Hatutan.com (12 Fevereiru 2022) Díli—Tribunál Distritál Díli (TDD), hala’o primeiru julgamentu ba prezu Luis Mendonça, tanba sunu ona nia bin lezada Claudina Soares nia uma, ne’ebé lokaliza iha Delta III, suku Comoro, postu administrativu Dom Aleixo, Munisípiu Díli.

Tribunál Distritál Díli (TDD). Foto/Hatutan.com.

Iha audiénsia julgamentu, arguidu konfesa katak akuzasaun loos hotu, maibé arguidu sunu uma ne’e ho razaun tanba lezada lakohi fa’an rai ba ema seluk, maski antes ne’e arguidu halo ona kontratu.

“Ha’u mak sunu bin nia uma tanba ema ne’ebé atu sosa ami nia rai ne’ebé lokaliza iha Delta, fó ona osan ba mãe maibé ikus mai maun ho bin la hatan fali. Tanba ne’e, ho nervozu fakar gazolina hodi sunu maibé ha’u la hatene sasan saida mak iha uma laran tanba ahi han de’it mak okos no andar leten ahi la han,” arguido deklara iha sala julgamentu.

Lezada Claudina Soares haforsa akuzasaun katak, loos duni nia alin ikun arguidu maka sunu uma ne’e, maibé nia hakarak fó perdaun ba nia alin tanba nia alin kumpri ona prizaun preventiva iha primeiru interrogatóriu ne’ebé hala’o ona antes.

Hafoin rona arguidu no lezada, Tribunál adi’a hikas julgamentu ba loron seluk hodi rona alegasaun.

Hafoin julgamentu, guarda prizionál sira lori hikas arguidu ba prizaun Becora, hodi kumpri medida koasaun prizaun preventiva ne’ebé antes ne’e TDD aplika.

Antes ne’e, tuir akuzasaun hosi Ministériu Públiku (MP) katak, iha loron 28 fulan Novembru 2020 iha tuku 07:00 oras lorokraik, arguidu ba iha lezada nia uma ho hirus, tanba la autoriza arguidu fa’an rai ba investór sira tanba ne’e ho nervozu arguidu fakar gazolina hodi sunu lezada nia uma.

Hosi arguidu nia hahalok fó prezuizu ba lezada ho montante $9.250, tanba ne’e MP akuza arguidu ba prátika krime Danu agravadu ne’ebé previstu iha artigu 259 hosi kódigu penál Timor-Leste.

Audiénsia julgamentu iha Sesta 11 fulan ne’e, prezide hosi Juiz kolektivu, Afonso Carmona, Ercilia de Jesus, Evangelino Belo, MP reprezenta hosi Prokuradór Jacinto Babo no arguidu hetan asisténsia legál hosi Defensór Públiku (DP) Marçal Mascarenhas.

Jornalista: Carmelita Isaac