Hatutan.com, (17 Janeiru 2022), Díli—Maski Governu prepara ona fatin ba vendedór sira iha merkadu Taibesi no Manleuana, maibé vendedór ambulante sira  kontinua faan iha estrada públiku hanesan iha Elemloi, Kampung Baru Comoro no fatin sira seluk, tanba konsidera merkadu rua ne’e nakonu ona no fatin laiha ona.

Notisia iha Relasaun:La sulan karau, Servisu Jestaun Merkadu Díli sei oho hotu

Vendedora ambulante iha Kampung Baru-Comoro, Jacinta Mafalda. Foto/Hatutan.com.

Vendedór ambulante sira mós dalabarak hetan atuasaun hosi guarda Munisípiu Díli, maibé sira kontinua nafatin buka moris iha dala ninin, tanba nesesidade família mak obriga.

“Ami hakarak muda ba merkadu Manleuana no Taibesi, maibé fatin iha ne’ebá laiha ona tanba ema barak mak okupa. Nune’e, ami pasiénsia faan iha estrada ninin, maske dalabarak guarda Munsipiu mai dunia mi no hadau ami nia sasan,” Vendedora ambulante, Jacinta Mafalda hateten ba Hatutan.com iha Comoro.

Rendimentu ne’ebé hetan kada loron másimu $40, mínimu $25 tanba muda hela de’it fatin bainhira guarda Munisípiu halo patrullamentu.

Vendedór ambulante ne’e husu ba Governu atu halo tán merkadu ida, nune’e sira bele fa’an sasan ho di’ak no dignu no labele duni bebeik hosi Guarda Munsípiu Díli.

Dezintendimentu ho Guarda Munisipál

Iha Sábdu loron 15 fulan ne’e, bainhira Guarda Munisipiu Dili hala’o patrullamentu iha área Kampung Baru Comoro, mosu dezintendimentu ho vendedór ambulante sira, tanba foti vendedór sira nia sasan la ho autorizasaun.

“Ami buka moris, nusa mak mai ameasa fali ami hodi duni ami tun sa’e,” Vendedora Jacinta Mafalda, haksesuk-malu ho vendedora.

Vendedora Merkadu Manleuana, Filomena Martins. Foto/Hatutan.com.

Iha sorin seluk, vendedór iha Merkadu Manleuana enfrenta mós difikuldade tanba kompradór laiha, no dala barak modo dodok estraga.

Maski nune’e, nia sente kontenti, tanba fa’an sasan hanesan modo iha fatin ne’ebé dignu, maski rendimentu kada loron másimu $30 no mínimu $10 de’it.

“Difikuldade ne’ebé ami hasoru maka haris fatin ladiak dalaruma bee la sai,” vendedora Filomena Martins, hateten ba Hatutan.com.

Nia husu Governu atu muda vendedór ambulante ba merkadu Manleuana, nune’e kompradór hotu konsentra iha Manleuana hodi bele hasa’e rendimentu vendedór sira.

Kona-bá situasaun ne’e, Xefe Departementu Jestaun Merkadu Administrasaun Munisípiu Díli, rejeita katak guarda Munisipiu Dili nunka halo atuasaun brutál hasoru vendedór ambulante, tanba atuasaun ne’ebé loron-loron implementa maka hosi dalan aproximasaun.

Guarda Munisipiu Dili hala’o patrullamentu iha área Kampung Baru Comoro, Sábadu (15/01/2022). Foto/Hatutan.com.

Iha aproximasaun durante fulan tolu liu hosi meius oi-oin, hanesan avizu, verbalmente, maibé durante fulan tolu maka vendedór la kumpri,  aplika sansaun ikus maka foti vendedór nia sasan hanesan modo no seluk-seluktan, ne’ebé ikus mai oferese ba orfonatu sira iha Díli laran.

“Ami nunka baku tanba ne’e violénsia. Maibé, aproximasaun karik ulun fatuk to’os maka ami prende sira nia sasan. Kuandu kontinua fa’an maka ami prende no sobu sira nia baraka ki’ik ne’ebé utiliza hodi fa’an modo,” Xefe Departementu Jestaun Merkadu Administrasaun Munisipiu Díli, Artur Henrique hateten ba Hatutan.com iha ninia knaar fatin, Balide, Segunda (17/01/2022).

Oráriu ba kontrolu vendedór ambulante diariamente, hahú oras tuku 8:30 to’o 17:00 inklui iha loron Sábadu no Domingu.

Nia mós rejeita katak, fatin iha merkadu rua ne’ebé Governu prepara hanesan merkadu Taibesi no Manleuana laiha ona, tanba fatin ba fa’an sasan sei mamuk, maibé vendedór fa’an produtu lokál maka sai fali vendedór ambulante hanesan iha Kampung Baru, Elemloi, Foho Osan Mean, Bairru-Pité, Becora no Fatuhada.

Kondisaun hariis-fatin iha Merkadu Manleuana. Foto/Hatutan.com.

Tuir dadus hosi Departementu Jestaun Merkadu iha 2021 rejista totál vendedór iha Merkadu Manleuana hamutuk ema na’in 1.656 kompostu hosi loke restaurante, kios, fa’an obralan, rentál, faan osan mean, salon, alfaiate, fa’an roupa inklui sapatu foun, fa’an produtu lokál, aifunan, manu lokál, dulas nu’u, fa’an na’an no la ativa hamutuk 48.

Iha merkadu Taibesi, totál vendedór hamutuk ema na’in 2.039 kompostu hosi Fa’an obralan, roupa no sapatu foun, sembako no kios, produtu lokál, restaurante, fa’an osan mean, telephone, fa’an na’an, ikan, fa’an kosmetik, fa’an minarain, alfaiate, rental, fa’an sasan elétrika, fa’an fahi moris inklui manu moris no hirak ne’ebé la ativa hamutuk 58.

Servisu Guarda Munisipiu Dili bazeia ba Dekretu 33/2008 loron 27 fulan Agostu ne’ebé ko’alia kona-bá ijiene no órden públika artigu 1 to’o 9 no metode de aplikasaun haree liu ba vendedór ambulante ne’ebé fa’an iha dalan públiku no área trotoar leten, sira ne’ebé husik animál lemorai iha sidade laran, sira ne’ebé so’e foer arbiru, la respeita ambiente iha sidade Díli nune’e jestaun merkadu ho nia kompeténsia tomak atu halo fiskalizasaun no monitoriza ba kualkér atuasaun ilegais.

Jornalista: Carmelita Isaac