Connect with us

Ainaro

Jenerál Reformadu TMR Kontinua Promete, Ba Dala Ida-Ne’e Fó Empregu Ba Universitáriu Hetan Valór Exelente

Published

on

Hatutan.com, (11 Abríl 2022), Ainaro– Liu husi Plataforma Entendimentu partidu FRETILIN, Partidu Libertasaun Popular (PLP) ho partidu KHUNTO, Jenerál Reformadu Taur Matan Ruak, hamutuk ho Marí Bin Amude Alkatiri no José dos Santos “Naimori Bucar”, soe promesa ba povu atu iha fulan-Dezembru ne’e, kada uma-kain sei simu subsídiu désimu terseiru $200.00 bainhira Kandidatu Prezidente Repúblika (PR), Francisco Guterres “Lú Olo” manan iha eleisaun prezidensiál segunda volta, 19 Abríl ne’e.

Notísia iha Relasaun: Entre Horta ho Lú Olo, Desizaun iha Povu

Jenerál Reformadu Taur Matan Ruak, atuál Prezidente PLP no Primeiru-Ministru VIII Governu Konstitusional. Foto/Média Kandidatu PR Lú Olo

Sekretáriu Jerál partidu FRETILIN, Mari Bin Amude Alkatiri ho prezidente PLP, Jenerál Reformadu, Taur Matan Ruak, mós halo kompromisu ho Grupu Arte Marsiál no Arte Ritual sira, atu ajuda estabelese “padepokan” ba sira bainhira Lú Olo manan hodi kontinua asume Prezidente Repúblika ba períodu daruak nian 2022-2027.

Lider sira Plataforma Entendimentu ne’e mós halo promesa ba povu atu bele dignifika hikas eis-militár 2006 ne’ebé koñesidu ho naran “petisionáriu”.

Ba dala-ida ne’e, Jenerál reformadu ho diviza fitun-rua, Taur Matan Ruak,  promete tan katak, bainhira nia kandidatu Prezidente Repúblika (PR), Francisco Guterres “Lú Olo” mak manán iha eleisaun prezidensiál segunda volta ne’e, sei servisu hamutuk ho Governu, hodi bele fó empregu ka servisu ba estudante universitáriu sira ne’ebé hetan valór aas liu (exelente) iha universidade.

“Mellores alunu-sira iha universidade, ami mós deside para alunu-sira ne’ebé di’ak liu iha universidade, Governu ajuda sira hetan servisu,” Jenerál reformadu, Taur Matan Ruak hateten perante apoiante no militante sira partidu FRETILIN, PLP ho KHUNTO nian iha kampaña eleisaun prezidensiál ba kandidatu Lú Olo  iha Kampu Futeból, Munisípiu Ainaro, Segunda (11/04/2022).

Taur Matan Ruak hatutan, koligasaun ka Plataforma Entendimentu entre partidu FRETILIN, PLP ho KHUNTO deside mós atu fó bolsu estudu, ba alunu Ensinu Báziku Sentrál, to’o nivel Sekundáriu sira ne’ebé mak hetan valór di’ak liu, iha klasifikasaun primeiru, segundu no terseiru lugár, sei atribui prémiu ba sira, nune’e bele enkoraja no motiva liután sira badinas  estuda.

Notísia iha Relasaun: Lú Olo Promete Dezenvolvimentu Integradu ba Povu

Atuál Primeiru-Ministru  VIII Governu ne’e, afirma liután katak, daudaun ne’e, Governu ne’ebé nia lidera hamosu tán ona programa “Bolsa da Mão” jerasaun foun. Programa ida-ne’e, sei hahú uluk hosi Munisípiu Ainaro, Bobonaro, ho Oé-cusse.

Kampaña ba Kandidatu PR Fracisco Guterres “Lú Olo” iha Munisípiu Ainaro, 11 Abríl 2022. Foto/Média Kandidatu PR Lú Olo

“Ida ne’e, oinsá? La’ós hanesan ida uluk, “bolsa da mãe” ba inan sira ne’ebé isin-rua ona, fulan-fulan, nia simu $15.00. Kuandu labarik moris, nia inan la simu ona, labarik mak simu fali $20.00 to’o tinan-neen (6) mak foin para. Ne’e atu halo saida? Atu kombate má-nutrisaun iha ita nia rai-laran. Sosa manu-tolun, sosa susu-been fó ba sira. La’ós halo lia-mate, lia-moris, la’ós ida ne’e. Imi labele ba halo fali lia-mate, lia-moris,” Taur Matan Ruak esplika.

Jenerál Reformadu ne’e hatutan, sei iha programa barak tán mak nia sei halo, maibé husu povu Ainaro nia apoiu liuhosi oferese votu ba kandidatu PR Lú Olo ne’ebé nia rasik apoiu.

Maske seidauk re-eleitu ba PR períodu 2022 to’o 2027, maibé Lú Olo sujere ona ba Taur Matan Ruak, hanesan Primeiru-Ministru katak, sé bele projetu foun kona-bá subsídiu $200.00 ne’ebé antes ne’e fó ona ba kada uma-kain sira, sei akontese tán iha 2022 ba oin. Subsídiu ida ne’e, bainhira funsionáriu sira, simu gaji-13 iha fulan-Dezembru, família kada uma-kain sira mós sei simu hotu osan $200.00.

“Entaun, ita iha programa barak, programa sira ne’e para la’o, para implementa, iha kondisaun ida. No ne’e, ha’u husu ita-boot sira-nia apoiu, no ita-boot sira ida-idak, fila-fali ba ita-boot sira-nia uma, hatete ba ita-boot sira-nia inan-aman, família sira, para ajuda, tanba saida, sé ita-boot sira haree didi’ak, prezidente ho primeiru ministru, hanesan inan, prezidente hanesan aman. Ha’u uluk, aman. Agora, inan fali. Inan atu halo saida, tau matan ba ahi matan, tau matan ba dapur,” dehan Taur Matan Ruak.

Prezidente PLP ne’e dehan tán, daudaun ne’e povu hahú tama ona iha eleisaun segunda volta, no kandidatu PR na’in-rua, ida mak José Ramos Horta, ho númeru 1, ne’ebé mosu ho ‘kedan’ intensaun hakarak fokit no sobu. Maibé, kandidatu númeru 2, Francisco Guterres “Lú Olo”, mak hakarak kuda no rega.

“Rua ne’e, ida ne’ebé mak di’ak, ida rega mak di’ak. Entaun, husu ita boot sira ba apoiu ha’u nia kandidatu. Ha’u nia kandidatu mak númeru 2. Ha’u apoiu tanba, sé ita boot sira foti sala, ne’e ita problema iha ita nia rai,” Taur Matan Ruak hateten.

Jornalista: Rogério Pereira Cárceres

 

 

Kontinua Le'e
Hakarak Hato'o Komentariu?

Husik Hela Komentariu

Your email address will not be published.

Ainaro

Eleitór 4,000 iha Maubesse Vota ho Pás

Published

on

Hatutan.com, (19 Marsu 2022), Ainaro-Povu Timor Leste iha territóriu no iha diaspora, liuliu iha Austrália, Portugal, Inglaterra, Norte Irlanda ho Korea Súl, Sábadu (19/03/2022),  ezerse sira-nia direitu síviku hodi hili sira ida-idak nia kandidatura prezidente repúblika períodu 2022-2027.

(more…)

Kontinua Le'e

Trending