Hatutan.com, (22 Marsu 2022), Dili-Kandidatu Prezidente Repúblika períodu 2022-2027 ho númeru sorteiu 12, Virgílio  Guterres “Lamukan” hato’o parabéns ba Kandidatu PR na’in-rua; José Manuel Ramos-Horta ho Francisco Guterres “Lú Olo” ne’ebé hetan votu barak liu hodi kompete iha eleisaun segundu volta, 19 fulan-Abríl 2022.

Kandidatu PR 2022-2027, Virgílio Guterres “Lamukan”. Foto/Espesiál

Liuhusi deklarasaun post-eleisaun ne’ebé Hatutan.com asesu, Tersa (22/03/2022), Virgílio “Lamukan” haktuir nia mensajen hanesan tuir mai  nune’e;

Povu Timor-Lorosa’e deside ona! Maski ho taxa partisipasaun ne’ebé ki’ik-liu períodu eleitorál sira uluk, votasaun remata ona. Comissão Nacional de Eleições (CNE), fó sai ona rezultadu final prosesu apuramentu. Rezultadu ne’ebé hatudu kandidatu na’in-rua ne’ebé hetan votu barak liu sei kompete iha eleisaun volta daruak.

Parabens ba Dr. José Ramos Horta ho Dr. Francisco Guterres Lú-Olo ne’ebé konkista vote maioria husi eleitoradu sira. Maioria ne’ebé halo sira elejivel ba volta daruak. Ha’u nia votu kontinuasaun de boa e saudavel kampaña  ba segunda ronda!

Ho biban ida-ne’e ha’u hakarak sauda no kongratula povu Timor-Lorosa’e tomak ba eleisaun ida ne’ebé  em-jerál Pasífiku no ordenadu, maski iha fatin balun, liuliu sentru votasaun paralelu sira Dili, mosu dezentendimentu ne’ebé ikusmai halo sidadaun lubun labele ezerse sira-nia direitu.

Situasaun pasífiku no ordenadu iha territóriu tomak hatudu povu tomak nia konsiénsia katak ambiente dame ne’e hanesan kondisaun importante atu ezerse sira nia direitu ba vota. Kondisaun ida ba demokrasia atu buras.

Ha’u aproveita mós oportunidade ida ne’e atu sauda apoiante sira hotu ne’ebé durante fulan ida nia laran ne’e voluntáriamente hala’o servisu hodi prepara komísiu sira no hatutan hanoin sira ne’ebé sai hanesan motivu no objetivu ba ha’u nia kandidatura.

Ha’u agradese mós ba inan-feton no maun-alin sira ne’ebé simu ha’u no ekipa ho resepsaun ida hanesan ema uma laran rasik duni.

Ba inan-aman, maun-alin, no feton sira iha fatin sira ne’ebé ami la konsege hakat ba, ha’u husu deskulpa, tanba ida-ne’e mai husi limitasaun tempu badak ne’ebé la permite ami atu to’o iha fatin hotu-hotu.

Ha’u agradese ba konfiansa ne’ebé imi haraik mai ha’u liu husi imi nia votu sira. Maibé hanesan ita hotu haree katak imi nia votu sira ne’e la natoon atu lori ha’u ba Aitarak-laran.

Eleitór timoroan barak sei iha preferénsia kandidatu seluk. Ita hotu kongratula sira ba sira-nia vitória, no hein katak kandidatu ne’ebé manan ne’e sei lori duni Timor-Leste ba oin.

Ha’u enkoraja imi atu kontinua partisipa iha votasaun volta daruak ne’e hodi hili kandidatu prezidente repúblika ne’ebé imi fiar sei reprezenta imi nia aspirasaun polítika. Aspirasaun atu moris di’ak no moris hakmatek. Vota ho konsiénsia!

Ha’u hato’o mós obrigadu ua’in ba media no jornalista sira, hosi plataforma hotu-hotu, hakerek, audiovizuál, radio komunidade, Mauloko Maubisse, Rakambia, Manufahi 1912, Tokodede Liquica no Maliana, media online, ba kobertura ne’ebé halo durante ha’u nia kampaña. Maske ha’u iha ekipa ki’ik ida ne’ebé mesak voluntáriu de’it, imi nia kobertura fasilita ha’u nia hanoin sira atu halekar mós ba populasaun iha rai tomak, inklui iha fatin sira ne’ebé ami la konsege to’o.

Mai ha’u, susesu iha eleisaun ida ne’e la’ós de’it atu ha’u eleitu nudár Prezidente Repúblika, maibé mós tanba eleisaun ida ne’e fó biban ba ha’u atu iha interasaun ida besik liután ho inan-aman, maun-alin, no feton sira iha territóriu tomak, kona-ba oinsá ita bele halo Timor-Leste nasaun ida ne’ebé dezenvolvidu iha área hotu-hotu. Ha’u sei prontu atu kontinua ezersísiu ida ne’e ba oin, iha kapasidade sa ida de’it.

Ha’u nia partisipasaun iha eleisaun ida ne’e mós atu fó laran hakmatek ba líder sira husi jerasaun uluk nian, katak jerasaun foun iha ona aten brani atu dirije ita nia rai ho responsabilidade.

Karik ulu-uluk ha’u tenke hateke-sa’e hodi hakilar sai ha’u nia hanoin polítika ba sira, iha eleisaun ne’e fó biban ba ha’u atu hateke ba sira-nia oin hodi ko’alia sai saida mak ha’u nia hanoin, saida mak ha’u nia jerasaun nia hakarak kona-bá rai doben Timor-Lorosa’e nia futuru no Povu Maubere nia moris.

Rai no Povu ne’ebé juventude Loriku Asuwa’in sira defende, la’ós ho liafuan mamuk hanesan ha’u halo iha kampaña eleitorál ne’e, maibé ho fakar-ran no halekar ruin.

 Parabéns Ba kandidatu na’in 13 seluk ne’ebé  partisipa iha kontestasaun polítika ida ne’e, liuliu jerasaun foun sira. Ita-nia partisipasaun kontribui ona ba formasaun polítika ita-nia sidadaun sira.

Partisipasaun ne’ebé bele redús demagojia hosi jerasaun uluk sira durante períodu kampaña. Rezultadu eleisaun ne’e hatudu katak ita hotu tenke kontribui maka’as liután, tuir ita ida-idak nia kapasidade ba edukasaun sívika no formasaun polítika.

Sira ne’ebé iha partidu polítiku tenke halo formasaun polítika beibeik ba kuadru sira hodi bele iha kapasidade komunikativa ho povu ka eleitoradu, inklui kapasidade atu halo kampaña polítika ne’ebé edukativa. Kampaña ne’ebé eleva eleitoradu sira nia konsiénsia hodi hili kandidatu ka partidu polítiku bazeia ba programa no kompromisu polítiku atu lori moris di’ak. La’ós propaganda ne’ebé nakonu ho insultu ka atake pesoál. Atake pesoál, esplora povu nia ignoránsia no halo diskursu hodi manipula eleitoradu nia sentimentu hodi hetan vitória fasil, la’ós demokrasia. Ne’e demagojia!

Órgaun eleitorál, CNE ho STAE, tenke halo esforsu maka’as liután hodi hadi’a mekanizmu no prosedimentu sira ne’ebé durante ne’e falla, liuliu esforsu sira ne’ebé atu garante sidadaun/eleitór hotu hodi bele ezerse sira nia direitu. Taxa partisipasaun ne’ebé mínimu sai alarme emerjénsia ida ba órgaun eleitorál sira atu hadi’a-an.

Ba Dr. José Ramos Horta no Dr. Francisco Guterres Lu-Olo

Se de’it mak ikusmai eleitu nudár Prezidente Repúblika, ha’u reitera ha’u nia mensajen polítika iha kampaña. CHEGA! Ho VINGANSA POLITIKA! CHEGA ho selok-malu! Labele fó indultu ba pedófilu no estuprador/pemerkosa sira!

Tenke halo esforsu promove diálogu hodi armoniza ita-nia sosiedade no re-integra ita-nia komunidade ne’ebé nakfahe-an ba tendensia sosiu-politika oioin tanba konflitu polítika naruk.

Ba jerasaun tuan sira, iha nesesidade urjente atu tuur-hamutuk buka dalan rezolve problema residual sira hosi konflitu funu maun-alin 1974-1975 no diferensa hanoin kona-bá estratéjia no diresaun Luta Libertasaun nian. Konflitu no diferensa ne’ebé sei influensia narrativa polítika sira iha ita-nia debate polítika, inklui iha kampaña eleitorál sira.

Independénsia tenke sai biban atu konkretiza ita-nia mehi. Mehi atu halo Timor-Leste Ida Fraternu Liu tuir vizaun Estado Repúblika Demokrátika Timor-Leste ne’ebé hakerek ona iha ita nia Konstituisaun. Vizaun ne’ebé Asuwa’in Nicolau Lobato formula ho liafuan:

“Da fronteira à Lautem, de Oecusse à Jaco passando pelo Atauro, um só território, uno e indivisível, uma só Nação, uma só Pátria, um só povo com um só sentir, um só pensar, e um só desejo: Libertação da Pátria e Libertação do Povo!”

 Até eleisaun prezidensial 2027-2032

Farol, 22 marsu 2022

Virgílio da Silva Guterres ‘Lamukan’

Kandidatu PR 2022-2027