Hatutan.com, (07 Marsu 2022), Díli—Kandidatu Prezidente Repúblika (PR), períudu 2022 to’o 2027, Constâncio Pinto “Terus”, espresa nia sentimentu triste ho kondisaun estrada ne’ebé aat, ba knua moris fatin Proklamadór RDTL Saudozu Francisco Xavier do Amaral, iha Suku Caimauc, Postu Administrativu Turiscai, Munisípiu Manufahi.

Kandidatu Prezidente Repúblika Constâncio Pinto “Terus”, hala’o diálogu ho komunidade iha Suku Caimauc, Postu Administrativu Turiscai, Munisípiu Manufahi, Segunda (08/03/2022). Foto/Ekipa Susesu Constâncio Pinto.

Kandidatu PR ho númeru sorteiu 11 ne’e afirma, nasaun ne’e ukun aan tinan barak ona, maibé kondisaun dalan sira iha territóriu nasionál to’o oras ne’e barak mak sei aat, tanba governu seidauk tau atensaun másimu hodi hadi’a estrada sira.

Notisia iha Relasaun:Alkatiri ho Lú Olo Promete Atu Lori Libertasaun Foun Mai Timor

“Iha ha’u nia afirmasaun politika maka, enkuantu povu iha Turiscai fó fiar ba Prezidente Repúblika, ha’u sei esforsu atu implementa liafuan Proklamadór TL avo Xavier nian katak, hamaran povu nia matan-been no hapara povu nia terus,” Hatutan.com sita deklarasaun politika hosi Kandidatu PR, Constâncio Pinto nian, iha komunikadu Segunda (07/03/2022).

Advertisement

Kandidatu ne’e iha mehi ne’ebé bo’ot ba foinsa’e Timoroan sira ne’ebé mak hakarak atu transforma sira nia an sai ema matenek hodi dezenvolve Timor-Leste sai nasaun dezenvolvidu hanesan mós nasaun dezenvolvidu sira seluk.

“Enkuantu povu fó podér ba Prezidente Repúblika, iha nia kna’ar Presidensiál nia sei tau prioridade aas liu ba edukasaun liuhosi nia influensia nu’udár Prezidente da Repúblika sei servisu hamutuk  ho governu ne’ebé de’it mak ukun, nune’e bele haruka estudante ho kuantidade bo’ot ba eskola iha nasaun dezenvolvidu sira hanesan alternativa ida ba nasaun nia futuru,” nia hateten.

Kompromisiu iha kampaña katak, nasaun haruka nia ema ba eskola ne’e la’ós despezas, maibé retornu ida ba kurtu prazu no longu prazu nian.

Bainhira eleitu, durante mandatu sei rona barak liu hosi povu no tun direta hodi haree realidade saida mak povu enfrenta.

Hanesan Prezidente Repúblika sei kria mós diálogu ho lider nasionál sira inklui órgaun soberania sira iha nasaun ne’e hodi  hametin estabilidade, paz no dame ba povu.

Advertisement

Diálogu ne’e la’o ho susesu tanba hetan observasaun direta hosi observadór nasionál no internasionál inklui hetan mós seguransa hosi membru Polísia Nasionál Timor Leste (PNTL).

Jornalista: Rogério Pereira Cárceres