Hatutan.com, (18 Janeiru 2022), Díli-Komite Ezekutivu Federasaun Futeból Timor Leste (FFTL) hamutuk ho asosiasaun futeból husi munisípiu sira halo “mosaun sensura” hasoru Prezidente FFTL Francisco da Costa Jerónimo tanba konsidera la iha ona kapasidade atu jere FFTL hanesan  instituisaun tuir regulamentu rasik.

Notísia iha Relasaun: Kalbuadi, Francisco ho Nilton Kandidatu Forte ba Prezidente FFTL 2022–2026

Portavóz Asosiasaun Futeból Munisípiu sira, Aleixo do Carvalho Monteiro, hatudu hela karta mosaun sensura ne’ebé sira halo liuhusi konférensia imprensa iha Sede Asosiasaun Futeból Dili Oeste, Tersa (18/01/2022). Foto/Hatutan.com

Mosaun sensura ne’e, dirije ona ba Federasaun Futeból Mundiál (FIFA, sigla Ingles) ho Asosiasaun Futeból Rejionál (AFC, sigla Ingles) hodi hatudu sira-nia lakontente ho lideransa Francisco Jerónimo nian iha FFTL durante ne’e.    

Portavóz Asosiasaun Futeból Munisípiu sira, Aleixo do Carvalho Monteiro, liuhusi konferénsia imprensa, iha Sede Asosiasaun Futeból Dili Oeste, Tersa (18/01/2022), husu atu komisaun eleitorál no verifikasaun tenke tetu no haree hikas aktu sira ne’ebé komete husi prezidente FFTL, Francisco Jeronimo molok simu nia rekandidatura ba kargu prezidente FFTL ba periodu 2022-2026.

Prezidente atuál FFTL iha nafatin lejitimidade atu kandidata nia an, enkuantu asosiasaun no membru ezekutivu sira hatama ona karta mosaun sensura,” Aleixo do Carvalho Monteiro hateten.

Portavóz ne’e salienta ezijénsia ne’ebé asosiasaun iha atu korresponde ba ezijénsia husi públiku relasiona ho insidente no naksalak sira iha  FFTL ne’ebé dala barak liu Prezidente uza de’it nia kompeténsia hodi halo abuzu de podér.

Situasaun sira ne’e hotu, Aleixo Monteiro haktuir, obriga asosiasaun sira hola pozisaun hodi hatama karta mosaun sensura ho intensaun bele salva FFTL husi risku liuliu sansaun husi FIFA, AFC no AFF ne’ebé iha tendénsia maka’as atu hamate dezenvolvimentu Futeból iha Timor Leste.

“Lolos ne’e nia (Francisco Jerónimo) demite nia an, lalika hein to’o asosiasaun sira hatama karta mosaun sensura ne’e,” Aleixo do Carvalho Monteiro haktuir.

Prezidente Emanuel Fc ne’e reforsa lolos prezidente FFTL la iha ona lejitimidade atu re-kándita an ba ezekutivu federasaun tamba maioria asosiasaun lakon ona konfiansa bazeia ba aktu sira ne’ebé prezidente FFTL komete durante ne’e.

Prezidente Asosiasaun Futeból Díli Oeste, Hipolito Soares hateten, polémika ne’ebé akontese iha federasaun, públiku Timor Leste hatene no bazeia ba polémika ne’e, maka ikus mai asosiasaun sira hamosu mosaun sensura ne’e tamba Federasaun Futeból Mundiál  (FIFA) no rejionál (AFC) mós rona no hatene ona problema atuál ne’ebé belit hela iha FFTL nia an.

“Bazeia ba situasaun sira ne’e hotu maka ami hanoin ita tenke asegura ita nia futeból,” Hipolito Soares hateten.

Nain ba klube Assalam Fc ne’e hatutan maioria membru federasaun la iha ona konfiansa ba prezidente FFTL aktual no situasaun ne’e halo prezidente la iha ona membru efetivu asosiasaun nian atu halo servisu hamutuk.

Prezidente asosiasaun Díli Oeste ne’e rekomenda atu komite eleitorál no verifikasaun halo servisu ho imparsiál hodi abertamente deklara ba públiku relasiona ho aktu rejistrasaun kandidatura sira nian.

Husi sorin seluk, Adjuntu Sekretáriu Jerál FFTL Frederico Martins hateten komite eleitorál no verifikasaun taka rejistrasaun ba kandidatu sira iha loron 12 fulan-Janeiru liubá no la iha proponente ida mak hatama reklamasaun, nune’e sekretariadu kontinua ho kandidatu nain tolu ne’ebé antes ne’e rejistu iha komite eleitorál no verifikasaun.

“Sekretariadu administrasaun jerál FFTL nian seidauk simu karta balun husi proponente sira relasiona ho asuntu rekandidatura prezidente atuál,” Frederico Martin hateten.

Adjuntu Prezidente FFTL ne’e  rekoñese iha dunik karta husi ezekutivu sira ba iha FIFA no AFC maibé organizasaun mundiál no rejionál rua ne’e hola pozisaun iha klaran no husu atu parte FFTL rezolve imediatamente liu husi ezekutivu.

To’o notísia ne’e publika seidauk hetan konfirmasaun direta husi Prezidente FFTL, Francisco Jeronimo.

Hatutan.com tenta liga ba númeru telefone privadu Francisco Jeronimo nian atu halo konfirmasaun, maibé seidauk atende telefone.

Jornalista: Vito Salvador