Hatutan.com, (02 Janeiru 2022), Díli-Durante pandemia global Covid-19 ne’ebé nakda’et iha mundu tomak, prejudika no perturba atividade hotu-hotu, liuliu atividade sira ne’ebé iha ámbitu halibur ema barak, hanesan torneiu desportiva sira no seluk-seluk tan.

Notísia iha Relasaun: Francisco Kalbuadi Lay lidera kompetisaun Asean Football Federation

Francisco Kalbuadi Lay hamutuk ho dirijente sira AFF atribui premiu ba Kampiaun AFF Suzuki Cup 2020. Foto/Espesiál

Maske nune’e, espíritu futeból nian iha mundu no iha rejiaun konsege lori enerjia pozitivu hodi luta kontra peste letál ne’ebé ninia hun ho abut mai hosi Wuhan, Xina.

Kopa Europa 2020 ho Kopa Amerika, hanesan ai-moruk ne’ebé hasa’e ema nia imunidade tanba kopa rua-ne’e la’o ho susesu no hetan apresiasaun iha mundu tomak iha situasaun pandemia Covid-19.

Sita hosi fontes mídia oioin iha rejiaun ne’e,  haktuir katak iha tinan ikus 2021 ne’e, iha Singapura, Federasaun Futeból ASEAN (AFF, sigla Ingles)  ho forsa tomak foti desizaun ho risku hotu realiza Kopa AFF 2020 ne’ebé lidera hosi Timor-oan, Francisco Kalbuadi Lay, hanesan Prezidente (Ketua) Komité Kompetisaun AFF Suzuki Cup  2020.

Jogu finál AFF Suzuki 2020 ne’ebé hala’o iha ámbitu selebrasaun tinan foun, 01 fulan-Janeiru 2022, hetan kobertura husi mídia barabarak iha mundu no hatudu Timor-oan, Francisco Kalbuadi Lay, konsege lidera no organiza kompetisaun ne’e ho susesu boot iha tempu pandemia Covid-19. Nune’e, entidade oioin iha Sudeste Aziátiku  hato’o sira-nia orgullu no apresiasaun ba Timor no ba Timor-oan ne’ebé susesu lidera AFF Suzuki 2020.  

Eis Prezidente Federasaun Futeból Timor-Leste, Francisco Kalbuadi Lay, hatudu Timor-oan nia integridade no kapasidade lidera Kompetisaun AFF Suzuki Cup 2020.  Iha jogu AFF Suzuki 2020, konsege asiste direta hosi bola-mania sira hosi nasaun oioin dezde hahú to’o finál hamutuk tokon 500.

Prezidente AFF, Major Jenerál Khiev Sameth, hateten  AFF  iha kompromisu ida forte tebes ba futeból iha Sudeste Aziátiku. “Ami servisu no kolabora hamutuk ho entidade barak atu kontinua kondús espíritu futeból iha situasaun pandemia Covid-19 no hamutuk ho parseiru ka stakeholder hotu, AFF Suzuki Cup 2020 la’o ho susesu,” Khiev Sameth hateten.

Prezidente Komité Kompetisaun AFF, Francisco Kabualdi Lay haktuir, iha torneiu ne’e formula slogan “emerging stronger together”. “Ida-ne’e apresiasaun ida kle’an tebes ba liña frente sira (Frontliners)  no ho spiritus spirit ne’e hamoris hosi AFF Suzuki Cup 2020,” Francisco Kabualdi tenik.

Vise Prezidente AFF, Ratu Tisha Destria, afirma tan, sinerjia nasaun sira Sudeste Aziátiku importante tebes atu reforsa ezisténsia futebola iha rejiaun  no iha futuru futeból ne’e sei lori grasa boot ba nasaun sira hotu-hotu,” Ratu Tisha hateten.

Tailándia Kampiaun AFF Suzuki Cup 2020

Francisco Kalbuadi Lay, nu’udar
prezidente komité Kompetisaun AFF 2020 tara medalia ba jogadór sira. Foto/Espesiál

Rezultadu ikus  husi AFF Suzuki Cup 2020, ne’ebé ekipa nasionál husi Tailándia hatudu duni nia kbiit hodi sai kampiaun AFF Suzuki Cup 2020 iha National Stadium, Singapura.

Ho eskore 6-2 hasoru Indonézia, ekipa jogadór nasionál  Tailándia nian sai hanesan kampiaun ba  AFF Suzuki Cup  2020.

Indonézia liuhusi nia ekipa “Garuda muda” tenke rekoñese Tailándia nia jogadór sira no ida-ne’e hanesan lakon boot ida ne’ebé Garuda sira enfrenta iha torneiu AFF Suzuki 2020.

Timor-oan Hotu Presiza Apresia

Sekretáriu Jerál Federasaun Futeból Timor Leste (FFTL), Nelio Isaac Sarmento, lori FFTL nia naran hato’o apresiasaun ida boot tebes ba susesu hotu ne’ebé Francisco Kalbuadi Lay nu’udar Timor-oan, presta ona hodi lidera AFF Suzuki Cup 2020.

“Ita hotu hanesan Timor-oan presiza apresia no orgullu kapasidade Timor-oan nian ne’ebé involve iha mundu futeból, liuliu hatudu ita-nia kontribuisaun iha Rejiaun Sudeste Aziátiku. Ita bele ida diferensa, mas ba prestasaun ida eis Prezidente Francisco Kalbuadi Lay, hatudu iha AFF Suzuki Cup 2020 merese ita-nia apresiasaun,” Nelio Isaac Sarmento haktuir hodi responde Hatutan.com via telefone, Domingu (02/01/2022).

 Jornalista: Vito Salvadór