Hatutan.com, (22 Fevereiru 2022), Díli-Komunidade Salezianu Dom Bosco Comoro, oras ne’e, fó hela asisténsia fatin ba komunidade hamutuk uma-kain 59 ne’ebé afeta husi inundasaun mota Comoro ne’ebé akontese iha Segunda loro-kraik (21/02/2022).

Notísia iha Relasaun: Inundasaun Comoro, Família Uma Kain 37 Sofre no Maki IGE Nian Rua Mout iha Hera

Inundasaun Comoro iha Segunda (21/02/2022). Foto/Hatutan.com

Familia uma-kain hirak husi Aldeia Fomento II ho Aldeia Maris Foun, Suku Comoro, tenke evakua ba fatin seguru, hanesan iha fatin Dom Bosco nian tanba sira-nia horik fatin udan-been nalihun tama no balun nia uma hetan estragu total.

Diretór Sentru Formasaun Dom Bosco, Pe. Adriano Maria de Jesus, SDB ba Hatutan.com iha nia knar fatin, Tersa (22/02/2022), hateten asisténsia dahuluk ne’ebé Dom Bosco fó ba família vítima inundasaun husi mota Comoro mak fatin.

Advertisement

“Bainhira ami simu kontaktu husi parte Governu liu husi Sekretáriu Estadu Protesaun Sivíl (SEPS) husu fatin, ami dehan iha. Nune’e sira mak evakua família lubuk boot ne’e mai iha ne’e no Governu mak lori sasán sira hanesan hahán, biti, kapote no kontinua lori matabixu ba sira ohin dadeer no parte komunidade Dom Bosco mós kontinua prepara  matabixu ba sira no iha ona planu atu halo instalasaun eletrisidade ba fatin sira ne’ebé iha atu família vítima hirak ne’e bele utiliza hodi hein rekuperasaun husi Governu ba sira nia hela fatin,”  Amu  Adriano Maria de Jesus hateten.

“Fatin ne’ebé iha mak ne’e, sira mai ami labele haruka fila. Fatin ne’ebé iha uza se la iha ona ita labele halo milagre,”  nia tenik.

Pe. Adriano Maria de Jesus, SDB. Foto/Hatutan.com

Nia  akresenta komunidade sira presiza fatin atu sira bele hakmatek, fatin atu salva sira-nia moris, entaun sira kuandu mai ona iha Dom Bosco la bele taka matan hodi haruka nia fila iha tempu badak nia laran enkuantu nia kondisaun seidauk rekupera tamba ne’e parte Dom Bosco sei nafati servisu hamutuk ho Governu atu família hirak ne’e fila ba sira-nia hela fatin bele iha seguransa ba sira-nia vida.

Dezde Segunda kalan, parte Governu liu husi Ministériu Saúde, fó kedas asisténsia médiku ba labarik no inan isin-rua sira tamba ne’e parte Governu servisu makas loos hodi fó asisténsia emerjénsia ba komunidade afetadu sira.

Iha mós grupu no indivíduu balun ne’ebé voluntáriamente fó apoiu nesesidade bázika liuliu ai-han no bee hemu ka aqua.

Komunidade Aldeia Moris Foun, Suku Comoro, Bernardino Borges hateten, mota boot halo bee sobu uma komunidade nia lubuk ida no halo komunidade la  konsege salva sasán uma laran.

Advertisement

Bernardino Borges hatutan, Governu evakua sira ba iha fatin seguru Dom Bosco Comoro dezde Segunda kalan, tuku 22:00 OTL, no simu ona asisténsia husi parte Dom Bosco ba iha fatin no hahán.

Jornalista: Vito Salvador