Hatutan.com, (20 Novembru 2021), Díli—AD SLB Laulara FC ho naran estimadu ‘Makikit Laulara’ la konsege konkista vitória kontra adversáriu Aitana FC iha jogu kontinua Liga Futeból Timor Leste (LFTL) primeira divizaun.

AD SLB Laulara FC kontra Aitana FC, Sábadu (20/11/21). Foto/LFTL.

Ekipa rua obrigadu tenke fahe pontu hanesan tanba laiha ida mak di’ak liu iha jogu loraik ne’e. Maske nune’e, AD SLB Laulara FC hatudu jogu ida animativu no atrativu tebes tanba maioria jogadór ho idade junior, no hatudu sira nia abilidade ho kualidade iha kampu laran hodi fó mós animasaun no satisfasaun ba adeptu sira.

Notísia iha Relasaun:Médiu Fraku, DIT FC Derrota ho 1:0

Iha parte seluk Aitana FC ne’ebé maioria ho jogadór senior no esperiente ona iha LFTL mós hatudu sira nia kualidade maske lakon iha tékniku dala ruma tanba fatór idade mós.

Fizikamente ekipa rua iha forsa hanesan maibé AD SLB Laulara FC hatudu liu sira nia abilidade oinsa halo jogu ida atrativu no dominante ho bola.

Iha jornada daruak LFTL ne’e, Makikit Laulara tun ho jogadór maioria junior ne’ebé durante ne’e sai de’it hanesan suplente iha ekipa ‘Makikit Laulara’.

Tanba ho plantel jogadór ne’ebé maioria ho idade médiu AD SLB Laulara FC hahú jogu hodi lansa kedan atake ba nia adversáriu Aitana FC ho intensaun bele fó presaun ba ekipa adversáriu atu  bele halo balansu ba jogu no buka oportunidade hodi halo golu.

AD SLB Laulara FC kuaze domina jogu hodi halo jogu hosi ain ba ain liu hosi kombinasaun liña médiu ne’ebé komandu hosi Natalino da Costa (8) hodi organiza nia ekipa atu ezekuta orientasaun hosi treinadór oinsa bele kontrola jogu no fó asisténsia ba avansadu sira liu hosi taktika ne’ebé iha.

AD SLB Laulara FC nafatin halo atake no fó presaun ba ekipa adversáriu hodi lansa ameasa liu hosi trio avansadu ne’ebé lidera hosi kapitaun Nidio Alves (93) ne’ebé nu’udár jogadór mais senior ba ekipa ‘Makikit Laulara’.

Aitana FC la hela iha sira nia frakeza no buka sai hosi presaun hodi halo kontra atake no susesu iha ezekusaun taktika maibé falla iha finalizasaun tanba ekipa adversáriu la fó oportunidade.

Avansadu Aitana FC Edit Savio (9) lansa atake liu hosi kolaborasaun ho Fransyama Ima Kefi (21) maibé nafatin falla tanba liña defeza AD SLB Laulara mantein disiplina.

Aitana FC buka meius atu halo balansu ba ekipa adversáriu nia estratezia maibé falla no Fransyama Ima Kefi (21) jogadór Aitana FC simu kartaun kinur hafóin halo falta hasoru jogadór adversáriu iha minutu 21. AD SLB Laulara nafatin domina jogu no ho taktika ne’ebé iha nafatin halo ameasa ba ekipa Aitana FC.

Jogadór Aitana FC Lamberto Ximenes (23) simu kataun kinur hafóin koko hapara bola ho liman iha minutu 23.

Ekipa rua sei mantein ho skore 0:0 ho nune’e kada ekipa tenke halo esfórsu extra hodi bele produs golu.

Tama ba minutu 42 Aitana FC halo substituisaun ba nia jogadór iha liña kotuk hodi hasai Lamberto Ximenes (23) no hatama Francelino Belo (22).

Hafóin substituisaun ne’e Aitana FC hatudu disiplina di’ak no asegura nia ekipa hosi derrota to’o primeira parte remata.

Tama ba segunda parte, AD SLB Laulara FC kontinua hatudu nia jogu ida atrativu hodi nafatin domina bola no kontinua halo ameasa ba ekipa adversáriu.

AD SLB Laulara FC halo ameasa barak liu hosi liña karuk aproveita adversáriu nia defisiénsia (kelemahan) maibé nafatin sei falla iha finalizasaun.

Tama ba minutu 51 Aitana FC halo substituisaun ba nia jogadór iha liña médiu hodi hasai Miguel Araujo (11) no Joseph Koami (55) hodi hatama Alexandre   Nogueira (33) no Jilson dos Reis (10), nune’e bele hadi’a liña klaran atu bele supply bola ho rigor ba iha liña avansadu.

Parte AD SLB Laulara mós kontinua halo substituisaun hodi hasai George Moniz (5) no hatama Cornelis Portela (11) iha minutu 56.

AD SLB Laulara FC kontinua hatudu nia superioridade iha jogu ne’e liu hosi performance jogadór sira iha meiu kampu ne’ebé la husik oportunidade atu adversáriu hetan oportunidade.

Situasaun ne’e obriga Aitana FC tenke hadi’a liña hodi hasai jogadór Miguel Araujo (11) no hatama Rivaldo Coreia (12) iha minutu 71 no tama ba minutu 72 ekipa tékniku Aitana FC halo avaliasaun no hasai hikas asistente kapitaun Jilson dos Reis (10) no hatama Angelo Fernandes (8), hodi hadi’a liña klaran ne’ebé monu.

AD SLB Laulara kontinua domina bola maske seidauk hatudu rezultadu hodi muda skore iha tabela. Haree ba oportunidade ne’ebé iha AD SLB Laulara FC kontinua halo substituisaun iha minutu 80 hodi hasai Aldo Amaral (27) no hatama Pascoal Ximenes (16).

Hosi substituisaun ne’e halo AD SLB Laulara FC hadi’a di’ak liután nia ritmu hodi buka oportunidade atu hatama golu maibé nafatin la akontese.

AD SLB Laulara FC kontinua ho substituisaun iha minutu 90 hodi hatama Job Mark Freitas (15) no hasai Jeremias Baptista (69) ne’ebé sofre aleiza.

To’o jogu termina ekipa rua laiha ida mak rekolla vitória iha jogu ne’e no ekipa rua obrigadu tenke fahe pontu.

Treinadór Aitana FC, Octávio Araújo hateten, Aitana FC falla iha médiu nune’e lakon jogu no avansadu la hetan bola tanba médiu la supply bola ho di’ak.

Treinadór AD SLB Laulara FC, Efren Jeronimo hateten maske ho de’it jogadór suplente sira iha plantel ba jogu kontra Aitana FC, maibé konsege asegura ekipa hosi derrota.

Jogu em jerál AD SLB Laulara FC mak domina maibé falla iha ezekusaun ka finishing tanba avansadu sira senior liu sei refórsa hela ekipa selesaun nasionál.

Jornalista: Vito Salvadór