Hatutan.com, (08 Abríl 2022), Díli-Tribunál Distritál Dili (TDD), hala’o primeiru julgamentu ba ba jerente na’in-rua husi  Asosiasaun East Timor Blind Union (ETBU) ho inisiál UDC no ZXL ba krime abuzu de konfiansa agravadu.

Logotipu ETBU

Arguidu na’in-rua ne’e foti karreta no komputadór Asosiasaun East Timor Blind Union (ETBU) ba rai iha uma no la fó fila ba asosiasaun.

Iha audiénsia julgamentu ne’e, arguidu UDC rekoñese karreta nia maka uza maibé uza ba nesesidade servisu, maske to’o agora karreta refere sei iha arguidu nia liman no seidauk entrega ba ETBU.

Arguidu ZXL konfirma katak loos dunik iha tempu ne’ebá nia parte maka foti komputadór ida inklui mákina imprime, maibé hodi halo relatóriu finál husi doadór ne’ebé seidauk finaliza.

Advertisement

Hafoin rona arguidu na’in-rua, Tribunal adia hikas julgamentu ba loron seluk hodi kontinua rona sasin sira.

Tuir akuzasaun husi MP katak iha tinan 2018 to’o 2022 arguidu UDC asume responsabilidade hanesan Diretór ETBU no ZXL servisu iha área finansa, maibé iha loron 26 fulan-Juñu 2020 membru husi asosiasaun ETBU eleitu fali  lezadu ho inisiál JP hodi troka arguidu tanba lakon konfiansa kona-bá ezekusaun orsamentu la tuir  programa, maibé arguidu foti karreta Hilux proprietária asosiasaun ETBU nian hodi ba tau iha nia uma no to’o agora la entrega. Arguidu ZXL mós foti komputadór ida ho mákina imprime ho marka HP iha sede asosiasaun ETBU no la entrega fali, tanba ne’e lezadu labele hala’o servisu.

Ho hahalok arguidu na’in-rua nian MP akuza ba pratika krime abuzu de konfiansa agravadu ne’ebé previstu iha artigu 257 husi kódigu penal TL.

Audiénsia julgamentu prezide husi juis koletivu Argentino Luisa Nunes, Alvaro Maria Freitas, António Gonçalves, MP reprezenta husi Prokuradór Reinato Berenahak no arguidu sira hetan asisténsia legal husi Defensor Públiku  Joao Carvalho.

Jornalista: Carmelita Isaac

Advertisement