Hatutan.com, (27 Marsu 2022), Dili—Konferénsia nasionál Partidu Libertasaun Populár (PLP), Domingu  (27/03/2022), iha Salaun Canossa, Has-Laran Dili, deside no reafrima pozisaun PLP ho Taur Matan Ruak nian hodi apoia kandidatu Prezidente Repúblika, Francisco Guterres “Lú Olo” iha eleisaun segunda volta, 19 Abríl 2022.

Notísia iha Relasaun: Apuramentu Nasionál, Horta Votu Barak liu no Ángela Freitas Oitoan liu

Kanddiatu PR 2022-2027, Francisco Guterres “Lú Olo”. Foto/Media Kandidatu PR Lú Olo

Prezidente PLP, Taur Matan Ruak, deklara, PLP hamutuk ho FRETILIN no partidu KHUNTO lori Lú Olo manán iha eleisaun segunda volta.

“Ita hotu mantein ita-nia pozisaun tenke asegura ita-nia ukun to’o tinan 2023 no fó vitória ba Lú Olo iha eleisaun ba Prezidente Repúblika iha segunda volta ne’e,” Taur Matan Ruak afirma.

Advertisement

Hatán ba jornalista sira kona-bá Isabel da Costa Ferreira nudár prezidente PLP, Taur Matan Ruak nia kaben ne’ebé ba ona apoia Kandidatu Prezidente Repúblika, José Manuel Ramos-Horta iha eleisaun segundu volta ne’e, Taur Matan Ruak rasik, ne’ebé akompaña husi kuadru PLP sira seluk tán,  ho hamnasa lia tun dehan, demokrasia mak nune’e.

“Ha’u hatudu demokrasia mai nanis husi família laran.  Ha’u nia família barak mak relijiaun Kristaun Protestante no ami lubun mós mak Kristaun Katóliku. Ha’u hatudu demokrasia ne’e husi ha’u nia uma-laran mak mai,” Taur Matan Ruak hateten.  

Liuhusi konferénsia nasionál PLP nian ne’e, partidu tolu kompostu husi PLP rasik, partidu FRETILIN ho partidu Kmanek Haburas Unidade Timoroan (KHUNTO) reafrima sira-nia apoiu Kandidatu Franicscu Guterres “Lú Olo” hakat tán dala ida ba Prezidente Repúblika períodu 2022-2027.

 “Ami sei habelar tán plataforma ida-ne’e husi partidu tolu; FRETILIN, PLP ho KHUNTO  ba  apoiu Lú Olo sai kandidatura nasionál ida,” Sekretáriu Jerál partidu FRETILIN, Mari  Bin Amude Alkatiri, lia tun ba jornalista sira bainhira partisipa konferénsia nasionál PLP nian ne’e.

Pozisaun hanesan mós afirma husi Konselleiru Másimu Partidu KHUNTO, José dos Santos “Naimori Bucar”, hodi dehan, partidu tolu ne’e kontinua hamriik hamutuk no bele dehan soe malu ladi’ak. Nune’e, kontinua apoiu Lú Olo atu asume tán dala ida pasta Prezidente Repúblika 2022-2027.

Advertisement

Molok ne’e, Kandidata Prezidente Repúblika (PR)  ho númeru sorteiu 01, Isabel da Costa Ferreira, deside ona hodi lori apoiante hosu ne’ebé apoia nia iha eleisaun primeira volta, 19 Marsu 2022, atu  fó apoiu totalmente ba kandidatura PR, José Ramos Horta ho iha eleisaun PR segunda volta.

Dadus provizóriu husi  Sekretariadu Tékniku Administrasaun Estatál (STAE) ho Komisaun Nasionál Eleisaun (CNE, sigla portugés) ba apramentu nasionál hatudu katak Kandidatu Prezidente Repúblika, José Manuel Ramos-Horta, kontinua lidera ho total   votu 301.481 (46,58%) no Kandidatu Prezidente Repúblika, Francisco Guterres “Lú Olo” ho votu 143.408 (22,16%).

Jornalista: Rogério Cárceres/Vito Salvador

Advertisement