Hatutan.com, (16 Marsu 2022), Dili-Polísia Nasionál Timor-Leste (PNTL) liuhosi Unidade Tránzitu Nasionál no Munisípiu Dili, halo apreensaun ba patrímoniu Estadu (Motór) ida ne’ebé kondús husi apoiante ida ne’ebé hatais kamiza Kandidatu Prezidente Repúbliku (PR), Francisco Guterres “Lú Olo iha área Rotunda Prezidente Nicolau Lobato, Comoro, Dili.

Notísia iha Relasaun: PNTL Halo Apreensaun Ba Motorizada 108 husi Simpatizante CNRT

Motór Estadu ne’ebé PNTL halo apreensaun iha ámbitu kampaña ikus kandidatu PR Francisco Guterres “Lú Olo” iha Dili, 16 Marsu 2022. Foto/Hatutan.com

Apoiante ho atributu kandidatu PR Lú Olo nian ne’e kondus motor Estadu marka KLX, Xapa matrikula 0207 GA, bainhira tama iha liña laran konvoi apoainte, miitante no simpatizante partidu FRETILIn nian ho dirasaun husi kapital Dili atu liu ba fatin konsentrasuan kampaña Kandidatu PR Lú Olo nian iha Tasi Tolu.

Hafoin halo tiha apreensaun ba motorizada ne’e, PNTL  transporta kedan ba tránzitu nasionál, iha kuartel jerál PNTL, Caicoli, Dili, hodi prosesa tuir lei ne’ebé vigóra.

Oráriu kampaña eleitóral ne’ebé estabelese hosi Comissăo Nacionál de Eleições (CNE) katak, iha Kuarta (16/03 2022) kandidatu PR ho númeru sorteiu 08, Tito Cristóvăo da Costa “Lere Anan Timur”, hala’o mós nia kampaña ikus iha Kampu Futeból Igreja Maria Auxiliadora, Kampung Baru, Comoro.

Kandidatu ho númeru sorteiu 06, Francisco Guterres “Lú Olo”, hala’o iha Tasi Tolu no kandidata Armanda Berta dos Santos, ho númeru sorteiu 09, hala’o kampaña iha Kampung Alor, Dili.

Segundu Komandante PNTL Munisípiu Dili, Superintendente, João Sancho Pires, hateten, atividade operasaun ne’e ho objetivu atu bele kontrola movimentu sidadaun sira nian, liu-liu apoiante sira hosi kandidatura PR nian ne’ebé vióla regra tránzitu nian.

Superintendente Polísa João Sancho Pires informa, durante operasaun ne’e, konsege prende motorizada balu hosi apoiante sira balu, tanba utiliza motór laiha espellu, la uza kapasete no  laiha xapa matrikula.

Motó privadu balun ne’ebé mós PNTL halo apreensaun tanba viola Lei Kodígu Estrada Foto/Hatutan.com

“Operasaun ita la’o nafatin hela, ita ohin ne’e, operasaun ita másimu hotu, ita-nia forsa hotu-hotu ne’ebé mak ita hatuun hela  para atu bele asegura estabilidade iha Dili laran,”  nia informa.

Segundu Komandante PNTL Munisípiu Dili ne’e afirma operasaun PNTL  nian ne’e hala’o ba kandidatu atividade kampaña kandidatu PR hotu-hotu, iha ámbitu kampaña ikus eleisaun prezidensial ninian iha Dili laran.

Observasaun Hatutan.com iha terrenu nota, durante atividade pasa revista, iha apoiante balu hosi kandidatu “Lú Olo” nian diskute malu ho membru PNTL hosi Unidade Tránzitu sira ne’ebé hala’o hela misaun iha terrenu.

Diskusaun ne’e mosu tanba apoiante sira hosi Kandidatu “Lú Olo” nian la aseita atu PNTL hapara sira-nia komvoiu haleu kapitál Dili. Maibé, tuir informasaun ne’ebé Hatutan.com asesu katak, razaun hapara apoiante sira-ne’e, atu evita konflitu entre militante partidu ida ho seluk.

Jornalista: Rogério Pereira Cárceres