Hatutan.com, (07 Abríl 2022), Baucau-Sekretáriu Jerál partidu Frente Revolusionáriu ba Timor-Leste Independente (FRETILIN), Marí Bin Amude Alkatiri, promete grupu arte-marsiál hotu ne’ebé eziste iha Timor-Leste atu estabelese ka harii “padepokan” ba grupu arte-marsiál hodi fasilita sira-nia atividade.

Notísia iha Relasaun: Lú Olo Husu Baucau-oan Vota ba Nia Hodi Hametin Estabilidade no Pás

Sekretáriu Jerál partidu FRETILIN, Mari Alkatiri. Foto/Hatutan.com

Grupu arte-marsiál ne’ebé dezde tempu  Indonézia nian eziste  mai to’o  Timor ukun-an ejiste, hanesan, Persaudaraan Setia Hati Terate (PSHT), Ikatan Keluarga Silat Putra Timor-Leste (IKSPTL) Kera Sakti, Padjajaran, KORK (Kmanek Oan Rai Klaran), Parisai Diri (PD) no seluk tan.

Alkatiri dehan, bainhira kandidatu Prezidente Repúblika (PR), Francisco Guterres “L’u Olo” manán iha eleisaun prezidensiál ba segunda volta ne’e, nia parte sei halo proposta ba Governu, atu bele harii fatin treinu “padepokan” ba GAM nian, nune’e bele fasilita sira hala’o atividade treinamentu iha kondisaun ne’ebé dignu.

Advertisement

Tuir disionáriu Lingua Indonézia nian,  “Padepokan” nudár fatin ba halo meditasaun ka reflesaun espirituál ho valor sira arte-marsiál nian.

“Padepokan” ne’e rasik nudár fatin meditasaun no fatin haksimuk an liurai sira tempu antigu nian, maibé  bainhira to’o iha era modernu “Padepokan ne’e sai hanesan fatin sorumutuk no fatin treinu.

“Padepokan” ne’e rasik mai husi lingua Java katak “Ndepok”, fatin atu treinu hodi hetan kbiit, abilidade  no matenek iha mundu arte-marsiál ne’ebé hetan husi mestre-boot arte-marsiál nian (pendekar).

Iha filozofia  Java sira nian, “Padepokan” hanesan uma-boot ne’ebé harii iha área ho rai hectare boot ne’ebé kompletu ho fasilidade sira hanesan; fatin enkontru, fatin treinu, aula atu halo meditasaun, fatin  atu halo atrasaun arte-marsiál, fatin ba reza ka halo orasaun no fasilidade seluk tan hanesan hariis-fatin no saneamentu.

Liuhusi dialogu aberta ho apoiante no militante sira ba kandidatu Prezidente Repúblika 2022-2027, Francisco Guterres “Lú Olo, iha Munisípiu Baucau, Kinta (07/04/2022), Marí Alkatiri hateten, uluk, bainhira sei iha Governu anterior nia tempu, hasai rezolusaun ida, hodi deside taka tiha atividade arte-marsiál iha territóriu nasionál. Maibé, depois Oitavu Governu Konstitusionál ne’ebé FRETILIN viabilidade, hamutuk ho atuál PR Lú Olo, hodi legaliza no reativa fila-fali atividade GAM. Maske nune’e, tuir Alkatiri katak, legalidade ida ne’e, seidauk natoon.


Advertisement

“Ba sira arte-marsiál, sira ne’ebé uluk ilegál, agora legál hotu ona. Oitavu Governu, hamutuk ho Prezidente Repúblika, legaliza tiha sira hotu ona. Maibé, legalidade la to’o ne’e mak ha’u hatete iha ne’ebá, iha Gleno-Ermera. Legaliza de’it no la harii kondisaun, la to’o, tanba ne’e, ha’u nia proposta ba Governu, ba Prezidente mós, atu harii sede ba sira, no harii mós Gedung boot ida (Padepokan–red), ita bolu jináziu, iha ne’ebé sira bele halo treinu, no graduasaun iha rai-laran, ho ita nia  bandeira nasionál,” Mari Alkatiri hateten.

Alkatiri haktuir, programa kona-bá atu kondisiona atividade sira arte-marsiál nian ne’e, durante ne’e sempre hato’o ona iha fatin-fatin liuhosi kampaña eleitorál ba povu iha munisípiu hotu, tuir Alkatiri katak, dezenvolvimentu atu la’o ba oin, presiza ema hotu nia partisipasaun, tanba ne’e, labele husik ema ida kotuk. 

Kondisiona Moris Petisionáriu

Sekretáriu jerál partidu RETILIN, Marí Alkatiri mós afirma tán katak, sei ko’alia mós ho Governu, atu oinsá mak bele hadi’a kondisaun petisionáriu sira nian, ne’ebé iha 2006, sai vítima ba krize to’o ema bolu rebelde.

“Ida tán, ha’u hanoin ne’e, kamarada sira balu sei duvida ka ragu-ragu atu aseita. Tanba ha’u uluk 2006, iha grupu ida ke hetan ha’u, sira oho. Petisionáriu, loos ka lae? Krize 2006, sira hetan ha’u, sira oho. Ha’u mak dehan, sira sala. Sira mak sai vítima ba krize ida ne’e. Entaun, ita tenke hadi’a sira nia situasaun polítika, ka kondisaun ba sidadaun, direitu da sidadaun. Sira ida ne’ebé hetan sira oho, ha’u mak dehan ida ne’e,” Alkatiri promete tán.

Advertisement

Jornalista: Rogério Pereira Cárceres