Hatutan.com, (22 Dezembru 2021), Bobonaro—Autoridade Aduaneira ka Alfándega  iha fronteira Batugade, Postu Administrativu Balibo, Munisípiu Bobonaro, kontribui ona reseita hamutuk $714,518.50 ba kofre Estadu hahú husi fulan-Janeiru to’o mai fulan klaran Dezembru 2021.

Notísia iha Relasaun: Hafoin Governu Loke Fronteira, Abitante Na’in-80 Tama Hosi Batugade

Xefe Delegasaun Autoridade Aduaneira Batugade, Felix do Esprito Santo Duarte. Foto/Hatutan.com

Ba Hatutan.com iha Postu Integradu Fronteira Batugade,  Kuarta (22/12/2021), Xefe Delegasaun Autoridade Aduaneira Batugade, Felix do Esprito Santo Duarte, konfirma katak situasaun no atividade jerál iha liña fronteira terrestre Batugade liga ba atividade importasaun no esportasaun la’o normál (hanesan bai-bain), maibé pasajeiru sira maka aumenta volume ne’ebé as, tantu sai-ba Indonézia no tama-mai territóriu Timor-Leste tuir oráriu privizoriu iha semana ida dala-rua; Segunda ho Kuarta.

“Ko’alia kona-bá importasaun sasán iha tipu rua; primeiru sasán ne’ebé tama mai ho karreta kamioneta bot sira no segundu mak sasán ne’ebé pasajeiru sira lori ka baibain bolu dehan hand carry,” nia esplika.

Kona-bá tipu sasán nesesidade sira importa mai liuhusi Postu Integradu Fronteira Batugade, Felix do Esprito Santo Duarte, informa, tipu sasán ne’ebé domina liu maka  roupa, materiál konstrusaun, hanesan simente, materiál motorizada nian, mobiliáriu, kombustivel avtur ba aviaun inklui karreta no motorizada.

Kona-bá atividade negósiu ilegál iha postu integradu fronteira terrestre kabé ba kompeténsia Polísia Nasionál Timor-Leste (PNTL), Unidade Patrullamentu Fronteira (UPF). Nune’e, tuir nia observasaun katak autoridade seguransa ne’ebé  destaka iha fronteira (UPF) hala’o knar ho rigor tebes no kontínua hala’o patrullamentu rutina no bainhira halo apreensaun ba sasán ne’ebé hatama illegal entrega ba  Alfándega hodi prosesu no UPF  mós bele halo prosesu direita.

“Ita ko’alia kona prevene atividade sasán ilegál ne’e la’ós kompeténsia Alfándega nian, maibé kompeténsia Governu,” nia tenik.

Kona-bá importasaun manu-futu, Felix do Esprito Santo, afirma tan, kompeténsia direta iha Ministériu Agrikultura no Peska (MAP) no Alfándega rekolla reseita ba kofre Estadu liuhusi atividade importasaun manu-futu ne’e.

Ekipa Hatutan.com