Hatutan.com, (16 Dezembru 2021), LIKISA—Espoza Prezidente Repúblika (PR), Cidália Lopes Nobre Mouzinho Guterres  hala’o sensibilizasaun ba feto potensiál munisípiu Bobonaro ho Likisá, kona-bá prevensaun moras kankru susun, ne’ebé lori risku ba inan feton sira nia vida.

Espoza Prezidente Repúblika (PR), Cidália Lopes Nobre Mouzinho Guterres hala’o sensibilizasaun kona-bá moras kankru susun ba Asosiasaun Feto Potensiál Munisípiu Bobonaro, (14/12/2021. Foto/Média PR.

Cidália Lopes Nobre Mouzinho Guterres iha intervensaun durante sensibilizasaun iha munisípiu Likisá hateten, ikus-ikus ne’e númeru mate kauza hosi moras kankru susun no serviks ne’ebé aas, nune’e Gabinete espoza PR hola inisiativa halo sensibilizasaun atu bele kontribui ba redusaun.

Notísia iha Relasaun:Komunidade Halo “Keixa” Hasoru MAP ba PR Lú Olo

Cidália observa katak, iha prátika dala barak iha komunidade nia leet barak liu hetan síntoma hanesan fisur iha parte susun, sempre halai liu ba  halo kurativu tradisionál no la hakbesik an ba fasilidade saúde hodi hetan tratamentu dignu no hetan diagnóstika hosi doutór sira.

“Tanba ne’e, ita hakarak hasa’e komunidade nia konsiénsia hodi hakbesik an ba fasilidade saúde atu bele hetan tratamentu dignu,” Cidália ko’alia ba komunidade iha resintu edifísiu MSSI, Likisa, Kinta (16/12/2021).

Iha fatin hanesan, médika Maria Adalzija Mesquita ne’ebé servisu iha Gabinete Espoza PR ba asuntu prevensaun moras kankru susun hateten, sosializasaun prevensaun kankru susun ho objetivu atu bele hasae komunidade nia koñesimentu kona-bá moras ne’e.

“Husu atu bainhira komunidade hetan síntoma tenke ba halo tratamentu sedu iha ospitál atu salva vida,” Maria Adalzija Mesquita, apela.

Espesialista eskolojia ne’e fó-sai dadus katak, hahú hosi tinan 2015 to’o 2019, parte sirurjia Hospitál Nasionál Guido Valadares (HNGV) rejista kankru susun hamutuk 400-resin.

Hosi númeru ne’e, maioria iha ona etapa finál no maluk feto sira ne’ebé sofre kankru susun maioria idade produtivu hahú hosi tinan 19 to’o 50.

Nune’e mós komunidade Adelaide L. M. dos Santos, orgullu tanba liu hosi sosializasaun ne’e bele hetan informasaun kona-bá perigu hosi moras kankru susun.

“Ami feto barak mak sente no sofre hela moras ne’e, maibé ho ami nia moe, ami subar no la dehan sai,” Adelaide L. M. dos Santos, hateten.

Prevensaun Di’ak liu

Iha 14 Dezembru, bainhira Espoza Prezidente Repúblika hala’o Sensibilizasaun ba moras kankru ba komunidade iha Munisípiu Bobonaro, fó hanoin katak, prevensaun di’ak liu kompara ho kura.

“Di’ak liu prevene duke ita kura, no mós ba inan feton sira labele mo’e bainhira buat ruma iha ita-nia isin lolon liuliu iha ita nia susun labele moe atu ko’alia sai. Sira ne’ebé kaben na’in hatoo ba sira nia parseiru no sira ne’ebé sei klosan hato’o ba sira nia inan aman, nune’e buka dalan lori ba ospitál,”  Cidália fó hanoin.

Atividade ida-ne’e liga mós ho atividade Prezidente Repúblika nian iha munisípiu sira no halo vizita ba uma mahon sira ne’ebé halibur maluk feto sira.

Iha fatin hanesan, Primeiru Vise Prezidente ba Asosiasaun Feto Potensiál Munisípiu Bobonaro, Engrase Soares, agradese ba Espoza PR tanba bele esplika kona-bá moras kankru rasik, hodi bele ajuda feto sira iha área rurál ne’ebé ladún asesu ba ospitál.

Jornalista: Vito Salvadór