Hatutan.com, (12 Janeiru 2022) Díli-Iha tinan 2021, Banco Central Timor Leste (BCTL) liuhusi Unidade Informasaun Finanseira (UIF) submete ona rezultadu analiza tranzasaun hamutuk 30 ba Ministériu Públiku (MP) ne’ebé iha indísiu ba atividade ilegál.

Diretora UIF-BCTL, Maria José J. Sarmento. Foto/Espesiál

Kada tinan husi UIF simu de’it relatóriu oin rua maka hanesan tranzasaun suspeita no tranzasaun Cash husi Instituisaun Finanseira no non finanseira hanesan Banku, Kaebauk, Moris Rasik no operadór transferénsia osan hanesan, Money Gram, Western Union inklui mós Mosan no Tipei ne’ebé fornese ona karteira eletróniku hodi halo tranzasaun.

Relatóriu ne’e rasik kada tinan husi parte UIF simu hamutuk 200 hodi analiza no kompleta informasaun adisionál no hirak ne’ebé iha indísiu atividade ilegál no deskonfia iha ligasaun ho atividade ilísitu maka parte UIF komunika ba Ministériu Públiku.

“Kada tinan, ami simu relatóriu husi instituisaun finanseira purvolta 200, depois halo analiza hodi kompleta informasaun adisionál no ida ne’ebé iha duni indísiu atividade ilegál no deskonfia iha ligasaun atividade ilísitu ruma ami komunika ba MP no iha tinan 2021 ami konsege submete ona 30 resin ba MP ne’ebé deskonfia iha tranzasaun suspeita (mencurigakan),” Diretora UIF-BCTL, Maria José J. Sarmento, haktuir ba Hatutan.com iha ninia knar fatin Edifísiu BCTL, Díli, Kuarta (12/01/2022).

Advertisement

Knar espesífiku  UIF nian maka simu relatóriu husi banku sira ba kualkér tranzasaun, halo analiza ba relatóriu no ikus liu karik iha rezultadu analiza identifika iha indísiu ba tranzasaun ilegál maka UIF submete ba MP.

Tuir Lei nú. 17/2011 artigu 7 hateten, ema se de’it maka tama sai territóriu TL tenke deklara valor osan cash ne’ebé nia lori, tanba ne’e UIF mós iha responsabilidade hodi simu informasaun husi parte Alfándega, aeroportu terrestre sira kona-bá pasajeiru ne’ebé tama sai Timor lori osan boot liu $10.000 maka sira sei halo esplikasaun ka aprezenta dokumentu balun ne’ebé komprova katak osan ne’e rezultadu husi servisu ruma, maibé atu define valor osan ne’ebé sira tenke lori ne’e responsabilidade BCTL nian.

Funsionamentu Unidade Informasaun Finanseira bazeia ba Dekretu Lei nú.16/2014 no bazeia ba lei anti brankamentu kapitál 17/2011, artigu 4 hodi kria unidade ne’e iha BCTL nia laran, maibé organizasaun, funsionamentu no natureza define husi Dekretu Lei nú.16/2014.

Jornalista: Carmelita Isaac

Advertisement