Hatutan.com, (20 Abríl 2023), Viqueque- Viqueque oan sira, liuliu hirak ne’ebé horik iha Suku Maluru-Beaço  hamutuk ho lia-na’in sira no astrónomu sira, Kinta (20/04/2023), halibur malu iha tasi-ibun Beaço, Viqueque, hodi asiste direta eklipse solar total.  

Lee Mós : Labele Hateke Direta Bá Loron-Matan Tanba Eclipse Solár Impaktu La Diak Bá Saúde

Astrónomu sira monta sira-nia aparelu atu asiste eklipse solar total iha tasi-ibun Beaço, Viqueque. Foto/Vito Salvador

Lia nain Suku Uma Uain Craik, Raitahu, Martinho Sarmento, kontente tamba tinan-ne’e eklipse solar total bele akontese iha Timor-Leste no liu-liu iha Munisípiu Viqueque, Suku Maluru-Beaço, bele iha oportunidade hamutuk ho astrónomu sira asiste direita eklipse solar total.

Nia afirma uluk iha tinan 1983 akontesimentu fulan taka loro-matan ka eeklipse  solar parsial akontese ona iha Munisípiu Viqueque, maibé komunidade sira ladún no la intende didi’ak. Maibé, agora Governu Prezidente Repúblika ho astrónomu sira halo sosializasaun ho di’ak tebes hodi komunidade sira komprende fonemonu eklipse solar total. Ho nune’e, komunidade sira ohin loron preparadu atu asiste eklipse solar total ne’e iha sira nia horik fatin ida-idak.

“Buat ida eklipse solar ne’e uluk ami nia tempu joven ne’e iha, maibé ami ladún hatene. Agora agradese tamba iha ona matenek oan barak ne’ebé esplika kle’an kona-bá eklipse solar total ne’ebé ita atu asiste oras balun tan,”  Martinho Sarmento bá Hatutan.com iha tasi-ibun Beaço, Viqueque, Kinta dadeer (20/04/2023), hale’u tuku 10:11 Otl.

Lia-na’in ne’e hatutan, fulan ida antes iha ona koñesimentu no sosializasaun hosi autoridade kompetente sira kona-bá eklipse Solar total ne’ebé sei akontese.

Astrónomu sira konsentra ona iha tasi-ibun Beaço-Viqueque. Foto/Vito Salvadór

Iha fatin hanesan eis militár Indonézia, Francisco Soares haktuir uluk iha 1983 la hetan astrónomu sira hanesan agora tamba ne’e bá tinan ida-ne’e iha Beaço oan sira asiste hamutuk ho astrónomu sira no bele hetan esplikasaun sientífika hosi astrónomu sira kona-bá fenómenu ne’e.

“Agora ita hare ema barak, matenek na’in sira mai ho sira nia sasán (ekipamentu) ne’ebé sei uza atu haree eklipse solar total ami sente kontente no di’ak,” Francisco Soares hateten.

Iha fatin hanesan komunidade Beaço, José Gomes, kontente  asiste eklipse solar total iha Beaço tamba bele lori sientista no astrónomu sira mai iha Munisípiu Viqueque espesialmente iha Suku Maluru-Beaco.

Juventude Suku Maluru-Beaço, Domingos da Silva mós kontente tamba bele haree direita fenómenu natural eklipse solar total iha Beaço.

Lia-nain no juventude sira konsentra iha tasi-ibun Beaço, Viqueque atu hamutuk ho astrónomu sira asiste eklipse solar total. Foto/Vito Salvador

Iha momentu hanesan astrónomu husi Amerikanu, Zastrow Mark James halo hela breafing no esplikasaun bá turista no komunidade sira kona-bá akontesimentu eklipse solar total no oinsá mak komunidade sira bele asiste momentu istóriku ne’e ho di’ak atu nune’e labele fó impaktu ba ema nia saúde.

Tuir observasaun husi Hatutan.com iha terrenu haree katak turista no sientista sira hamutuk ho astrónomu hosi nasaun Indonézia, Amérika, Malázia no Rúsia konsentra iha ona tasi ibun Beaço no monta sira nia ekipamentu no aparellu sira hodi bele haree eklipse solar total no komunidade sira entuziasma hodi hein eklipse solar total ne’e.

Jornalista: Vito Salvadór