Hatutan.com, (22 Janeiru 2022), Díli- Prezidente Liga Futeból Timor Leste (LFTL), Nilton Telmo Gusmão dos Santos, nu’udar mós kandidatu forte ba Prezidente Federasaun Futeból Timor Leste (FFTL)  2022-2026, enkoraza asosiasaun futeból husi munisípiu hotu atu nafatin hatudu sira-nia pozisaun  liuhusi votu ida ne’ebé sira sei fó iha kongresu FFTL atu determina susesu no dezenvolvimentu Futeból iha Timor Leste.

Notísia iha Relasaun: Asosiasaun 14 Prontu Lori Francisco Kalbuadi Ba Prezidente FFTL 2022-2026

Kandidatu ba Prezidente FFTL, Nilton Telmo Gusmão dos Santos. Foto/Hatutan.com

Ba jornalista sira iha JL. Villa, Fatuhada, Dili, Sesta (21/01/2022), Nilton Telmo Gusmão dos Santos hateten, nia hetan apoiu husi asosiasaun balun atu bele kandidata an iha kongresu FFTL tamba ne’e sei elabora planu no programa prioridade sira ho asosiasaun hotu atu bele lori futeból iha Timor Leste ba oin.

“Ha’u konsiente katak buat sira ne’e hotu la fasil, maibé garante katak ho votu ida sei lori mudansa ba futeból iha Timor Leste,” Nilton Telmo Gusmão dos Santos hateten.

Nilton respeita ho kandidatu rua seluk, Francisco Kalbuadi Lay ho Francisco Pereira da Costa Jerónimo ne’ebé sei kompete hamutuk iha kongresu FFTL,  maibé prontu atu kompete hodi lori mudansa ba futeból ho hanoin foun no espíritu foun.  

Nilton salienta mandatu sira antes ne’e iha FFTL la’ós la di’ak maibé hakarak kompete atu halo mudansa no mellora di’ak liután funsionamentu FFTL ba futeból ida kualidade liu no nakloke ba asosiasaun hotu.

“Se ha’u ba para la halo mudansa, di’ak liu ha’u lalika ba no nafatin iha LFTL de’it,” Nilton Telmo Gusmão dos Santos salienta.

 Nilton Telmo Gusmão dos Santos hateten FFTL hanesan órgaun reguladór ba futeból iha Timor Leste nune’e kaer ba esperiénsia iha LFTL ne’ebé nu’udar órgaun implementadór hatene ona difikuldade sira ne’ebé futeból no asosiasaun sira enfrenta durante ne’e. Tamba ne’e, Nilton sei iha esforsu atu solusiona tuir mandatu ne’ebé iha maibé buat hotu fila ba asosiasaun sira.

“Ha’u prontu atu aprezenta programa no planu ne’ebé iha ba asosiasaun sira iha momentu kongresu no husik sira mak deside,”  Nilton Telmo Gusmão dos Santos  hateten.

Prezidente Karketu Dili Fc, José Adilson Ribeiro hateten hanesan klube kampiaun Tasa Primeira divizaun LFTL époka 2021 no hetan mos direitu de votu sei utiliza oportunidade ne’e ho másimu hodi hili lideransa ida di’ak atu bele tau prioridade ba dezenvolvimentu futeból ho kualidade.

“Ami iha ona referénsia ba kandidatu nain tolu, nune’e ami sei haree sira-nia programa, planu no vizaun ba futeból molok depozita ami nia konfiansa ho votu ida,” José Adilson Ribeiro hateten.

Iha parte seluk prezidente Emanuel Fc, Alexo do Carvalho Monteiro hateten kandidatu tolu iha potensialidade hanesan tamba ne’e iha momentu kongresu mak sei fó apoiu liu husi eleisaun ne’ebé sekretu.

Kongresu FFTL ba dala-7 ne’e sei partisipa husi Asosiasaun Futeból 14, Asosiasaun Arbitrajen, Asosiasaun Futeból Feminina, Asosiasaun Treinadór, Asosiasaun Sentru Juveníl, Asosiasaun Futsal, Kampeaun segundu divizaun (Emanuel Fc) ho Kampeaun primeira Divizaun (Karketu Díli Fc) époka 2021. Parte hirak ne’e maka  iha direitu hodi vota ba Presidente FFTL foun ba periodu 2022 – 2026.

Jornalista: Vito Salvadór