira tuir-mai époka ne’e.

“Prejensa jogadór estranjeiru rua ne’e atu hakro’at liña avansadu Karketu Dili FC, tanba iha primeiru jogu Karketu Dili FC falla iha liña avansadu,” Eliseu Isaac hateten ba jornalista sira iha sede LFTL Bairru dos Grilhos Dili.

Ekipa ‘Matak Malirin’ halo ona avaliasaun no preparasaun ba jogu tuir-mai no kada jogu sai hanesan finál no tenke rekolla vitória.

Jogadór estranjeiru Patrick da Silva ho nasionalidade Brazil ne’ebé sei joga iha pozisaun avansadu sente haksolok tebes bele hetan oportunidade hodi reforsa Karketu Dili FC.

Nia hala’o ona treinu hamutuk ho jogadór nasionál sira no iha esperansa boot bele oferese vitória iha jogu kontra Assalam FC.

Nune’e mós Mickhel ho nasionalidade Fransa ho pozisaun play maker sente haksolok ho atendimentu ne’ebé klubu Karketu Dili FC oferese no prontu atu halo performance iha kampu.

“Ha’u iha esperansa boot atu oferese trofeu ba Karketu Dili FC iha époka ne’e,” Mickhel hateten.

Assalam FC ne’ebé antes ne’e derrota iha primeiru jogu mós kompromete sei halo esforsu no hadi’a estamina jogadór atu bele hasoru jogu tuir-mai ho másimu.

Adu Marques hanesan treinadór Assalam FC hateten, Assalam halo ona avaliasaun no sei hadi’a di’ak liutan liña kotuk no médiu hodi unifika tátika entre liña rua hodi bele iha balansu no buka oportunidade atu halo golu.

Jornalista: Vito Salvadór