Hatutan.com (06 Dezembru 2021), Dili—Tribunál Distritál Díli (TDD), iha Segunda 06 Dezembru, kontinua hala’o julgamentu ba krime furtu agravadu ne’ebé deskonfia involve eis Prezidente Parlamentu Nasionál (PPN), atuál deputadu bankada CNRT arguidu Adérito Hugo da Costa relasiona ho dada ahi illegál iha tinan 2016.

Eis Prezidente Parlamentu Nasionál, Aderito Hugo da Costa. Foto/Hatutan.com

Iha julgamentu kontinuasaun ne’e, sasin Marito da Costa ne’ebé iha tempu ne’ebá sai hanesan koordenadór inspesaun ba ligasaun eletrisidade  illegál ne’ebé kontrata hosi EDTL deklara katak, momentu ne’ebá nia elementu na’in rua hanesan Isaias Mendonça no Leonel mak tama arguidu nia uma hodi halo inspesaun.

Notísia iha Relasaun:Adérito Hugo Deklara Laiha Koñesimentu Kona-bá Dada Eletrisidade Ilegál

Momentu ne’ebá, bainhira detekta ligasaun illegál liu hosi mekanizmu hatama kode ba kontadór hodi rezulta ahi iha arguidu nia uma mate, maibé AC lakan hela, tanba iha fiu kinur iha kontadór ne’ebé liga ilegál ba AC, maske fiu ne’e la liga diretamente ho ai-rin eletrisidade.

“Depois de detekta katak iha fiu kinur ne’ebé liga illegál ba AC, tanba bainhira kode identifikasaun ami tau, automatikamente ahi mate hotu, úniku illegál de’it mak lakan. Tanba ne’e, momentu ne’ebá ami bolu ema ida ne’ebé hein hela uma, Xefe EDTL iha oin mak ami tesi no entrega kedan formuláriu ba uma na’in,” sasin deklara iha audiénsia.

Kona-bá montante osan ne’ebé arguidu selu ba EDTL, sasin laiha koñesimentu tanba momentu ne’ebá sasin la’ós funsionáriu EDTL, maibé EDTL kontrata sira hodi halo inspesaun.

Hafoin rona sasin, Tribunál adi’a hikas julgamentu ba loron seluk hodi kontinua rona sasin sira seluk.

Tuir observasaun jornalista nian iha terrenu hatudu katak, arguidu to’o iha Tribunál Distritál Díli (TDD) mais ou menus tuku 09:00 dader, hafoin he’in to’o tuku 10:00 tuir ajenda ne’ebé Tribunál fó ona.

Antes ne’e, tuir akuzasaun hosi Ministériu Públiku (MP), katak iha loron 02 fulan Maiu tinan 2016, bazeia ba relatóriu kontájen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uza enerjia hahú fulan Juñu tinan 2016 to’o fulan Agostu 2017, arguidu gasta enerjia maioria entre $19 to’o $37.

Nune’e, depois de halo komparasaun kontájen ba gastu normál ho montante $120, konklui katak hahú periudu Juñu 2016 to’o Agusto 2017, arguidu nia konduta hamosu ona prezuizu ba Estadu ho montante globál $9,760.

Ho hahalok arguidu, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.

Audiénsia julgamentu prezide hosi juis kolektivu Alvaro M. Freitas, Argentino Luíza Nunes, José Gonçalves, MP reprezentua hosi Prokuradór Rogério Viegas no arguidu hetan asisténsia legál hosi Advogadu Privadu Pedro Aparicio.

Jornalista: Carmelita Isaac