Hatutan.com, (19 Marsu 2022), Ainaro-Povu Timor Leste iha territóriu no iha diaspora, liuliu iha Austrália, Portugal, Inglaterra, Norte Irlanda ho Korea Súl, Sábadu (19/03/2022),  ezerse sira-nia direitu síviku hodi hili sira ida-idak nia kandidatura prezidente repúblika períodu 2022-2027.

Populasaun Suku Maubisse Vila forma ba vota iha eleisaun prezidensiál, 19 Marsu 2022. Foto/Hatutan.com

Iha Suku Maubisse,  Postu Administrativu Maubesse, Munisípiu Ainaro,  populasaun ka eleitór hamutuk na’in-4,000 hakat ho kontente ba sentru votasaun nudár obrigasaun síviku hanesan sidadaun di’ak hodi hili kandidatu PR ida husi na’in-16.

Populasaun Suku Maubisse ho entuziazmu forma iha liña, hanesan atu ba simu komuñaun hodi hakat ba foti bulletin votu  tuir orden ne’ebé hatuur iha kada sentru votasaun hodi ba ejerse sira-nia direitu votu ho demokrátiku.

Xefe Suku Maubesse Vila, Wilson Nivio Maria Pereira Mendonça, hateten, votu ne’e idaidak nia segredu, maibé nia fiar katak povu Maubisse sei hili Prezidente Repúblika ida  ne’ebé mak iha kompeténsia, kapasidade no besik ho povu hodi rona povu nia halerik no halo servisu ba povu.

“Dezenvolvimentu tinan 20 hahú husi restaura independénsia mai to’o ohin loron, haree katak ho situasaun polítika ida ne’ebé ladún estavel, entaun difikulta tebes ba iha dezenvolvimentu, tanba ida ne’e, futuru lideransa Timor ne’ebé povu tula fiar ba nudár PR 2022-2027 tenke sai duni autór ba promove pás, hakru’uk de’it ba Konstituisaun no  serbí povu,” Wilson hateten.

Iha sorin seluk, Komunidade  Suku Maubesse, Rui Carlos, husu ba lider sira ne’ebé mak povu fó fiar hodi sai ba Prezidente Repúblika tenke ukun ho didi’ak no ukun ho loloos atu kore povu ne’e husi ki’ak no atrazadu.

“Ha’u hakarak halo ita nia rai ne’e sai di’ak liu tan, atu ami labele vítima bei-beik,” Rui Carlos hateten.

Luciano Sarmento Soares, nudár mós abitante ida iha Suku Maubisse Vila nia votu sei la monu leet ba rai tanba kandidatu ida nia hili ne’e kompetente tebes atu lori sai povu ne’e husi nakukun durante ukun tinan lima ikus-ikus ne’e.

Suku maubesse Vila  iha aldeia hamutuk 12  ho total  populasaun 7.116.  Munisípiu Ainaro iha postu Administrativu haat(4), kompostu husi postu Administrativu Ainaro Vila, Hatubuilico, Hatu-udo no Maubesse.

Jornalista: Elio dos Santos da Costa