Hatutan.com, (08 Abríl 2022), Viqueque-Kampaña Kandidatu Prezidente Repúblika 2022-2027 ho númeru sorteiu rua (2), Francisco Guterres “Lú Olo” ho tipu diálogu aberta iha Kampu Futeból  Munisípiu Viqueque, Sesta (08/04/2022), la’o ho di’ak tebes. Iha kampaña ne’e, militante FRETILIN balun kestiona direitamente ba Sekretariu Jerál partidu FRETILIN, Marí Bin Amude Alkatiri kona-bá paradeiru Ró Haksolok nian.

Notísia iha Relasaun: Arsénio Promete tán Sei Finaliza Konstrusaun Ró Haksolok Uza Millaun $14  

Prezidente Autoridade RAEOA Mari Alkatiri, tempu ne’ebá akompaña hosi Bispu Eméritu Dom Carlos Filipe Ximenes Belo, SDB ho Madre Guilhermina Marçal FdCC, hala’o lansamentu ba ró Haksolok iha Portugál, Sesta (26/05/2017). Foto/Dok. ISQ.

“Husu ba Sekretáriu Jerál atu esplika di’ak liu kona-bá Ró Haksolok. Tanba sá mak to’o oras ne’e, Ró Haksolok seidauk to’o Timor,”  militante FRETILIN ida hato’o pergunta ne’e iha diálogu aberta ho Kandidatu Prezidente Repúblika, Francisco Guterres “Lú Olo”.

Rona-tiha lia hirak ne’e, Sekretáriu Jerál partidu FRETILIN, Marí Bin Amude Alkatiri  hateten, prezidente CNRT, Kay Rala Xanana Gusmão mak halo Ró Haksolok to’o ohin loron seidauk mai Timor-Leste.

Advertisement

“Ha’u hanoin devia husu ba Xanana, tanba sira mak halo kontratu ida-ne’e. Primeiru-Ministru iha tempu ne’ebá, Xanana Gusmão maka halo kontratu ida ne’e, la’ós ha’u,” Sekretáriu Jerál Marí Bin Amude Alkatiri hateten iha intervensaun.

Mari Alkatiri konta katak, Xanana Gusmão mak halo kontratu ho kompañia ATLANTICEAGLE ne’ebé mak laiha kapasidade atu halo konstrusaun ba ró ne’e.

“Ha’u simu de’it todan ne’e, hanesan prezidente autoridade, para atu hatutan de’it servisu. Iha tempu ne’ebá, komu ami kompadre ba kompadre mai, atu ajuda malu mak simu ne’e. Agora komadre laiha ona, ne’ebé la’ós kompadre ona. Simu ida ne’e. Sira halo ida ne’ebé ho lian inglés dehan door diligent, para atu hatene, sé kompañia ATLANTICEAGLE ne’e iha kapasidade ka lae, atu halo ró ne’e. Sé kompañia ne’e iha kréditu ka lae, ba iha banku sira. Lae, la halo, asina de’it kontratu,” Alkatiri haktuir tán.

Biar nune’e, Alkatiri informa katak, daudaun ne’e, liuhosi nia diresaun ba orientasaun, iha ona solusaun ba Ró Haksolok.

Notísia iha Relasaun: CAC Seidauk Hetan Delegasaun Investiga Kazu Ró Haksolok

Advertisement

Alkatiri afirma katak, 95% hosi ró ne’e, Timor-Leste mak kontrola tomak ba kompañia  ATLANTICEAGLE ne’e nia atividade sira ba konstrusaun Ró Haksolok. Daudaun ne’e, kompañia hahú ona prosesu konstrusaun ba kondisaun Ró Haksolok.

“La’ós de’it ida ne’e, ba ha’u, kuandu iha problema ida, problema ne’e, la’ós buka de’it rezolve problema ida ne’e, tenke rezolve problema ne’e, ho valór akresentadu ruma. Tanba ne’e, ita kontrola estaleiru de Coimbra, Mandego no ita-nia timoroan barak mak sei ba iha ne’ebá, atu treinu, para aban-bainrua, atu harii estaleiru ida iha Timor-Leste. Ne’e mak solusaun,” Alkatiri hateten.

Promete 2023 Ró Haksolok To’o TL

Durante diálogu ne’e, Marí Alkatiri informa ba nia kamarada sira katak, nia hetan ona kompañia balu ne’ebé mak halo hela koordenasaun ho Prezidente RAEOA, Arsénio Bano, no kompañia ne’e hakarak atu sosa fali TL nia asaun sira ne’e, sosa, no hakarak entrega ró ne’e mai TL.

“Entrega kerdizér, já konkluidu. Mas ami sei dúvida, depois tanba depois valór akresentadu ne’e laiha. Ne’e mak rezolve problema. Kamarada sira tenke akompaña istória ne’e para bele responde. Ró Haksolok, agora lao daudauk, esforsu tomak atu halo, sé bele, antes eleisaun, 2023, Ró Haksolok iha Dili ona, para atu haksolok ita hotu. Ne’e mak haksolok,” Alkatiri promete tán.

Advertisement

Ró Haksolok ne’e rasik gasta ona millaun $30,0 no tenke selu tan adisionál millaun $27 atu bele lori Ró Haksolok ne’e mai Timor-Leste.

Foin lalais ne’e, VIII Governu Konstitusionál lideradu husi Primeiru-Ministru Taur Matan Ruak, aloka tan millaun $14 atu finaliza konstrusaun Ró Haksolok no informasaun ne’ebé iha katak autoridade RAEOA uza ona  Millaun $14 ne’e hodi sosa  saham ka asaun kompañia ATLANTICEAGLE nian, inklui tau osan hodi reabilita Estaleiru Mondego.

Iha tinan 2014, Marí Alkatiri hanesan prezidente Autoridade Rejiaun Administrativu Espesiál Oé-Cusse no Zona Espesiál Ekonomia Sosiál Merkadu (ZEESM),  aposta millaun $18.52 atu hahú konstrusaun ba Ró Haksolok ne’ebé produs husi  kompañia ATLANTICEAGLE.

Jornalista: Rogério Pereira Cárceres

Advertisement