Connect with us
Pakote Ahi

Justisa & Krime

TDD Rona Sasin ba Kazu Eis Administradór Ataúro

Published

on

Hatutan.com (11 Janeiru 2022) Díli—Tribunál Distritál Díli, iha Tersa loron 11 fulan ne’e, kontinua hala’o julgamentu ba krime pekulatu no abuzu de poder ne’ebé deskonfia involve funsionáriu públiku na’in-rua, eis Administradór Postu Ataúro arguidu Manecas da Conceição Soares no Xefe Sentru Saúde Postu Ataúro, arguidu Januário Domingos Cabeças Soares.

Ambiente tasi-ibun Ataúro. Foto/Radio Manukoko.

Kazu krime pekulatu no abuzu de poder ne’e, relasiona ho subsídiu ka indemizasaun ba ai-horis komunidade nian ba konstrusaun kampu aviasaun temporáriu iha Ataúro iha tinan 2014.

Iha julgamentu kontinuasaun ne’e, sasin Alexandre de Andrade hanesan to’os-na’in ne’ebé antes ne’e halo to’os iha kampu aviasaun ne’e deklara montante subsídiu ka indemizasaun ba komunidade ne’ebé halo to’os iha kampu aviasaun ne’e la hanesan, tanba nia parte simu de’it osan ho montante $80 no fos saka ida, enkuantu sira seluk simu osan $120 no fos saka rua ne’ebé la kondís ho ai-horis ne’ebé afetadu.

Nune’e mós eis Xefe Suku Villa Maumeta Postu Administrativu Ataúro, Augosto Sarmento Soares deklara, katak ninia komunidade uma-ka’in 34 mak antes ne’e halo to’os iha kampu aviasaun laran, maibé uma-ka’in 32 mak hetan no kada uma-ka’in hetan $120 ho fos saka rua, maibé uma-ka’in rua mak lakohi simu ho razaun indemizasaun ne’e oitoan liu la hanesan ho ai-horis ne’ebé antes ne’e sira kuda ona.

Advertisement

Hafoin rona sasin sira, Tribunál adi’a hikas julgamentu ba loron seluk hodi submete ba alegasaun.

Tuir akuzasuan hosi Minisériu Públiku (MP), iha antes ne’e, katak Arguidu na’in-rua halo konvokatóriu ho Xefe Suku lima hamutuk ho komunidade ne’ebé afeita hosi konstrusaun kampu aviasaun provizóriu iha Postu administrativu Ataúro.

Liu hosi enkontru hirak ne’e, maioria to’os-na’in sira konkorda atu hasai sira nia ai-horis, maibé husu atu indemiza ai-horis mak hanesan hudi, nu’u, haas, sabraka, goiava, rumaun, ai-ata, ai-dila, kulu, derok, ai-teka no ai-kameli ne’ebé antes ne’e sira kuda iha kintál.

Iha loron 04 Janeiru 2014, Ministëriu Saúde liu hosi Servisu Distritál Saúde Díli (SDS), entrega osan subsídiu ho montante $5.700 ba arguidu na’in-rua hodi fahe ka distribui ba uma-ka’in ne’ebé afetadu hosi konstrusaun kampu aviasaun temporáriu iha Ataúro ho totál uma-ka’in hamutuk 44.

Iha loron 06 Janeiru 2014, arguidu na’in-rua hamutuk ho Eis Xefe Suku Beloi no Xefe Suku Villa Maumeta, realiza enkontru ho família uma-ka’in hamutuk 44 afetadu hodi diskuti kona-bá mekanizmu distribusaun osan no fos toneladas tolu ne’ebé atu distribui ba família uma-ka’in hirak-nee.

Advertisement

Bazeia ba rezultadu enkontru ne’e, konsege kria mekanizmu distribuisaun osan no fos subsídiu ne’e bazeia ba to’os nia medida ho volume ai-horis, tanba ne’e arguidu sira deside kada uma-ka’in sei hetan $120 no fos saka rua ba família hamutuk 44, maibé ba kategoria hirak ne’ebé halo to’os bo’ot sei hetan $300 kada uma-ka’in.

Hosi lista pagamentu ba família uma-ka’in 44 identifika katak iha família uma-ka’in tolu mak la simu osan subsídiu ne’e mak hanesan Plasidio Lisboa, la simu osan ho montante $300, Virgílio Hornai ho montante $200 no Alcina Baptista la simu $120, nune’e totál subsídiu ne’ebé uma-ka’in tolu la simu hamutuk $620 no fos saka neen.

Alende ne’e, iha uma-ka’in hanesan Diogo Soares Alves la simu mos osan ho montante $120, Fernando da Conceiçao simu de’it $80, Norberto Soares la simu osan $120, inklui uma-ka’in rua hanesan Cleopas Torne no João Baptista nia naran la tama iha lista subsídiu, maski sira nia ai-horis hetan estragus tanba, ne’e totál osan ne’ebé sira la simu hamutuk $1.080.

Ho ida ne’e maka MP akuza arguidu na’in-rua ba prátika krime pekulatu no abuzu de poder ne’ebé previstu iha artigu 295 no 297.

Audiénsia julgamentu ne’e prezide hosi juíz kolektivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogério Viegas no arguidu hetan asisténsia legál hosi Advogadu Privadu Nelson Borges.

Advertisement

Jornalista: Carmelita Isaac

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Justisa & Krime

Tribunál Rekursu Absolve António “Kalohan” Hosi Pena Prizaun Tinan-Lima

Published

on

Hatutan.com, (12 Abríl 2024), Díli – Advogadu privadu, Pedro Camões ne’ebé fó asisténsia legal bá arguido António da Conceição ‘Kalohan’, informa  katak iha Kinta, 11 fulan-Abríl 2024, Tribunál Rekursu hasai ona desizaun hodi absolve pena prizaun efetivu tinan-lima (5) bá nia kliente Antonio da Conceição ‘Kalohan’.

(more…)

Kontinua Le'e

Justisa & Krime

Halo Investigasaun Profunda bá Pesoál PCIC Husu Osan bá Oan Mane Fujitivu Teves Jr

Published

on

Hatutan.com, (11 Abríl 2024), Díli– Komisaun B  Parlamentu Nasionál (PN),  ne’ebé trata asuntu Seguransa hein katak parte kompetente tenke halo investigasaun  ida profunda bá bá pesoál membru Polísia Sienteifika Investigasaun Kriminál (PCIC, sigla portugés) ne’ebé mak ho irresponsabilidade halo kobransa ka husu osan bá fujitivu Arnolfo Teves Jr  nian oan hodi fó seguransa bá fujitivu ho nasionalidade Flipina ne’ebé kumpre hela prizaun preventiva iha prizaun Becora, Díli.

(more…)

Kontinua Le'e

Justisa & Krime

PCIC Suspende no Averigua Membru Ne’ebé Deskonfia Husu Osan bá Oan Mane Fujitivu Alnolf Teves Jr

Published

on

Hatutan.com, (09 Abríl 2024), Díli—Polícia Ciêntífica e de Investigação Criminal (PCIC) liu hosi ekipa investigadór sira hahú loke prossesu averiguasaun hasoru membru ho inisiál OdCA ne’ebé deskonfia husu osan bá fujitivu Arnolf Teves Jr nia oan-mane liuhosi gravasaun audio iha média sosiál WhatsApp foin lalais ne’e.

(more…)

Kontinua Le'e
Advertisement

Trending