Hatutan.com, (09 Dezembru 2021), Díli—Estadus Unidus Amerika (EUA) liu hosi Ajénsia ba Dezelvolvimentu Internasionál (USAID sigla Inglés) anunsia subsídiu Millaun $1,5 ba Fundu Nasaun Unida ba Labarik (UNICEF sigla Inglés), hodi hatán ba Covid-19 iha Timor-Leste (TL).

Enkarregadu Negósiu Estadu Unidu Tom Daley ho Reprezentante País UNICEF Bilal Durrani iha serimónia akordu finasiamentu ne’ebé hala’o iha Ministériu Saúde (MS) ho prezensa hosi Diretora Jerál Prestasaun Servisu Saúde, Ministériu Saúde, Odete Maria Viegas. Foto/UNICEF Timor-Leste.

Finansiamentu ne’e sei apoia kontinuasaun servisu ensensiál sira saúde maternál, neonatál no infantíl iha país laran tomak, espande ba kampaña vasinasaun populasaun elijível sira, mellora prevensaun kontrolu infesaun sira iha sentru saúde komunitária hotu no promove hahalok prevensaun Covid-19.

Notísia iha Relasaun:EUA Oferese Pfizer BioNTech Doze 100.620 ba TL

Akordu finasiamentu anunsia ona hosi Enkarregadu Negósiu Estadu Unidu Tom Daley ho Reprezentante País UNICEF Bilal Durrani iha serimónia ida ne’ebé hala’o iha Ministériu Saúde (MS) ho prezensa hosi Doutora Odete Maria Viegas, Diretora Jerál Prestasaun Servisu Saúde, Ministériu Saúde.

“EUA iha prazer atu estende apoiu adisionál Covid-19 hodi ajuda TL atu funu hasoru pandemia,” Tom Daley, hateten.

Hapara pandemia no prevene no prepara ba ameasa seguransa saúde globál iha futuru ezije involvimentu país hotu no kompromisu koletivu atu servisu hamutuk. Timor-Leste bele kontinua konta ho apoiu hosi Estadus Unidus ba funu hasoru Covid-19.

Orsamentu millaun $1,5 sei ajuda fornese ekipamentu protesaun pesoál ba Sentru Saúde Komunitária 71 no autoridade saúde minisipál 13, hodi reabastese suprimentu sira, proteje profesionál saúde sira, redús transmisaun, no kontribui ba prestasaun kontinua ba kualidade maternál, infantíl no kuidadu saúde infantíl sira.

Fundu sira ne’e sei uza mós atu fornese oxijéniu konsentradór ba fasilidade izolamentu sira iha Díli, Ospitál Nasionál Guido Valadares, no ospitál rejionál sira ba terapia oxijéniu krítiku ba kazu grave Covid-19. 

Asisténsia povu Amerikanu mós sei ajuda mellora fasilidade bee, saneamentu, no ijiene iha sentru saúde komunitária 14 iha munisípiu Baucau, Covalima, Díli, Ermera, no Manatuto ba prevensaun no kontrolu infesaun no aumenta konsientizasaun kona-bá medida prevensaun COVID-19 no vasinasaun iha Timor-Leste.  Ho totál kontribuisaun millaun $1,5 no vasina Pfizer 100.620 liu hosi COVAX Facility. 

Doutora Odete Maria Viegas, hateten, orsamentu ne’e sei promove asaun sira ne’ebé sei kontribui ba hamenus impaktu hosi COVID-19 liu hosi prevensaun, tratamentu no vasinasaun ba populasaun elijível sira iha TL.

“Governu Estadus Unidus Amerika kontribui mai TL  durante tempu kritiku hodi hatán ba COVID-19 bainhira ita prepara ba posibilidade futuru surtu pandemia iha TL, bainhira servisu esensiál no suprimentu sira sei kontinua nesesáriu hodi halo tramentu ba kazu infesaun grave sira hosi infesaun Covid-19 no salva moris, no ita mós espande hela kampaña vasinasaun ba labarik sira tinan 12 to’o menus hosi tinan 18,” nia hateten.

Enkarregadu Negósiu Estadu Unidu Tom Daley ho Reprezentante País UNICEF Bilal Durrani iha serimónia akordu finasiamentu ne’ebé hala’o iha Ministériu Saúde (MS) ho prezensa hosi Diretora Jerál Prestasaun Servisu Saúde, Ministériu Saúde, Odete Maria Viegas. Foto/UNICEF Timor-Leste.

Finansiamentu ne’e bazeia ba inisiativa konjunta hosi USAID-UNICEF mak benefisia ona ema 480.000 liu hosi melloramentu prevensaun kontrolu infesaun; fornese asesu ba fasilidade bee, saneamentu no ijiene iha sentru saúde komunitária 20 iha munisípiu lima; atinji ema liu 650.000 liu hosi esforsu konsientizasaun hosi uma ba uma kona-bá prevensaun COVID-19; no ekipa sentru saúde komunitária 15 ho prevensaun infesaun no kontrolu suprimentu sira hanesan ekipamentu fase liman portátil no suprimentu limpeza sira.

Reprezentante País UNICEF, Bilal Durrani hateten UNICEF lidera ona apoiu ba Governu Timor-Leste iha aspetu hotu hodi hatan ba COVID-19 hahú kedan iha loron dahuluk, iha dezenvolvimentu, operasionalizasaun no entrega Planu Nasionál Distribuisaun vasina ba vasinasaun Covid-19.

“Ami nia parseria ho USAID ajuda ona ami atinje ema millaun 1,1 to’o ohin loron. Finansiamentu ne’e mós ajuda ami hodi aumenta esforsu sira atu alkansa ema rihun-atus ida-resin ho informasaun, mellora prevensaun no kontrolu infesaun, apoia tratamentu kazu Covid-19 sira, no garante katak labarik sira no inan sira simu kuidadu esensiál hodi salva moris,” nia esplika.

Finansiamentu ne’e sei kontribui hodi hatán ba Covid-19, apoiu hosi UNICEF, ne’ebé konsentra ba mellora asesu sira ba servisu saúde, inklui serbisu esensiál sira ba nutrisaun, imunizasaun rutina no kuidadu saúde ba inan no oan sira, mellora asesu ba ensinu distánsia no eskola segura sira, protesaun labarik, no protesaun sosiál.

Jornalista: Rogério Cárceres