Hatutan.com, (26 Fevereiru 2022), Díli– Hafoin re-eleitu ba prezidente Federasaun Futeból Timor Leste (FFTL) períodu 2022-2026, Francisco Martins da Costa Pereira Jerónimo, promete sei mellora di’ak liután dezenvolvimentu futeból no reforsa kompetisaun nivel munisipál hodi hetan fini jogadór ba selesaun nasionál.

Notísia iha Relasaun: Francisco Jerónimo Re-eleitu Ba Prezidente FFTL 2022-2026

Francisco Kalbuadi Lay, Francisco Jerónimo ho Nilton Gusmão, hatudu sira-nia amizade iha kongresu FFTL ba da-hitu iha ótel Novo Turismo, Dili, 26 Fevereiru 2022. Foto/Hatutan.com

Prezidente FFTL Francisco Jerónimo sei kontinua mellora programa sira ne’ebé halo ona iha mandatu anteriór hodi nafatin hamosu programa no atividade foun iha mandatu daruak ne’e no sei tau prioridade ba iha área infraestrutura atu futeból iha Timor-Leste lao di’ak liután tuir espetativa públiku nian.

“Reprezentante FIFA mós iha ne’e, tamba ne’e, ha’u sei halo diskusaun kle’an liu ho sira liuliu ba área infraestrutura nian,” Francisco Jerónimo hateten ba jornalista sira hafoin re-eleitu liuhusi kongresu FFTL ba da-hitu ne’ebé hala’o iha Ótel Novo Turismo, Dili, Sábadu (26/02/2022).

Iha tempu badak prezidente FFTL eleitu sei halo enkontru ho nia estrutura ezekutivu sira federasaun nian hodi hamutuk trasa planu prioridade ba tinan dahuluk mandatu nian no liuliu oinsá atu realiza promesa sira iha kampaña kongresu FFTL atu lori futeból besik liu ba asosiasaun sira no realiza kopa FFTL nivel munisipál.

“Ami nia kompromisu sira tinan ne’e la halo tinan oin ami sei realiza,” Francisco Jerónimo atuál Ministru Asuntu Parlamentár no Komunikasaun Sosiál (MAPKOMS) hateten.

Durante nia mandatu sei profesionaliza futeból no haboot paixaun ba futeból liu husi kolaborasaun di’ak ho parte hotu.

Iha parte seluk prezidente Liga Futeból Timor-Leste (LFTL), Nilton Gusmão hateten prosesu demokrasia nia rezultadu mak iha manan no lakon, nune’e nia parte kongratula prezidente eleitu no kompromete atu nafatin servisu hamutuk hodi dezenvolve futeból di’ak liután.

“Hanesan prezidente Liga, ha’u nafatin kontinua ha’u nia knar no nafatin iha kooperasaun ho FFTL atu futeból iha Timor la bele para,” Nilton Gusmão hateten.

Vise prezidente Asean Football Confederation (AFC), Francisco Kalbuadi Lay, ne’ebé mós nudár kandidatu prezidente FFTL hateten, nia parte kontinua apoiu FFTL hodi nafatin promove futeból ba mundu internasionál.

“Ha’u hateten ba prezidente eleitu no vise katak konta ho ha’u, ita lori futeból ba mundu,” Francisco Kalbuadi Lay hateten.

Prezidente kompetisaun AFC 2022 ne’e mós agradese ba parte hotu ne’ebé fó kontribuisaun ba realizasaun kongresu ne’e no agradese ba jornalista sira ne’ebé ho espíritu paixaun ba futeból hodi kanaliza informasaun ba públiku hodi nafatin asesu ba informasaun sira liga ho dezenvolvimentu futeból iha rai laran.

Jornalista: Vito Salvador