Hatutan.com (04 Fevereiru 2022) Díli—Tribunál Distritál Díli (TDD), sei halo julgamentu foun ba krime partisipasaun ekonómika iha negósiu no administrasaun danoza ne’ebé deskonfia involve eis Ministru Comérsio e Indústria (MCIA), atuál deputadu bankada Partidu Demokrátiku arguidu António da Conceição no arguidu na’in-haat seluk.

Arguidu na’in-haat seluk, nu’udár funsionáriu públiku MCIA, inklui diretór kompañia Kaninuk Star Unipessoál Lda, arguidu António da Costa, arguida Zulmira Inácia Belo, arguidu Gaspár Policarpo da Silva Correia, Paul Manuel da Costa Soares Viana, relasiona ho fornesimentu ekipamentu labotóriu indústria hosi orsamentu kapitál menór ho montante globál $200.000 iha tinan 2014, ne’ebé hamout osan Estadu ho montante $143.500.

Notisia iha Relasaun:Julgamentu, “Kalohan” Rekoñese Aprova Pedidu Pagamentu Maski Ekipamentu Seidauk Tama

Razaun TDD sei halo julgamentu foun ba kazu ne’e, tanba antes ne’e prezide hosi juiz kolektiva Maria solana, Ivan Suritay no Ana Paula Fonseca ne’ebé iha tempu ne’ebá konsege rona ona arguidu sira, maibé daudaun ne’e juiz Ivan Suritay labele prezide ona julgamentu ne’e, tanba ba tuir formasaun komplimentár iha Portugál durante fulan ne’e.

Relasiona ho problema ne’e, bazeia ba despaixu hosi Konsellu Superiór Tribunál Rekursu (TR), husu ba TDD atu organiza fali juíz foun na’in-ida hosi juíz ne’ebé kaer kazu sivíl, hodi troka juíz Ivan Suritay iha prosesu ne’e.

“Difikuldades ne’ebé ami hasoru maka iha vistu ou aseitasaun hosi juiz foun ne’ebé atu troka hodi involve iha koletivu laran, tanba juiz ne’ebé kaer kazu sivíl maka sei mai suporta. Maibé, karik sira la prontu maka ha’u sei buka dalan liu hosi Konsellu Superiór TR, hodi dada fali juiz ida hosi Tribunál ne’ebé iha, hodi troka fali juiz Ivan Suritay iha prosesu kazu António Kalohan inklui kazu sira seluk ne’ebé part’ense ba kolektivu Ivan Suritay,” Afonso Carmona ba Hatutan.com iha ninia knaar fatin, TDD Sesta (04/1/2022).

Impaktu hosi mudansa kolektivu ne’e iha, tanba prosesu julgamentu ba kazu ne’e tenki para iha dalan klaran hodi lakon provas, tanba prazu liu ona. Maibé TDD sei esforsu hodi koloka fali juiz foun ida ba kazu ne’e, hodi marka loron ba julgamentu foun.

Parte advogadu privadu Câncio Freitas ne’ebé fó asisténsia ba arguidu to’o agora seidauk hetan despaixu hosi TDD, kona-bá loron julgamentu ba kazu António Kalohan.

“Ami hein de’it despaixu hosi juíz nian, maibé to’o agora ami seidauk hatene loron julgamentu foun nian,” Cancio hateten.

Iha julgamentu antes ne’e, Tribunál liu hosi juiz kolektiva Maria solana, Ivan Suritay no Ana Paula Fonseca, konsege rona ona arguidu António da Conceicão, diretór kompañia Kaninuk Star Unipessoál Lda arguidu António da Costa, arguida Zulmira Inácia Belo no arguidu Gaspar Policarpo da Silva Correia.

Jornalista: Carmelita Isaac