Hatutan.com, (23 Dezembru 2021), Díli—DIT FC ho Lalenok United FC fahe pontus iha jogu ikus Liga Futebol Timor Leste (LFTL) epoka ne’e, hafóin impata 1:1.

DIT FC ho Lalenok United FC fahe pontus iha jogu ikus Liga Futebol Timor Leste (LFTL) epoka ne’e, hafóin impata 1:1, Kinta (23/12). Foto/LFTL.

Rezultadu ne’e obriga DIT FC tenke degradadu hikas ba segunda divizaun LFTL epoka oin tanba rekolla de’it pontu 5 no okupa klasifikasaun ikus liu iha tabela klasifikasaun.

Notisia iha Relasaun:Assalam FC ho Aitana FC Fahe Pontu iha Jogu Ikus LFTL 2021

DIT FC iha ambisaun atu konkista vitória iha jogu ne’e hodi sai hosi zona mean no mantein iha primeira divizaun maibé Lalenok United FC la fó fatin.

DIT FC  lansa kedan atake ba adversáriu liu hosi avansadu Bonaventura Klau (44) no José Santos (7). Udan halo ekipa rua tenke halo esfórsu hodi suta bola tanba bee nalihun iha kampu laran. Lalenok United FC hatudu konsistensia jogu ne’e hodi nafatin buka oportunidade atu bele halo uluk golu.

Lalenok United FC hahu hasae tensi jogu hodi halo atake ba nia adversáriu DIT FC liu hosi kombinasaun jogu iha liña klaran no oin.

Esfórsu Lalenok United FC ne’e iha duni rezultadu no tama ba minutu 29 Elias Mesquita lansa kedan golu ida hodi muda skore ba 1:0. Maske kampu laran nakonu ho bee DIT FC la lakon vontade hodi kontinua duni atraza ne’ebé iha atu bele halo impata.

Mosu insidente iha kampu laran ne’ebé rezulta jogadór DIT FC Ervinho Soares (20) no jogadór Lalenok United FC Paulo Gali Freitas (21) simu kartaun kinur iha minutu 45+1 tanba baku malu iha kampu laran. Hafóin insidente ne’e ekipa rua kontinua joga to’o primeira parte termina.

Tama ba segunda parte ekipa rua mantein ho jogadór sira iha primeira parte hodi halo atake ba malu liu hosi estratezia ne’ebé iha.

Tama ba minutu 46 DIT FC halo impata ba jogu liu hosi golu ne’ebé marka hosi José Santos (7). Hafóin golu ne’e DIT FC hola kedan inisiativa hodi kontinua lansa atake liu hosi bola as ba nia adversáriu.

DIT FC halo substituisaun dahuluk iha minutu 56 hodi hasai Gilbert Richard (93) no hatama Pedro da Silva (15). Ho subtituisain ne’e DIT FC hasae tensi jogu atu bele halo impata. Lalenok United FC halo mudansa ba estratezia taktika hodi hasai Rofino Gama (7) no hatama Santiago da Costa (9) iha minutu 57.

Ekipa rua nafatin joga iha bee laran no situasaun ne’e obriga jogadór ekipa rua halo falta ba mslu tanba jkampu laran namdoras.

Elias Mesquita (10) jogadór Lalenok United FC simu kartaun kinur hafóin halo falta ba jogadór adversáriu. DIT FC kontinua há lo substituisaun ba nia jogadór hodi hasai Bonaventura Klau (44) no hatama Edencio da Costa (8) iha minutu 67.

DIT FC hetan oportunidade liu hosi avansadu José Santos (7) maibé falla iha ezekusaun tanba bola oportunidade hirak ne’e sei dok hosi tarjetu. Jogadór DIT FC Ubaldo Belo (16) simu kartaun kinur iha minutu 71.

Atu refórsa liña oin DIT FC kontinua halo substituisaun iha minutu 75 hodi hasai Serafin Brito (17) no hatama Sewor Mahuse (9).

DIT FC kontinua halo atake hodi buka oportunidade atu konkista vitória maibé nafatin falla. Tama ba minutu 84 Lalenok United FC halo substituisaun hodi hasai Italo Pimentel (28) no hatama Francisco Savio (24).

DIT FC kontinua halo esfórsu maibé nafatin falla no tama ba minutu 90+1 DIT FC hetan oportunidade liu hosi bola falta no José Santos (7) ne’ebé ezekuta bola falta falla nune’e arbitu hu apitu sinál jogu remata.

Observasaun Hatutan.com nota hafóin jogu jogadór sira hosi DIT FC espresa sira nia sentimentu triste tanba falla lori ekipa ne’e mantein iha primeira divizaun.

Jornalista: Vito Salvadór