Hatutan.com (23 Fevereiru 2022) Díli—Tribunál Distritál Díli (TDD), iha Kuarta loron 23 fulan ne’e liu hosi leitura sentensa ne’ebé lee hosi juiz kolektivu Alvaro Maria Freitas, José Gonçalves, Argentino Nunes, deside absolve Eis Administradór Ataúro arguidu Manecas da Conceição Soares no Xefe Sentru Saúde Postu Ataúro, arguidu Januário Domingos Cabeças Soares hosi krime pekulatu no abuzu de podér, relasiona ho subsídiu ka indemizasaun ba ai-horis komunidade nian ba konstrusaun kampu aviasaun temporáriu iha Ataúro iha tinan 2014.

Razaun TDD absolve arguidu na’in-rua, tanba maski faktus provadu katak arguidu na’in rua depozita osan restu iha brankas MS Ataúro hosi uma-ka’in tolu ne’ebé rejeita simu indemnizasaun ho montante hamutuk $620.

Notisia iha Relasaun:Eis Administradór Ataúro Ameasadu Kadeia Tinan Rua

Advertisement

Maibé Tribunál konsidera katak, krime ne’ebé imputa ba arguidu na’in-rua la provadu, tanba arguidu na’in-rua devolve ona osan ne’e ba Estadu.

Antes ne’e, tuir akuzasuan hosi Minisériu Públiku (MP) katak, arguidu na’in-rua halo konvokatóriu ho Xefe Suku lima hamutuk ho komunidade ne’ebé afeita hosi konstrusaun kampu aviasaun provizóriu iha Postu Ataúro, no liu hosi enkontru hirak ne’e maioria to’os na’in konkorda atu hasai sira nia ai-horis, maibé husu atu indemniza ai-horis mak hanesan hudi, nu’u, has, sabraka, goiavas, rumaun, ai-ata, ai-dila, kulu, derok, ai-teka no ai-kameli ne’ebé antes ne’e sira kuda iha kintál.

Iha loron 04 Janeiru 2014, Ministëriu Saúde liu hosi Servisu Distritál Saúde Dili (SDS) entrega osan subsidiu ho montante $5.700, ba arguidu na’in-rua hodi fahe ka distribui ba uma-ka’in ne’ebé afetadu hosi konstrusaun kampu aviasaun temporáriu iha Ataúro ho totál uma-ka’in 44.

Iha loron 06 Janeiru 2014, arguidu na’in-rua hamutuk ho Eis Xefi Suku Beloi no Xefi Suku Villa Maumeta, realiza enkontru ho familia 44 afetadu hodi diskute kona-bá mekanizmu distribusaun osan no fos tonelada tolu ne’ebé atu distribui ba familia hirak ne’e.

Bazeia ba rezultadu enkontru refere, konsege kria mekanizmu distribuisaun osan no fos subsidiu ne’e bazeia ba to’os nia medida no volume ai-horis no afeta tanba ne’e arguidu sira deside kada uma-ka’in sei hetan osan $120 no fos saka rua ba familia 44, maibé ba kategoria hirak ne’ebé halo to’os bo’ot sei hetan $300 kada uma-ka’in.

Advertisement

Hosi lista pagamentu ba familia 44 identifika katak iha familia tolu mak la simu osan subsidiu ne’e mak hanesan Plasidio Lisboa, la simu osan ho montante $300, Virgilio Hornai ho montante $200 no Alcina Babtista la simu $120, nune’e totál subsidiu ne’ebé uma-ka’in tolu la simu hamutuk $620 no fos saka neen.

Alende ne’e iha uma-kain hanesan Diogo Soares Alves la simu mos osan ho montante $120, Fernando da Conceiçao simu deit fos maibé la simu osan $120, Norberto Soares la simu osan $120, Paulina Araújo Tilman simu deit $20 falta $100.

Tanba ne’e, totál osan ne’ebé arguidu sira la selu hamutuk $1.080, inklui uma-ka’in rua hanesan Cleopas Torne no João Babtista ne’ebé naran laiha lista subsidiu.

Osan ho montante $1.080 ne’ebé arguidu sira la halo pagamentu ba uma-ka’in neen ne’e, arguidu sira la devolve hikas ba kofre Estadu, maibé rai de’it iha uma durante tinan lima hodi uza ba partikular no foin entrega osan ho montante $620 ba MP iha loron 23 Dezembru 2019 falta $460 mak seidauk devolve ba kofre Estadu.

Alende ne’e, iha loron 2 Maiu 2014 arguidu Manecas da Conceição Soares nu’udár Administradór Postu Ataúro liu hosi enkontru ho to’os-na’in ne’ebé afeta hosi projetu loke Estrada foun iha área suku Beloi ba kampu aviasaun Ataúro katak sei laiha indemnizasaun ba ai-fuan no ai horis no arguidu uza nia poder autoriza ekipamentu pezadu hosi MOP hodi suru no kee sai ai horis no aifuan komunidade nian.

Advertisement

Tanba ne’e, iha uma-ka’in rua hanesan Paulo de Arújo Saldanha no António Saldanha mak la konkorda ho desizaun arguidu nian tanba prezudika uma-ka’in rua ne’e nia hudi hamutuk 244 mak hetan estragus to’o agora laiha indemnizasaun.

Arguidu na’in-rua hatene katak osan subsidiu ne’ebé Ministeriu Saúde entrega ho finaliddde atu rekompensa ai-han no ai-horis ba kada uma-ka’in hamutuk 44 ne’ebé hetan estragus impaktu hosi projetu konstrusaun provizóriu kampu aviasaun Ataúro.

Ho hahalok arguidu nain-rua nian hamosu prezuizu ba komunidade nia ai-horis, tanba ne’e MP akuza arguidu nain-rua ba pratika krime pekulatu no abuzu de poder ne’ebé previstu iha artigu 295 no 297.

Audiénsia julgamentu prezide hosi juiz kolektivu Alvaro Maria Freitas, José Gonçalves, Argentino Nunes, MP reprezenta hosi Prokuradór Rogerio Viegas no arguidu hetan asisténsia legál hosi Defensór Públiku Nelson Borges.

Jornalista: Carmelita Isaac

Advertisement