Hatutan.com, (28 Fevereiru 2022), Díli—Centro Nacional Chega!I.P asina Akordu Servisu Hamutuk (ASH) ho Asosiasaun Eis Prizoneiru Politika (ASSEPPOL) no Asosiasaun Vitima Konflitu Politika 1974-1999 hodi apoiu $88.900 ba operasionalizasaun no atividade asosiasaun.

Serimónia asina Akordu Servisu Hamutuk (ASH) entre Centro Nacional Chega!I.P ho Asosiasaun Eis Prizoneiru Politika (ASSEPPOL) no Asosiasaun Vitima Konflitu Politika 1974-1999 hodi apoiu $88.900 ba operasionalizasaun no atividade asosiasaun. Foto/CNC.

Hosi montante orsmanetu ne’e, primeiru apoiu ASSEPOL totál $42.100 no Asosiasaun Vitima Konflitu Politiku 1974-1999 totál $46.800.

Notisia iha Relasaun:CNC Prezerva Arkivu Istóriku 55.000-Liu

“Akordu tinan ida-ne’e nu’udár kontinuasaun ba akordu ne’ebé la’o tiha ona iha tinan hirak liu bá. Iha tinan ida-ne’e Centro Chega! kontinua hatudu kompromisu atu kontinua apoiu operasionalizasaun ba organizasaun rua ne’e,” Diretór Ezekutivu Centro Chega!, Hugo Maria Fernandes hateten iha salaun enkontru Centro Chega! Antigu Comarca Balide, Díli, Segunda (28/02/2022).

Centro Chega! kontinua fó apoiu ba asosiasaun rua ne’e, atu bele kotinua hala’o sira nia servisu Serkretariadu nian no mós apoiu halo atividade sira ne’ebé iha terrenu.

Akordu ne’e hala’o tanba bazeia ba proposta ne’ebé mak ASSEPPOL no Asosiasaun Vitima Konflitu Politik 1974-1999 hatama ba Centro Chega! iha tinan 2022.

Centro Chega! atribui apoiu ne’e liu hosi Orsamentu Jerál Estadu (OJE) nian no orsamentu ne’e tama iha transferénsia públika.

Koordenadór Asosiasaun Vitima Konflitu Politika 1974-1999, Domingos P. de Araújo Moniz agradese Centro Chega! ba Asosiasaun Vítima Konflitu Politika 1974-1999 liu hosi hatama proposta ba Centro Chega!.

Tinan ida-ne’e Asosiasaun Vítima Konflitu Politika 1974-1999 sei rekruta ema na’in-tolu mak hanesan, Manajer Programa, Asisten Administrasaun no finansas no Asisten Inkluzaun.

“Agradese wa’in tebes tanba instituisaun ida ne’e hetan apoiu hanesan ne’e, funsionamentu Sekretriadu nasion’al no osan ne’e hanesan ran ba movimentu sekretariadu nian,” nia agradese.

Diretór Ezekutivu ASSEPPOL, Martinho R. Pereira mós agardese ba Centro Chega! ba apoiu ASSEPPOL iha tinan ida ne’e, tanba ASSEPPOL mós sei halo rekrutamentu ba funsonáriu ida tán oinsá hala’o servisu iha Relasaun Esterna.

Osan ne’ebé Centro Chega! fó ba ASSEPPOL parte ida mós atu apoia área kapasitasaun no atividade realizasaun asembleia jerál iha tinan ida ne’e, nune’e buat hotu-hotu la’o tuir regra.

Enkuantu, selebrasaun ASH akompaña hosi Fiskál Úniku, Diretór no Xefe Departementu sira iha Centro Chega!.

Jornalista: Vito Salvadór