Hatutan.com, (26 Janeiru 2022), Díli—Komité eleitóral no komité judisiáriu, konklui ona prosesu verifikasaun ba kandidatura Prezidente Federasaun Futeból Timor-Leste (FFTL), no anunsiu ona abertura ba kampaña, hahú hosi 26 Janeiru to’o 26 Fevereiru 2022.

Verifikasaun ba dokumentu ne’ebé kandidatu sira submete bazeia ba estatutu FFTL artigu 37 no kódigu eleitorál artigu 11.

Notisia iha Relasaun:Kalbuadi, Francisco ho Nilton Kandidatu Forte ba Prezidente FFTL 2022–2026

Hosi rezultadu verifikasaun ne’ebé iha, hatudu kandidatu hirak ne’ebé sei konkorre iha kongresu da-hitu (VII) FFTL ba kargu Prezidente, Vise-prezidente, membru ezekutivu feto, membru ezekutivu (esco) prienxe rekezitu no sei konkorre ba komité ezekutivu foun FFTL ba periudu 2022-2026 iha loron 26 fevereiru tinan ne’e.

Kongresu eletivu tinan 2022, sei organiza demokratikamente no kandidatu hirak ne’ebé Komité eleitorál no komité judisiáriu halo tiha ona verifikasaun elijível no prontu konkorre iha kongresu.

“Ohin Komité eleitóral no komité judisiáriu anunsia kona-bá abertura  kampaña kandidatu sira nian,” Portavóz, Virna de Carvalho hateten iha sede FFTL Bairro dos Grilhos, Kuarta (26/01/2022).

Desde loke inskrisaun ka rejistrasaun ba kandidatu ezekutivu FFTL 2022-2026, komité eleitóral no komité judisiáriu la simu reklamasaun ka rekursu ruma hosi asosiasaun membru sira, nune’e garante eleisaun ba komité ezekutivu sei la’o di’ak.

Komité eleitóral no komité judisiáriu husu atu kandidatu hotu ne’ebé sei kompete ba kargu xefia no ezekutivu iha FFTL, tenke partisipa iha kongresu no sei diskualifika kandidatura ne’ebé auzente no konsidera nulu.

Hahú ohin ba oin komité eleitorál no komité judisiáriu sei la simu tán reklamasaun hosi kualkér entidade inklui asosiasaun membru sira relasiona ho kandidatura sira, nune’e sei fó tempu tomak atu kada kandidatu bele hahu halo nia kampañaa eleitorál to’o data ne’ebé komité termina.

Kandidatu hirak ne’ebé sei kompete ba kargu Prezidente FFTL mak atuál Prezidente FFTL Francisco Martins da Costa Pereira Jerónimo, Francisco Kalbuadi Lay Vise Prezidente AFF no Prezidente komité kompetisaun AFF no ikus liu mak Nilton Telmo Gusmão dos Santos atuál Prezidente LFTL.

Kandidatura ba Kargu Membru Ezekutivu Feto ne’ebé kompostu hosi Engracia Pimentel Fernandes, Sekretária Jerál Assosiasaun Futeból Feminino no Maria Terezinha Viegas, Atuál Membru Ezekutivu FFTL.

Atu kompleta estrutura FFTL nian, Komité Eleitorál  no Komité Judisiáriu FFTL simu mós Kandidatura ba Kargu Membru Ezekutivu ne’ebé kompostu hosi ema na’in-ulau hanesan Marito Belo, Prezidente Assosisaun Futeból Baucau, Henrique da Costa, atuál Membru Ezekutivu FFTL no Prezidente Assosiasaun Futsál, Faustino G. G. da Costa, atuál Membru Ezekutivu FFTL, Augusto Hendrique atuál Membru Ezekutivu FFTL no Prezidente Assosiasaun Futeból Covalima, Ângelo Lopes, atuál Membru Ezekutivu FFTL no Prezidente Assosiasaun Futeból Lautém, Aniceto Gouveia ‘Berlelo’, Prezidente Assosiasaun Arbitragem Futeból,  Ipólito Soares, Prezidente Assosiasaun Dili Oeste no ikus liu  Ricardino S. dos Reis, atuál Membru Ezekutivu FFTL no Prezidente Assosiasaun Futeból Aileu.

Jornalista: Vito Salvadór