Hatutan.com (11 Janeiru 2022) Díli—Tribunál Distritál Díli liu hosi despaixu juíz administradór Afonso Carmona ho nuc 0077/17.PGGCC, rezeita pedidu hosi Ministériu Públiku (MP) ne’ebé submete hosi Prokuradora Lídia Soares.

Eis Prezidente KFP, Liborio Pereira, bainhira partisipa iha julgamentu iha TDD, 07 Novembru 2021. Foto/SMNEWS

Konteúdu hosi pedidu MP nian ba TDD, atu aplika pena pekuniária ou kausaun ekonómiku ba arguidu na’in-rua, eis Komisáriu Funsaun Públiku (KFP), Libório Perreira no atuál Ministru Obras Públika (MOP), Salvadór Eugénio Soares dos Reis Pires, liga ho medida koasaun ne’ebé antes ne’e Tribunál aplika  ona proibisaun auzénsia ba arguidu Libório Pereira iha primeiru interrogatóriu, tanba deskonfia halai ses hosi prosesu justisa, tanba deskonfia komete krime partisipasaun ekonómika negósiu 299 no Salvadór Eugénio Soares dos Reis Pires komete krime administrasaun danoza 274.

Notisia iha Relasaun:Kazu Liborio, Defeza Hatama Ona Rekursu Ba TR

TDD rezeita pedidu hosi MP ho razaun fundamentu rua, primeiru antes ne’e iha primeiru interrogatóriu TDD aplika ona pena pekuniária ou medida de garantia patrimoniál tuir artigu 208, tanba ne’e labele aplika tán pena ne’e dala-rua, segundu, kazu ne’e sei iha prosesu investigasaun nia laran no investigasaun seidauk termina.

Advertisement

Maski Parlamentu Nasionál (PN) seidauk hasai imunidade hosi arguidu Salvadór Eugénio Soares dos Reis Pires, maibé despaixu juiz nian ne’e sita mós arguidu Salvadór Eugénio Soares dos Reis Pires nia naran.

“Depois de MP hatama pedidu ne’e, TDD rekolla provas ne’ebé relevante hodi dekreta pedidu hosi MP iha altura ne’ebá deside atu halo audiénsia iha loron 3 fulan Dezembru 2021, mais la konsege realiza tanba ne’e depois verifika iha atus katak, rekerimentu ou pedidu MP husu, antes ne’e TDD deside ona, tanba ne’e TDD iha razaun katak la presija atu deside tán ba dala-rua, no tanba krime ne’e sei iha prosesu investigasaun,” Defensór Públiku, Sérgio Quintas ne’ebé fó assisténsia ba Libório Pereira, hateten.

Tuir fontes konfirmadu iha TDD, katak normalmente bainhira prosesu investigasaun remata maka TDD foin bele hatama pedidu ba Parlamentu Nasionál hodi hasai Imunidade hosi Salvadór Eugnio Soares dos Reis Pires.

Antes ne’e, Antes ne’e iha loron 7 fulan Novembru tinan 2021, TDD liu hosi primeiru interrogatóriu aplika medida koasaun Proibisaun ba auzénsia ou bandu labele sai ba rai liur ba eis Komisáriu Funsaun Publika (KFP), Libório Pereira, ba krimi partisipasaun ekonómika no negósiu ne’ebé deskonfia atu halai ses hosi prosesu investigasaun ne’ebé la’o hela.

Alende aplika medida koasaun ne’e, Tribunál mós valida auto aprensaun hosi Polisia hanesan pasaporte no dokumentu sira seluk.

Razaun Tribunál aplika medida koasaun ne’e, hodi asegura arguidu nia prezensa durante prosesu investigasaun.

Advertisement

Jornalista: Carmelita Isaac