Connect with us
Pakote Ahi

Polítika

Xanana Orienta Kuadru CNRT Servisu Maka’as Ba Vitória Ramos-Horta

Published

on

Hatutan.com, (22 Marsu 2022), Dili-Maske seidauk iha rezultadu ofisiál kona-ba eleisaun ba Prezidente Repúblika,  19 fulan-Marsu 2022, husi Tribunál Rekursu (TR). Maibé, Preizdente Partidu CNRT, Kay Rala Xanana Gusmão, hasai ona alerta no orientasaun ba kuadru no militante partidu CNRT hosu husi nasionál to’o baze atu servisu maka’as hodi lori vitória ba kandidatu PR 2022-2027, José Manuel Ramos-Horta iha eleisaun segundu ronde.

Notísia iha Relasaun: Lú Olo Rejeita “Derrota” iha Primeira Ronde Eleisaun ba PR

Kandidatu PR 2022-2027, José Manue Ramos-Horta akompaña husi prezidente CNRT, Kay Rala Xanana Gusmão ho kuadru CNRT hotu halo konférensia imprensa iha Sede Nasionál ba Kandidatu Horta nian iha Hudilaran, Dili, 22 Marsu 2022. Foto/Espesiál

“Klaru, ita nia hanoin, karik bele, primeira volta, mas rezultadu hatudu tiha ona katak, ita tenke ba segunda volta. Sei kolen, loos. Mas, kolen ida-ne’e, ita sei la sente, bainhira ita hotu hanoin kona-bá objetivu ne’ebé partidu hasai, tansá mak husu José Ramos-Horta. Baibain ita ko’alia tiha ona, iha kampaña tomak nia laran, katak, atu hatuur fali Estadu de direitu demokrátiku iha ninia fatin. Ne’e duni, servisu seidauk hotu, ha’u halo apelu boot tebetebes ba estrutura tomak partidu CNRT nian, hosi nasionál ba munisípiu, inklui RAEOA, ba postu administrativu, ba suku, no ba aldeia hotu,” Kay Rala Xanana Gusmão halo nia apelu ne’e liuhosi konferénsia imprensa iha Sede Nasionál Kandidatu PR, José Ramos-Horta nian iha Hudilaran, Dili, Tersa (22/03/2022).

Ho rezultadu eleisaun ne’e, Xanana afirma, ida-ne’e mak demokrasia ne’ebé loloos, no husu ba hotu-hotu atu hein de’it, bainhira iha ona lei, iha ona buat sira hotu ne’ebé regula katak, bainhira maka sei hahú fali kampaña, bainhira maka termina hodi la’o ba eleisaun, buat sira ne’e hotu, husu ba apoiante sira hotu, atu hein de’it liafuan finál hosi CNE.

Advertisement

“Ita husu boot mós, karik iha Abríl nia laran, ladúd udan, tanba ohin temi tiha ona, maluk sira ne’ebé la konsege vota, lubuk ida, 227 mill. La konsege vota, ita hatene ona, estasaun  votu, dook hosi aldeia sira, estrada la di’ak, udan tán, ho ida ne’e maka redús tiha ita-nia kbiit atu la’o ba oin,” Xanana hateten.

Xanana dehan, sé durante fulan-Abríl mak la akontese udan, maka husu ba estrutura sira iha atu kontinua halo servisu no tenta ‘hakbesik’ maluk sira tomak ne’ebé durante la partisipa iha vota ne’e, atu bele tuir mós vota iha eleisaun segunda volta ne’ebé atu mai.

Xanana husu ba kuadru sira partidu CNRT nian iha baze atu esplika ba populasaun tomak kona-bá nia (Xanana) ho CNRT hakarak hili José Ramos Horta nudár kandidatu ba PR, tanba importante tebetebes ba rai ida-ne’e, atu hatuur fali konstituisaun iha nia fatin, no konsolida estadu de direitu demokrátiku.

Kay Rala Xanana lori naran partidu CNRT nian hato’o parabéns ba kandidatu PR José Ramos-Horta tanba hetan tiha pozisaun ida ne’ebé ás tebes no  tuir Xanana, rezultadu ida-ne’e, hodi temi ona ba povu katak, agora oportunidade ba povu tomak atu hili ho konsiénsia entre opsaun rua ne’ebé CNRT sempre temi iha kampaña eleitorál.

“Estraga nafatin ita nia estadu de direitu demokrátiku hodi ba ditadura ka ita hadi’a tiha krize ida-ne’e, hodi hatuur fali Konstituisaun no hametin estadu de direitu demokrátiku. Ne’e duni, ita husu boot katak, segunda volta mai, buat hotu sei la’o ho kalma, estabilidade nia laran,” hateten Xanana.

Advertisement

Maske durante iha kampaña eleitorál liubá, iha insidente oioin ne’ebé mós akontese to’o eleisaun,  maibé Xanana husu boot ba ema hotu-hotu atu bele halakon tiha posibilidade baku malu, oho malu, hamenus tiha posibilidade ba ataka iha estasaun sira votu nian, tanba povu nia votu ne’e, la’ós hanesan buat ida ba sosa netik buat ruma.

Xanana konsidera povu nia votu ne’e, importante tebetebes, tanba ne’e mak hodi povu tuu iha referendum 1999 TL sai tiha ukun aan ne’e.

Ikus liu, nu’udár prezidente ba partidu CNRT, Xanana hato’o nia apresiasaun ba esforsu tomak hosi estrutura hotu, hosi nasionál to’o munisípiu 12 no RAEOA, Postu Administrativu, Suku, no Aldeia sira. Klaru katak, iha demokrasia nia laran, iha tinan hirak akompaña ona partidu rasik nia atividade sira.

Ramos-Horta Agradese

Iha okaziaun ne’e, Kandidatu PR ho númeru sorteiu 14, José Manuel Ramos-Horta hato’o agradese ba lider no kuadru sira partidu CNRT nian iha Timor-Leste ne’ebé fó ona konfiansa ba nia hodi simu kna’ar nu’udár prezidente repúblika.

Advertisement

“Ha’u nia liafuan uluk mak ne’e, imi nia konfiansa, no fó todan ba ha’u, atu kaer prezidénsia repúblika, ne’e ezije hosi sé mak fó responsabilidade ba ida-ne’e. Portantu, obrigadu ba imi nia fiar no ha’u bele ezekuta misaun ida ne’e tuir konstituisaun no ho Nai Maromak nia tulun,” Ramos Horta hateten.

Horta haree katak, durante kampaña iha semana rua nia laran, iha sakrifísiu boot no la’ós  de’it hosi lider nasionál sira CNRT nian, maibé haree iha munisípiu, postu administrativu, suku  to’o aldeia no bairru sira.

“Iha fatin hotu-hotu, ema simples, ema kiak, naran nunka sai iha média, oin nunka sai iha televizaun. Portantu, ba sira hotu-hotu ha’u agradese,” Horta hateten tán.

Alende ne’e, Horta hato’o mós nia agradesimentu ba partidu polítiku sira hotu-hotu hanesan, PST, Frenti-Mudansa, PATIFOR, UDT, ASDT, PDC, no PR, ba movimentu polítiku sira hotu-hotu ne’ebé labele temi ida-idak, no mós ba Grupu Arte Marsiál (GAM), Arte Ritual Sira, apoiante sira tomak, no povu Timor-Leste tomak ne’ebé apoiante ona nia kandidatura ba Prezidente Repúblika (PR), periudu 2022 to’o 2027.

Benvindu ba Parpol Ne’ebé Hakarak Ramos-Horta

Advertisement

Kandidatu Prezidente Repúblika (PR), José Manuel Ramos-Horta, fó ninia benvindu ba Partidu Polítiku (Parpol) sira ne’ebé ho inisiativa hakarak atu fó apoia ba ninia kandidatura PR, hodi hasoru eleisaun prezidensiál iha segunda volta ne’ebé tuir oráriu hosi Sekretariadu Tékniku ba Administrasaun Eleitorál (STAE) katak, bele realiza  iha loron 19 fulan-Abríl, tinan ne’e.

Horta hatutan, ida ne’e mak demokrasia, polítika ne’e dinámiku, hanesan ezemplu, uluk 2007, akontese eleisaun segunda ronda entre nia ho Francisco Guterres “Lú Olo”. Iha ne’ebá, molok hakat ba eleisaun, sira simu kontaktu oioin hosi partidu sira hotu-hotu ne’ebé hakarak duni apoia ninia kandidatu iha momentu ne’ebá.

Horta seidauk bele pronúnsia buat ruma kona-bá kontaktu polítiku hosi partidu sira atu fó apoia ba nia, maibé Horta soe-lia “piada” katak, lakohi hanesan ho ema balu ne’ebé dadeer de’it ba ona dere odamatan ka portaun iha ema ninia uma.

“Depois, ha’u mós lakohi dadeer sedu kedas ba ema nia portaun. Média sira ne’e malandru, depois hasai kedas video, publika kedas. Ita atu han ai-farina pedasuk ida ho viziñu mós labele,” Horta hateten ho hamnasa.

Prezidente partidu CNRT, Kay Rala Xanana Gusmão mós apoia ho saida mak Horta hateten tiha ona katak, sira sempre simu partidu sé de’it ne’ebé hakarak hamutuk ho sira avansa ba eleisaun bad ala-rua (Segunda Volta).

Advertisement

Jornalista: Rogério Pereira Cárceres

 

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

Restaurasaun Independénsia bá Dala-22, PN Husu Timoroan Tomak Halo Reflesaun

Published

on

Hatutan.com, (17 Maiu 2024), Díli—Parlamentu Nasionál (PN) liuhosi deputada bankada FRETILIN, Nurima Ribeiro Alkatiri husu timor oan tomak atu halo reflesaun bá situasaun hotu-hotu ne’ebé Timor-Leste konsege ultrapassa iha nasaun soberanu ida-ne’e.

(more…)

Kontinua Le'e

Polítika

Lider Bankada PN Deside Bolu Ministra Saúde Élia Amaral

Published

on

Hatutan.com, (16 Maiu 2024), Díli– Parlamentu Nasionál (PN) liuhusi Sekretária Meza Parlamentár, Deputada Virgina Ana Belo, informa rezultadu reuniaun bankada, deside sei halo plenária estraordinária iha  Kuarta,  22 fulan-Maiu 2024, hodi bolu Ministra Saúde (MS), Élia A.A dos Reis Amaral, atu buka solusaun bá problema saúde ne’ebé daudaun ne’e akontese iha Timor-Leste.

(more…)

Kontinua Le'e

Polítika

Governu Seidauk Aprezenta Lista Kandidatu Komisáriu CAC

Published

on

Hatutan.com, (16 Maiu 2024), Díli– Parlamentu Nasionál liuhusi Sekretária Meza Parlamentár, Deputada Virgina Ana Belo hateten, Governu seidauk submete lista kandidatu komisáriu foun bá Comissão Anti-Corrupção (CAC) hodi hakat bá eleisaun. 

(more…)

Kontinua Le'e
Advertisement

Trending