Hatutan.com (14 Fevereiru 2022), Díli—Tribunál Distritál Díli (TDD) hala’o primeiru julgamentu ba krime omesídiu agravadu ne’ebé deskonfia involve arguidu na’in 13, tanba óho no so’e ona lezadu Hendrique Soares iha edifísiu Universidade da Paz (UNPAZ), iha área Osindu, Díli.

Tribunál Distritál Díli. Foto/Hatutan.com.

Arguidu na’in 13 mak hanesan Francisco Palmira, FelicianoTilman, Dalia Imaculada, Francisco de Carvalho, Quintino Bianco, Santiago Pereira, Jose Lucia, Joao Paulo, Alfredo Veriato, Zederino Carvalho, Genriano Paulo, Natalino Brandao ho João dos Reis.

Julgamentu iha Segunda loron 14 fulan ne’e, arguidu Francisco Palmira rekoñese nia parte iha ligasaun di’ak no kolega ho matebian.

Tanba ne’e, iha momentu ne’ebá matebian ho Francisco uza motór ba eskola UNPAZ, maibé bainhira to’o iha UNPAZ matebian hakarak tama ba área eskola nian, no Francisco lakohi tama, nune’e Francisco la’o ain de’it hodi fila ba uma.

“Matebian mesak mak la’o tama ba kampus UNPAZ, no ha’u fila ba uma. Maibé iha tuku 3:00 madrugada ha’u rona ema hakilar no ha’u sai ba liur haree matebian latan hela iha moru UNPAZ nian ho kondisaun isin molik no i’is laiha ona. Matebian mate ho kalsa mean ne’ebé diferente ho antes ami rua sai ne’e,” arguidu deklara iha audiénsia.

Hafoin rona deklarasaun hosi arguidu, Tribunál adi’a hikas julgamentu ba loron seluk hodi kontinua rona arguidu sira seluk.

Ministériu Públiku (MP) akuza arguidu sira ba prátika krime omesídiu agravadu ne’ebé previstu iha artigu 139 hosi kódigu penál TL, relasiona ho kazu omesídiu ne’ebé akontese iha UNPAZ iha loron 20 fulan juñu 2021 ne’ebé hamate ona Hendrique Soares.

Audiénsia julgamentu prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac