Hatutan.com, (08 Fevereiru 2022), Dili-Ministru Asuntu Parlamentár no Komunikasaun Sosiál (MAPKOMS), Francisco Jerónimo Martins da Costa Pereira, deklara katak, nia prontu ba hatán iha tribunál kona-bá projetu instalasaun Set-top Box/dexodificador Rádiu Televizaun Timor-Leste, Empreza Públika (RTTL, E.P).

Notísia iha Relasaun: CAC Submete Ona Kazu Projetu Set-top Box RTTL,E.P Bá Ministériu Públiku

MAPKOMS, Francisco Jerónimo hetan entrevista hosi jornalista sira. Foto/Dok.Hatutan.com

“Ha’u prontu kualkér tempu bainhira Ministériu Públiku bolu atu ba investiga ka ba hatán,” Ministru Asuntu Parlamentár no Komunikasaun Sosiál (MAPKOMS), Francisco Jerónimo Martins da Costa Pereira, deklara ba jornalista sira, hafoin sorumutuk regulár ho Primeiru-Ministru (PM), Taur Matan Ruak, iha rezidénsia ofisiál Primeiru-Ministru  nian iha Faról, Dili, Tersa (08/02/2022).

Ministru Francisco Jerónimo esplika katak, projetu instalasaun Set-top Box/dexodificador ne’e, nu’udár projetu bilaterál ida ne’ebé iha kooperasaun entre Governu Xina ho Timor-Leste.

“La’ós projetu Timor-Leste nian. Set-top Box/dexodificador ne’e mós, Governu Xina nian, ne’ebé fahe mai, haruka mai, atu halo instalasaun. Mak ne’e, ne’ebé, prontu iha kualkér tempu,” Ministru  Francisco Jerónimo afirma.

Maske kazu ne’e, Comissão Anti Corrupção (CAC), konklui ona nia investigasaun no submete ona ba Ministériu Públiku (MP), Ministru Francisco Jerónimo klarifika tan katak, projetu instalasaun Set-top Box/dexodificador durante ne’e la’o ho di’ak, no laiha problema ruma mak mosu.

Notísia iha Relasaun: LABEH Husu CAC ho MP Aselera Investigasaun ba Kazu Projetu Set-top Box RTTL,E.P

“Laiha, ha’u dehan laiha, tanba buat ne’e depende ba Ministériu Públiku dehan katak, sé iha lakuna ka CAC dehan iha lakuna, hateten mai, ami halo esplikasaun,” Francisco Jerónimo, afirma tan.

Hatán kona-bá tanbasá mak projetu instalasaun Set-top Box/dexodificador  RTTL,E.P ne’e, bele sai kazu boot no to’o iha Tribunál, MAPKOMS dehan, nia rasik mós lahatene.

“Ha’u lahatene. Ha’u lahatene tanba, ohin loron ema hotu-hotu hakarak oho ema nia karater ne’e, tenke lori sasán sira hanesan ne’e,” Ministru Francisco Jerónimo haktuir hodi dezafia mós média Hatutan.com, katak, to’o bainhira mak atu duni nia kazu ne’e to’o hotu.

“Tanba ne’e maka ha’u dehan dala ida tán, Hatutan.com maka loro-loron tuir ha’u. Bainhira mak tuir ha’u to’o hotu.  Ha’u hein, bainhira mak nia hotu,” Ministru Francisco Jerónimo, atuál prezidente Federasaun Futeból Timor-Leste (FFTL) afirma tan. 

Notísia iha Relasaun: MAPKOMS Halo Ona Pagamentu 90% Ba Projetu Set-top Box RTTL,E.P

Projetu instalasaun Set-top Box/dexodificador RTTL,E.P ho nia valor orsamentu $900,000.00 ne’e Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, estabelese kontratu ho empreza DILI ENTERNAL INNOVATION INFORMATION, Lda, ne’ebé deskonfia iha indísiu Korrupsaun, Koluzaun no Nepotizmu (KKN)  tanba  Ministru Francisco Martins da Costa Pereira Jerónimo, hanesan mós Prezidente Federasaun Futebol Timor Leste (FFTL) estabelese kontratu projetu refere ba fali nia sekretaria Gabinete Prezidente FFTL,  Melánia da Silva Fernandes Capela. 

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan Sekretaria iha Gabinete Prezidente Federasaun Futeból Timor Leste (FFTL), Francisco Martins da Costa Pereira Jerónimo, atuál MAPKOMS.

Notísia iha Relasaun: MAPKOMS Halo Ona Pagamentu 90% Ba Projetu Set-top Box RTTL,E.P

Projetu instalasaun Set-top Box/dexodificador  RTTL,E.P ne’e deskonfia MAPKOMS halo selebrasaun kontratu ho empreza DILI ENTERNAL INNOVATION INFORMATION, Lda, ne’ebé Melánia da Silva Fernandes Capela, nu’udar Sekretaria Prezidente FFTL nian, nu’udar mós share ka sósiu iha empreza ne’e ho persentajen sósiu  40% ($4.000,00).

Projetu instalasaun Set-top Box/dexodificador RTTL,E.P ho nia valor orsamentu $900,000.00. Nune’e, kustu ba instalasaun kada Set-top Box/dexodificador RTTL,E.P $30.00 ba benefisiáriu  kada uma-kain  hamutuk 30.000 (rihun tolu-nulu) iha Dili, Liquiça, Ermera ho Manatuto.

Hatutan.com halo esforsu durante fulan ida hodi buka-tuir edifísiu kompañia DILI ENTERNAL INNOVATION INFORMATION, Lda  ne’ebé ninia enderesu hakerek iha Certidão do Registo Comercial hosi SERVE,I.P katak iha Aldeia Fomentu III , Suku Comoro, Postu Administrativu Dom Aleixo, Munisípiu  Dili, maibé la hetan edifísiu ninia isin-lolon.

Alende ne’e, Hatutan.com mós esforsu hodi halo kontaktu no tenta dala barak atu halo entrevista ho na’in ba kompañia DILI ENTERNAL INNOVATION INFORMATION, Lda, Melánia da Silva Fernandes Capela,  maibé rejeita atu fó komentáriu no la iha tempu atu halo entrevista.

Jornalista: Rogério Cárceres