Hatutan.com, (04 Fevereiru 2022), Díli- Organizasaun sosiedade sivíl Lalenok ba Ema Hotu (LABEH) husu ba  Komisaun Anti Korrupsaun (CAC, sigla portugés) no Ministériu Públiku (MP) atu aselera prosesu investigasaun ba projetu instalasaun Set-top Box Radiu Televizaun Timor Leste, Empreza Públika (RTTL,E.P) ne’ebé deskonfia iha indikasaun ba abuzu podér, korrupsaun no nepotizmu.

Notísia iha Relasaun: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Diretór ezekutivu LABEH, Christopher Henry Samson . Foto/Hatutan.com

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan ho montante $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Projetu instalasaun Set-top Box/dexodificador RTTL,E.P ne’e, deskonfia Ministériu Asuntu Parlamentár no Komunikasaun Sosiál (MAPMKOS) estabelese kontratu direta ho DILI ENTERNAL INNOVATION INFORMATION, Lda, ho nia valór orsamentu $900,000.00. Nune’e, kustu ba instalasaun kada Set-top Box/dexodificador RTTL,E.P $30.00 ba benefisiáriu  kada uma-kain  hamutuk 30.000 (rihun tolu-nulu) iha Dili, Liquiça, Ermera ho Manatuto.

Projetu ne’e deskonfia hamosu KKN tanba Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira  Jerónimo nu’udar mós prezidente Federasaun Futebol Timor Leste (FFTL) estabelese akordu ho empreza DILI ENTERNAL INNOVATION INFORMATION, Lda, ne’ebé na’in mós mak Sekretaria Gabinete Prezidente FFTL,  Melánia da Silva Fernandes Capela. 

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares husi Fan Yuanxiang, natural Hunan-Xina ho nasionalidade Xina no Melánia da Silva Fernandes Capela, timor-oan ne’ebé hala’o mós serbisu loron-loron nian hanesan Sekretaria iha Gabinete Prezidente Federasaun Futeból Timor Leste (FFTL), Francisco Martins da Costa Pereira Jerónimo, atuál MAPKOMS.

Notísia iha Relasaun: Projetu Set-top Box RTTL,E.P, PM Taur Enkoraja Sidadaun Sira Lori ba CAC

Diretór Ezekutivu LABEH, Christopher Henry Samson ba Hatutan.com iha nia servisu fatin Kampung Baru, Díli, Sesta (04/02/2022), esplika adjudikasaun direita bele akontese iha situasaun rua tuir lei haruka, hanesan uainhira projetu ne’ebé atu halo mai ho karater emerjensia no la iha tan tempu atu halo prosesu normal no emerjensia ne’e iha relasaun ho ema nia vida no se kuandu la halo lalais sei halakon ema nia vida, bele halakon ema nia propriedade, bele halakon ema nia riku-soin, tamba ne’e, bele halo ajudikasaun direita atu salva guarda ema nia vida no ne’e justifikavel tuir lei haruka no ida seluk ajudikasaun direita bele akontese uainhira la iha tan ema seluk ka empreza seluk ne’ebé bele oferese servisu ne’e nafatin tenke justifika ho prova ruma tuir lei ne’ebé vigora.

Nia hateten, se adjudikasaun direta ho situasaun normal no la iha forsa maior, presiza duni investigasaun profundu molok kontratu ida akontese tamba ne’e papel importante husi povu, mídia no sosiedade sivil atu tau atensaun maximu ba asuntu sira-nune’e hodi promove boa-governasaun.

“Se informasaun ne’e loos, ministru ne’ebé koko no halo tiha ona adjudikasaun direita sem kumprimentu ba lei tenke tama prosesu investigasaun, katak CAC no MP labele halimar ho situasaun ida hanesan ne’e, tamba ne’e, sei prejudika integridade Estadu no Governu nian,”  Christopher Henry Samson  esplika.

Notísia iha Relasaun: MAPKOMS Halo Ona Pagamentu 90% Ba Projetu Set-top Box RTTL,E.P

“Timor Leste la bele husik situasaun sira nune’e akontese beibeik no la bele fó biban ba akontesimentu sira nune’e  atu akontese tiha mak foin halo investigasaun maibé tenke hapara kedas,” Nia akresenta tan.

Nu’udar sosiedade sivíl informasaun sira nune’e importante dunik atu lori ba oin hodi labele husik situasaun sira ne’e la’o ba oin, tamba de’it ema ne’e ministru ne’ebé iha podér hodi fó projetu ba nia sekretária, kolega ka familia iha instituisaun demokratiku iha pais ne’e.

Nia afirma tan, Lei Aprovizionamentu ne’e eziste atu prosesu hotu tuir nia dalan legal atu bele hetan prosesu di’ak, projetu ne’ebé kualidade no lori satisfasaun ba ema hotu katak prosesu ne’e transparente, akuntabilidade no tuir lei haruka.

“Se uainhira la tuir lei aprovizionamentu haruka iha ne’ebá mosu KKN no nepotizmu ne’e la’o daudauk no karik ida ne’e akontese LABEH prontu lori kazu ne’e ba oin, enkuantu ita iha dunik evidénsia katak MAPKOMS kontra ka halo dunik ita sei la diskute tan tamba ne’e totalmente kontra lei no labele subar tamba la iha fatin atu subar no lei mak manda ita,” Christopher Henry Samson   hateten.

Diretur ezekutivu ne’e hatutan halo nusa mak ministru ida fo fali servisu ba nia sekretaria ida ne’ebé servisu hamutuk ho nia iha gabinete ida. Informasaun ne’e los dunik parte kompetente tenke halo atuasaun atu ita labele husik karakter sira korrupsaun nian iha rai ida ne’e.

Notísia iha Relasaun: Projetu Instalasaun Set-top Box RTTL,E.P, Gabinete Inspesaun MAPKOMS Seidauk Iha Informasaun Kona-bá Irregularidade

“Ha’u kongratula media sira, liuliu Hatutan.com hamutuk sosiedade sivíl no konta mós ho LABEH atu ita hamutuk luta ba kombate korrupsaun, liu husi divulgasaun informasaun sira relasiona ho akontesimentu sira ne’ebé iha indikasaun ho korrupsaun.”

Nia afirma tan, la iha lei ida bandu mídia atu ko’alia kona-ba aktu korrupsaun ne’ebé ukun nain sira halo, la iha mos lei ida bandu atu sosiedade sivíl sira ko’alia kona-ba aktu korrupsaun ne’ebé ukun nain sira komete.

“Ami nia papél dunik, se imi halo di’ak, ami promove no karik imi uza dalan ilegal hodi foti povu nia riku-soin, ami sei dehan lae no lae dunik ba korrupsaun.” Nia subliña.

Hafoin reuniaun Konsellu Ministru  iha Palaçio do Governo, Kuarta (19/01/2022), Hatutan.com halo konfirmasaun ho Ministru Asuntu Parlamentar no Komunikasaun Sosiál (MAPKOMS), Francisco Pereira da Costa Jerónimo, hateten, nia laiha relasaun ho empreza DILI ENTERNAL INNOVATION INFORMATION, Lda

“Ha’u la iha urusan, ha’u la haree sira ne’e ida tamba hau la hatene,” Francisco da Costa Jeronimo hateten hodi lia tun tan dehan, Hatutan,com ba buka tuir iha Servisu Aprovizionamentu atu hatene projetu Set-top Box/dexodificador RTTL,E.P ho valor orsamentu $900,000.00 halo husi adjudikasaun direita ka lae. Nune’e, bele hetan prova.

“Ita boot bele ba verifika ka cek iha fatin sira-ne’e, ba iha aprovizionamentu ba cek iha ne’ebá,” Ministru  Francisco da Costa Jerónimo nu’udar mós prezidente FFTL hateten.

Governante ne’e mós rejeita informasaun katak kompañia DILI ENTERNAL INNOVATION INFORMATION, Lda viola regra kontratu hodi la halo instalasaun Set-top Box/dexodificador ba iha komunidade ida-idak nia uma.

“Ita boot bele ba halo investigasaun kompañia ba distribui de’it ka halo mós montajen pois lori informasaun mai,” Francisco da Costa Jeronimo tenik tan.

Nia informa tan katak projetu ne’e remata ona tamba ne’e buat hotu liu husi dalan legal.

Jornalista: Vito Salvadór