Hatutan.com (06 Dezembru 2021), Díli—Tribunál Distritál Dili (TDD), iha Segunda loron 06 fulan ne’e, kontinua hala’o julgamentu ba krime kontra bandu, ne’ebé deskonfia involve funsionáriu Provedoria Direitus Humanus no Justisa (PDHJ) arguidu ho inisiál MNP, tanba hatama no fa’an farda F-FDTL no PNTL illegál.

Iha audiénsia julgamentu kontinuasaun ne’e, Alberto Seixas nu’udár funsionáriu Alfandega deklara, normalmentu hosi parte Alfandega mak halo verfikasaun ba sasan inklui dokumentus kompañi ne’ebé hatama sasan mai TL tanba dalaruma Broker mak lori dokumentu kompañia nian mai, maibe relasiona ho sasan no farda militár hosi Alfándega mak entrega diretamente ba Instituisaun.

Notísia iha Relasaun:Fa’an Farda PNTL ho F-FDTL Ilegál, TDD Kontinua Julga Funsionáriu PDHJ

Nia parte laiha koñesimentu kona-bá taxa hosi Farda F-FDTL no PNTL ne’ebé arguidu hatama, tanba normalmente liu hosi kompañia, entaun kompañia mak selu taxa.

Hafoin rona sasin, Tribunál deside submete ba alegasaun, tanba ne’e iha alegasaun Ministériu Públiku (MP) husu ba Tribunál atu aplika pena bazeia ba krime ne’ebe imputa ba arguido.

Maibé parte Defeza husu ba Tribunáll atu absolve arguidu hosi krime kontra-bandu, tanba defeza konsidera krime ne’ebé imputa ba arguidu la prienxe elementu krime-nian.

Hafoin alegasaun, juis preside adi’a julgamentu ba loron seluk hodi rona desizaun ikus.

Antes ne’e, iha loron 04 fulan fulan Outubru, iha audiénsia julgamentu arguidu rekoñese fa’an duni farda F-FDTL no PNTL iha nia uma no sasan hirak ne’e tama mai Timor fasilita hosi ajénsia RTD no bainhira sasan to’o iha Timor mak arguido ba foti hodi selu tuir todan.

Tuir akuzasaun hosi Ministériu Públiku (MP), katak, iha loron 16 fulan Fevereiru tinan 2018, Polísia ba iha arguidu nia uma hodi halo apreensaun ba farda ne’ebé arguidu hatama hosi Indonézia liu hosi ajénsia RTD.

Maske arguidu rasik la’ós kompañia ne’ebé manan tender sosa farda hosi instituisaun rua ne’e sen iha lisensa importasaun.

Ho hahalok arguidu, MP akuza ba krime kontra bandu ne’ebé previstu iha artigu 316 hosi kódigu penál Timor Leste (TL).

Audénsia julgamentu prezide hosi juiz kolektivu Arjentino Luisa Nunes, Antonio Gonçalves, Alvaro Freitas, MP reprezenta hosi Prokuradór Aderito Tilman no arguidu hetan asisténsia legál hosi Defensór Públiku Manuel Exposto.

Jornalista: Carmelita Isaac