Hatutan.com (04 Fevereiru 2022) Díli—Konsórsiu hosi Austrália nia Parseiru Humanitária (AHP Sigla Inglês) hosi NGO Internasionál sira hanesan CARE International iha Timor-Leste, Caritas Austrália, Oxfam, World Vision no Plan International, hamutuk organiza no fasilita programa treinamentu durante loron lima kona-bá Monitorizasaun no Avaliasaun no Jestaun dadus ne’ebé uza Sistema KoBo ba partisipante na’in 32, hahú hosi loron 31 Janeiru to’o 04 Abríl 2022.

Serimónia enseramentu ba treinamentu kona-bá Monitorizasaun no Avaliasaun no Jestaun dadus ne’ebé uza Sistema KoBo ba partisipante na’in 32, 04 Abríl 2022. Foto/CARE International iha Timor-Leste.

Objetivu hosi treinamentu ne’e maka, hasa’e kapasidade funsionáriu sira Protesaun Sivíl nian, nune’e mós ba Komite Jestaun Risku Dezastre, atu bele halo jestaun ba dadus sira dezastre nian ho loloos liu hosi utiliza sistema Kobo, nune’e mós etapa sira ba monitorizasaun no avaliasaun to’o halo jestaun ba dadus sira nível uma-ka’in no iha nível sentru evakuasaun sira.

Partisipante sira iha treinamentu ne’e, maka koordenadór sira Protesaun Sivíl nian no Komite Jestaun Risku Dezastre (MDMC – sigla Inglês), nune’e mós Sentru Operasaun Nasionál ba Dezastre (NDOC – Sigla Inglês) hosi Diresaun Nasionál Jestaun Risku Dezastre (NDGRD) hosi Munisipiu 12 inklui RAEOA.

Iha loron ikus treinamentu nian, AHP konsórsiu sira entrega mós konta KoBo nian hamutuk ho aparelu sira server nian ba Xefe Departementu-NDOC, atu bele tulun sira hodi operasionaliza sistema jestaun dadus hosi sira nia parte.

Advertisement

AHP konsórsiu entrega mós ekipamentu sira IT nian inklui laptop 8, printer 8, tablets 26 no USB 26 ba Protesaun Sivil, nune’e bele tulun sira nia servisu jestaun dadus tantu iha nivel Nasionál no mós iha nivel sub-Nasionál.

“Ida ne’e ami nia komitmentu atu kontinua reforsa ita nia servisu parseria entre AHP konsórsiu no mós ho Governu Timor-Leste, liu hosi ekipa Protesaun Sivil iha area oin-oin, inklui Monitorizasaun no Avaliasaun no jestaun dadus atu habele liu tan ita nia ekipa jestaun dezastre iha nivel hotu-hotu, liu-liu atu hadi’a sistema jestaun dadus no responde ba dezastre ho lalais no oportunu,” Hatutan.com sita deklarasaun Diretór Nasionál World Vision Timor-Leste nian, ne’ebé reprezenta AHP konsórsiu, Migena Shulla, iha komunikadu.

Nia mós agradese ba Governu Austrália no Governu Timor-Leste, liu-liu ekipa Protesaun Sivil ba inisiativa murak ida ne’e no ba parseria tempu naruk nian hodi prepara ba hasoru dezastre no jestaun dezastre iha nasaun ida ne’e.

Primeiru Sekretáriu (Dezenvolvimentu Umanu) hosi Embasada Austrália nian in Timor-Leste, Troy Skaleskog hateten, Austrália kontente loos hodi kontinua apoiu Governu Timor-Leste atu bele prepara-an di’ak liu, hodi responde ba dezastre.

Diretor Jeral Protesaun Sivil, Superintendente Ismael da Costa Babo konsidera Sistema ba jestaun dadus ne’e importante teb-tebes ba kualker intervensaun no responde ba situasaun emerjénsia ruma.

Advertisement

Ida ne’e importante atu asegura mobilizasaun rekursu no inisiativa ba responde ka intervensaun ruma iha kualker situasaun dezastre ne’ebe akontese iha nasaun ne’e, sempre bazeia ba dadus no evidensia ne’ebe iha.

Tanba ne’e, lori Sekretaria Estadu ba Protesaun Sivil nia naran, Ismaal hato’o obrigadu barak ba AHP Konsórsiu ho nia parseru imlementadór sira, liu-liu ba Governu Austrália ba apoiu kontinuidade ida ne’e hahu hosi nivel Nasionál to’o sub-Nasionál sira servisu Protesaun Sivil nian iha Timor-Leste.

Jornalista: Cipriano Colo

Advertisement