Hatutan.com, (25 Marsu 2022), Díli-Monitorizasaun, supervizaun no akompañamentu  Conselho de Imprensa (CI) de Timor Leste nian durante kampaña ba eleisaun Prezidente Repúblika nian, husi loron 02 to’o loron 16 fulan-Marsu ne’e, nota órgaun komunikasaun sosiál ka mídia ho jornalista balun komemete infrasaun hasoru kódigu étika jornalístika nian.  

Notísia iha Relasaun: CI-UNDP Fasilita Jornalista Kobertura iha Eleisaun Prezidensiál Liuhusi “Media Bus-Tour”

Konférensia Imprensa husi CI, 25 Marsu 2022. Foto/Hatutan.com

Liuhusi konferénsia imprensa ne’ebé hala’o iha salaun CI, Konta-Boot, Dili, Sesta (25/03/2022), mezmu CI la informa detallu jornalista no mídia ne’ebé maka komete infrasaun étika jornalístika nian, maibé CI adianta katak sira sei fó notifikasaun ba pesoál jornalista ho mídia sira  ne’ebé komete infrasaun Étika no infrasaun ba Matadalan Reportajen Eleitorál ba Jornalista no Meiu Komunikasaun Sosiál sira.  

CI kontinua hato’o apresiasaun ba meiu komunikasaun sosiál sira no jornalista hotu-hotu, tantu mídia imprime, online no mídia eletrónika nia kontribuisaun no servisu tomak iha períodu akompaña polítika to’o loron votasaun iha 19 Marsu liubá.

CI observa katak maske ho limitasaun oioin iha kontestu kobertura nian, maibé nafatin publika notísia no programa importante no relevante sira hodi hakonu públiku nia direitu atu asesu informasaun.

Cl halo monitorizasaun no halo análize ba produtu jornalístika meiu komunikasaun sosiál sira nian iha kontestu kobertura no publikasaun bazeia ba Lei Komunikasaun Sosiál, Kódigu Étika Jornalístika no prinsípiu jornalizmu universál.

Cl mós halo monitorizasaun ba aktu no atitude jornalista sira-nian iha mídia sosiál bazeia ba Matadalan Mídia Sosiál ba Jornalizmu no Matadalan Reportajen Eleitorál ba Jornalista no Meiu Komunikasaun Sosiál.

Prezidente Interinu CI, Expedito “Loro” Diaz Ximenes hateten, kobertura no publikasaun notísia, programa no reportajen direta (live streaming) husi meiu komunikasaun sosiál balun iha períodu kampaña polítika la fó biban  halo balansu ba kandidatu hotu-hotu, maibé barak-liu foka de’it ba figura boot sira no kandidatu sira ne’ebé hetan apoiu husi partidu polítiku sira.

Iha mós notísia balun ne’ebé Cl konsidera sensasionál no provokativu ne’ebé la kontribui ba pás no estabilidade iha rai-laran tamba nakonu ho opiniaun jornalista ka editór nian, ne’ebé iha indikasaun hanesan propaganda polítika iha períodu kampaña eleisaun prezidensiál nian.

“CI mós identifika notísia meiu komunikasaun sosiál nian balun ne’ebé la sensivel jéneru tuir papél jéneru iha kontestu kobertura no publikasaun relasiona ho loron votasaun,” Expedito Dias Ximenes hateten.

Durante monitorizasaun, CI mós identifika jornalista balun halo promosaun ba kandidatu sira liu husi fahe-tutan informasaun no matéria sira kampaña polítika nian no halo komentáriu ne’ebé ho tendénsia fó apoiu ba kandidatu hira ne’e iha sira nia konta mídia sosiál (Facebook).

“CI dei notifika ka bolu atensaun ba meiu komunikasaun sosiál no jornalista sira ne’ebé komete infrasaun hasoru Kódigu Étika jornalístika, Lei KomSos, Matadalan Reportajen Eleitorál no Matadalan Mídia Sosiál ba Jornalizmu,” Expedito Diaz Ximenes hateten.

Biban ne’e, Diretór Ezekutivu CI, Rigoberto Monteiro hateten, CI seidauk bele fó sai númeru mídia sira ne’ebé komete infrasaun ne’e tamba sei aprezenta ba ekipa jurídiku sira atu haree mídia hirak ne’ebé identifikadu bazeia ba rezultadu monitorizasaun ne’ebé CI halo  ho nia infrasaun ne’e to’o iha ne’ebé no kontra prosedimentu saida-saida no nia nivel ne’e oinsá, molok aprezenta ba iha plenária CI.

 “sansaun ba órgaun komunikasaun sosiál sira tuir lei iha rua; ida mak sansaun administrativa no ida seluk mak koima, maibé to’o oras ne’e ita seidauk aplika koima tanba dekretu lei kona-bá koima seidauk aprova,” Rigoberto Monteiro hateten.

Membru CI, Otelio Ote afirma tan, saida mak CI halo atu garante produtu jornalístika ida ne’ebé independente no la halís ba ema ida.

“Nudár sidadaun, ema hotu livre tuir lei, maibé mós hanesan ema ho profisaun jornalista iha limitasaun balun ne’ebé tuir lei tanba ne’e tenke hakaruk atu asegura independénsia editoriál. CI nia papél mak halo monitorizasaun ba produtu jornalístika no asegura independénsia husi media no jornalista sira nian,” Otelio Ote hateten.

CI sei fó sai rezultadu no dadus husi órgaun komunikasaun sosiál no jornalista sira ne’ebé komete infrasaun durante kampaña eleisaun prezidensiál uainhira ekipa jurídiku remata ona verifikasaun no aprova ona iha plenária CI.

Jornalista: Vito Salvador