Hatutan.com (14 Janeiru 2022) Díli—Jornalista na’in-lima hamutuk ho sira-nia kondutór, mate tanba dezastre ho karreta iha área Nyamikoma, distritu Busega, área Simiyu Tanzania Norte, iha Tersa 11 Janeiru 2022.

Karreta ne’ebé tula jornalista na’in-lima no mate iha fatin, hafoin hetan Dezastre iha Tanzania. Foto Espesiál

Jornalista na’in-lima ne’e, hala’o viajen konvoi hamutuk ho Komisáriu Rejionál Simiyu, David Kafulila, ba serimónia ofisiál ida iha Ukerewe, hanesan parte ida hosi tour provínsia Mwanza.

Federasaun Jornalista Internasionál (IFJ), hamutuk ho ninia afiliadu sira Sindikatu Jornalista Tanzania (JOWUTA) hato’o sentidu kondolénsia ba família jornalista na’in-lima ne’ebé mate iha dezastre ne’e, no mós ba média iha Tanzania.

Informasaun ne’ebé Hatutan.com sita hosi pájina ofisiál IFJ hateten, karreta ne’ebé hetan dezastre tanba xoke karreta minibus ne’ebé mai hosi oin, no dezastre ne’e rasik iha ema na’in 14 mak sai vítima, husi na’in na’in 14 ne’e iha na’in-lima nu’udár jornalista ne’ebé mate iha fatin akontesimentu.

Advertisement

Tuir deklarasaun hosi JOWUTA, jornalista no traballadór média ne’ebé lakon-vida iha dezastre ne’e mak hanesan média officer Rejionál Mwanza, Abel Ngapemba, Média officer Distritu Ukerewe, Steven Msengi, Johari Shani hosi Grupu Média Uhuru, Husna Mlonzi, Anthony Chuwa hosi ITV no ninia kondutór, Paul Silanga mate iha fatin. Vanny Charles hosi Icon TV no jurnalista Freelance, Tunu Herman, mak hetan kanek, oras ne’e sei hala’o tratamentu intensivu iha ospitál.

Nune’e mós Sekretáriu Jerál IFJ, Anthony Bellanger konsidera dezastre ne’e hanesan trajédia ida ne’e ne’ebé grave liu, no Jornalista sira ne’e lakon-vida bainhira hala’o hela serbisu públiku.

IFJ mós konsidera jornalista na’in-lima nia mate ne’e nu’udár situasaun triste boot ba família, tanba lakon sira nia ema no mós sai hanesan situasaun triste ba jornalista hotu iha nasaun ne’e.

“IFJ hato’o sentidu kondolénsia ne’ebé kle’an ba sira nia familia, kolega iha JOHUTA no média hotu iha Tanzania,” Anthony Bellanger, espresa.

Tanzania nu’udár nasaun ne’ebé kolonizadu hosi Alemña no Inglaterra, ne’ebé  ikus-mai ukun aan iha tinan 1962. 

Advertisement

Tanzania fronteira ho Kenya no Uganda iha parte Norte; Rwanda, Burundi, ho Repúblika Demokrátika Kongo iha Oeste; Zambia, Malawi, ho Mozambike iha Súl; Oseanu Índico iha parte Leste.

Jornalista: Cipriano Colo