Hatutan.com, (03 Fevereiru 2022), Dili—Primeiru-Ministru (PM), Taur Matan Ruak, enkoraja sidadaun sira ne’ebé iha dadus komprovativu kona-bá indikasaun korrupsaun, koluzaun no nepotizmu (KKN) iha projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P)  bele lori ba Komisaun Anti Korrupsaun (CAC, sigla portugés).

Notísia iha Relasaun: MAPKOMS Halo Ona Pagamentu 90% Ba Projetu Set-top Box RTTL,E.P

Primeiru-Ministru, Taur Matan Ruak. Foto/Hatutan.com

“Se mak iha dadus lori ba CAC, há’u la defende hau-nia ministru sira, iha hau-nia Governu ne’e, ida-ne’e (korrupsaun-red) mak iha, sei la hasai tan sira-nia imunidade,” Primeiru-Ministru Jenerál Taur Matan Ruak, afirma hodi responde Hatutan.com iha Palásiu Prezidensiál, Dili, Kinta (03/02/2022), hafoin hasoru-malu ho Prezidente Repúblika (PR), Francisco Guterres “Lú Olo”.

“Ita-boot sira lori direita ba CAC no Ministeriu Públiku investiga sira, duke ita espekula iha liur, tamba ne’e, dala ruma ita akuza falsu ema no ha’u nia pozisaun klaru, sei la tolera no defende aktu sira liga ho KKN iha VIII Governu Konstitusionál,” Taur Matan Ruak afirma tán.

Taur espera katak sidadaun sira ne’ebé iha dadus, iha korajen uitoan atu bele lori prosesu ne’e ba oin.

Notísia iha Relasaun: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Projetu instalasaun instalasaun Set-top Box/dexodificador RTTL,E.P  ho nia valor $900,000.00 ne’e, Ministru Asuntu Parlamentár no Komunikasaun Sosiál (MAPKOMS) nu’udar mós Prezidente Federasaun Futeból Timor Leste (FFTL), deskonfia pratika “abuzu poder” hodi estabelese kontratu projetu ne’e ho  empreza DILI ENTERNAL INNOVATION INFORMATION, Lda, ne’ebé nu’udar sósiu husi Fan Yuanxiang ho Melánia da Silva Fernandes Capela.

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan  Sekretaria Prezidente Federasaun Futeból Timor Leste (FFTL).

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% no Melánia da Silva Fernandes Capela iha 40% husi total Kapitál Sósiu $10,000.00. 

Notísia iha Relasaun: Projetu Instalasaun Set-top Box RTTL,E.P, Gabinete Inspesaun MAPKOMS Seidauk Iha Informasaun Kona-bá Irregularidade

Tuir Estatutu DILI ENTERNAL INNOVATION INFORMATION, Lda kona-bá Kontratu Konstitutivu, Kuota Limitada ba Sosiedade, iha artigu 4 (Kapitál Sosiál)  hateten, kapitál sosiál ho inisiál integra ba osan no depozita ona ho valór nominal $10,000.00 ba nain husi empreza DILI ENTERNAL INNOVATION INFORMATION, Lda ne’ebé reprezenta kuota hanesan tuir mai:

1. Kuota ida ho valor nominal $6,000.00 vale ba 60% mai husi Fan Yuanxiang
2. Kuota ida ho nia valor nominal $4,000.00 vale ba 40% ho nai na’in ba sósiu ne’e mak Melánia da Silva Fernandes Capela.

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Informasaun ne’ebé Hatutan.com asesu husi fonte oioin ne’ebé lakohi fó sai sira-nia identidade, katak projetu  instalasaun Set-top Box/dexodificador ho montante $900,000.00 ne’ebé implementa  iha tinan 2021 liubá nu’udar komponente ida hosi Projetu Dijitalizasaun RTTL,E.P ne’ebé kooperasaun entre Governu Xina ho Governu Timor-Leste.

Notísia iha Relasaun: Komunidade Guisu Liquisa Konsidera Projetu Set-top Box RTTL,E.P “Laiha Benefísiu”

Projetu instalasaun Set-top Box/dexodificador  RTTL,E.P ne’e deskonfia MAPKOMS halo de’it selebrasaun kontratu ho empreza DILI ENTERNAL INNOVATION INFORMATION, Lda, ne’ebé Melánia da Silva Fernandes Capela, Sekretaria Prezidente FFTL nian, nu’udar mós share ka sósiu iha empreza ne’e ho persentajen sósiu  40% ($4.000,00).

Ministru Asuntu Parlamentár no Komunikasaun Sosiál  (MAPKOMS), Francisco Martins da Costa Pereira Jerónimo, ne’ebé Hatutan.com konfirma direita iha loron 19 fulan-Janeiru 2022, iha Palásiu Governu,  hafoin reuniaun Konsellu Ministru, hateten katak projetu ne’e remata ka termina ona tamba ne’e buat hotu liuhusi dalan legál.

Iha Tersa (01/02/2022), tuku 09:30 Otl, Hatutan.com liga telefone ba Melánia da Silva Fernandes Capela, nu’udar na’in ho shares 40% iha kompañia DILI ENTERNAL INNOVATION INFORMATION, Lda,  atu bele marka audiénsia halo entrevista. Infelizmente, la’ós Melánia maka foti telefone, maibé nia feto-maluk seluk mak atende telefone hodi dehan, Melánia sei sai hela.   

Notísia iha Relasaun: CAC Investiga Hela Instalasaun Set-top Box RTTL, E.P Ne’ebé Nakfilak Projetu “Fahe” De’it

“Lea, lae, mana Melania iha li’ur hela. Bele hatene ita husi ne’ebé? Kona-bá saida atu ko’alia ho Melánia,”  mana ida ne’ebé simu telefone ne’e lia tun dehan. Nune’e Hatutan.com aprezenta an hodi dehan mós objetivu telefone atu marka audiénsia ho Melania hodi halo entrevista no buka hatene diresaun loloos  edifísiu empreza DILI ENTERNAL INNOVATION INFORMATION, Lda, atu bele ba hasoru jerente sira ne’ebé kompeténsia atu halo entrevista kona-bá projetu instalasaun Set-top Box/dexodificador RTTL,E.P.

Rona tiha lia-hirak ne’e,  feto maluk Melánia nian ne’e husi tenik, “ne’e husi ne’ebé maun.” No Hatutan.com responde hodi dehan, “Ami husi Hatutan.com”.

“Ok, mana Melánia mai maka fó hatene hodi liga fali ba ita,”  tenik feto maluk ne’e.

Iha fali tuku 10:20 Otl, Hatutan.com liga fali telefone ba Melánia nia númeru telefone, infelizmente Melánia la simu ona telefone.

Notísia iha Relasaun: Komunidade Becora Instala Rasik Set-top Box RTTL,E.P

Jornalista: Vito Salvadór