Hatutan.com, (09 Abríl 2022), Lautem-Aldeia 10 iha Munisípiu Lautem to’o oras ne’e seidauk asesu ba eletrisidade.

Notísia iha Relasaun: Lautem-oan Sira Diskorda ho SEAK Ne’ebé Dehan Uma-Lisan Lejeavál Laiha Valór Kulturál

Monumentu ne’ebé konstrui iha tempu Indonézia nian iha Munisípiu Lautem. Foto/Google

“Kona-bá eletrisidade, Lautém tomak ne’e suku hotu-hotu tama ona, maibé aldeia 10 mak seidauk, ne’e aldeia ida ne’ebé mak dook tebetebes. Mais suku hotu-hotu, ahi tama ona,” Sekretáriu Administrasaun Munisipiu Lautem, Jacinto da Costa informa, ba jornalista sira iha Lospalos Vila, Sábadu (09/04/2022).

Maske Duarte da Costa,  la  fó informasaun detallu kona-ba naran aldeia 10 ne’ebé seidauk asesu eletrisidade ne’e, maibé nia dehan, komunidade sira iha aldeia 10 ne’ebé seidauk asesu  eletrisidade ne’e tanba hela ho distánsia dook hosi kapitál Munisípiu Lautem no razaun seluk maka ema hadau-malu ba projetu.

Advertisement

“Uluk, balu ema hadau-malu projetu, depois la to’o, no kompañia balu ne’ebé mak kaer projetu ida ne’e, karik osan hotu ona, depois sira la konsege kontinua, Governu sira troka malu, entaun la konsege finaliza, no balu iha hela prosesu laran,” Duarte da Costa hateten tán.

Maske nune’e, komunidade sira iha suku 34 seluk,  asesu ona ba naroman eletrisidade. Kona-bá estrada, iha aldeia balu mak kondisaun di’ak hotu, no iha tempu bai-loron, ema bele halo asesu ba mai. Maibé, iha tempu udan, difisil atu ema viajen ho transporte tama ba to’o iha área ne’ebá.

Aldeia Dirimuni, Cacavei no  sub aldeia Larimi, mak to’o oras ne’e, seidauk asesu ba estrada ne’ebé di’ak, tanba aldeia tolu ne’e, hela iha área ne’ebé izoladu tebes. Biar nune’e, iha 2022 nia laran ne’e, Governu liuhosi Ministériu Obras Públikas (MOP), hahú orienta ona ekipa balu, hodi kee estrada bele tama ba to’o iha komunidade sira.

“Aldeia 10 mak la tama, ne’e ida iha Soikili, ida iha Sorumlua no Omokono, besik malu iha sidade laran. Depois Iliomar nian mak iha Iradarati nian, no Aldeia Lacawa, sira ne’e dalan mak difísil atu ema asesu ba iha ne’ebá,” Duarte da Costa hateten tán.

Dadaun ne’e, governu lokál, hahú hela infraestrutura fízika hodi foku ba dezenvolvimentu estrada rural, ligasaun entre Postu Administrativu Iliomar, Luro, inklui fatin seluk tán, ne’ebé ma koras ne’e, iha balu estrada balu, komunidade sira hahú asesu ho di’ak tebtebes.

Advertisement

Munisípiu Lautem, kompostu hosi Postu Administrativu Lautem, Iliomar, Luro, no Lospalos Vila, ho totál populasaun rihun 98-resin.

Jornalista: Rogério Pereira Cárceres