Hatutan.com, (05 Abríl 2022), Díli-Autoridade Munisípiu Díli (AMD) husu ba komunidade iha kapitál Dili atu bele ajuda Estadu hamoos netik uma-ninin hodi evita inundasaun iha tempu udan no evita moras dengue.  

Notísia iha Relasaun: Fatór Lima Ne’ebé Sai Kauza Prinsipál Ba Inundasaun iha Dili

Kamionata ne’ebé hetan kontratu hosi kompañia Felifra Viham Unipesoal Lda, hodi rekolla lixu iha área Kampung Baru, Comoro. Foto/Hatutan.com.

AMD mós husu ba komunidade sira atu ho konsiénsia soe lixu sira iha fatin lixu nian. Nune’e, ajuda parte sira ne’ebé Estadu kontrata foti lixu  iha lixu fatin.

Atu asegura sidade Díli moos, organizadu no saudavel, autoridade Munisípiu Díli hasai dekretu lei nú. 33/2008, loron 27 fulan-Agostu ne’ebé ko’alia kona-bá ijiene orden públiku.

Liu husi dekretu lei ne’e autoridade Munisípiu Díli husu atu komunidade sira atu labele fakar fo’er ka soe fo’er arbiru iha fatin públiku, lori fo’er ba tau iha lixeiru ne’ebé autoridade munisipál prepara no komunidade no entidade hotu iha autoridade Munisípiu Díli.

Bainhira komunidade sira la kumpre lei refere maka sei simu sansaun tuir artigu 9 husi dekretu 33/2008 ne’e rasik.

Xefe Departamentu Saneamentu Díli, Domingos dos Santos Soriano, ba Hatutan.com iha nia knar fatin Matadoru, Díli, Tersa (05/04/2022), hateten jestaun ba lixu iha sidade Díli la’ós autoridade munisipál nia servisu mesak, maibé servisu hamutuk ho governu sentral liuliu ministériu sira relevante hanesan, Ministériu Administrasaun Estatál (MAE) ho Ministériu Saúde (MS) organiza limpeza jerál iha kada sesta hodi halibur fo’er sira no lori ba tau iha fatin lixeiru ne’ebé governu prepara no kontinua transporta ba lixeiru Tibar. 

Autoridade Munisípiu Díli iha obrigasaun atu prepara  fatin lixu, nune’e komunidade sira mós iha obrigasaun moral atu lori fo’er ne’ebé sira halibur iha sira nia uma hodi ba tau tuir orden ka oráriu soe fo’er nian. Nune’e labele prejudika servisu saneamentu Munisípiu Díli nian.

“Ami hasai sirkulár hodi regulariza aktu komunidade nian hodi soe fo’er tuir oras no iha fatin ne’ebé Governu prepara, maibé ita-nia komunidade dalaruma susar atu kompriende no halo tuir,” Domingos Soriano hateten.

Impaktu husi komunidade sira soe fo’er arbiru halo komunidade sira ne’ebé hela iha área sira fasil ba inundasaun hanesan Suku Caicoli, Mascarenhas no Balide Raihun tenke simu konsekuénsia tamba fo’er hirak ne’ebé komunidade fakar no soe iha valeta no bee dalan inklui sira ne’ebé soe iha foho lolon sira. bee lori mai butuk iha komunidade sira nia hela fatin no lori kedas impaktu negative ba komunidade sira-nia saúde.

Saneamentu Munisípiu Díli oras ne’e kontrata empreza hamutuk lima ne’ebé halo servisu ra’ut fo’er maka hanesan iha Postu Administrativu Dom Aleixo kontrata empreza GSA no Nelcias Lda, Postu Vera Cruz kontrata empreza Felifra Lda, Postu Nain Feto kontrata empreza Zacrilo no Postu Cristo Rei kontrata empreza Labilay ho total kamioneta hamutuk 50 ne’ebé halo operasaun no kada loron kamioneta sira ne’e sei transporta fo’er ba soe iha fatin lixeiru Tibar.

Jornalista: Vito Salvador