Hatutan.com, (18 Abríl 2022), Díli-Organizasaun la’ós governu nian (ONG-sigla Portugés), Fundasaun Mahein (FM) husu ba Komandu Jerál Polísia Nasionál Timor-Leste (PNTL) atu halo klarifikasaun jurídiku kona-bá ema sivíl armadu (ho arma ka kilat-boot) fó seguransa bá Konselleiru Másimu  partidu KHUNTO, José dos Santos “Naimori Bucar”.

Lee Mós : Ministru Interiór Orienta Komandu PNTL Asegura Naimori ho CSP Na’in-Tolu

Ema sivíl ho kilat ne’ebé fó seguransa ba Konselleiru Másimu Partidu KHUNTO, José dos Santos “Naimori Bucar”. Foto/screenshot husi video ne’ebé viral iha Facebook

Liuhusi video ne’ebé viral iha mídia sosiál  Facebook daudaun ne’e, Naimori nu’udár lideransa másimu organizasaun arte marsiál KORK ne’e tuun husi karreta triton metan ida ho roupa metan hetan eskolta husi ema sivíl ida ho oin taka-metin kaer kilat naruk atu ba atua problema entre membru arte marsiál KORK no abitante balun iha área  Ainaro nian.

Bainhira Naimori ho ema armadu ne’e to’o iha fatin lokal akontesimentu, iha ona membru grupu KORK lubun no prezensa Naimori nian ne’e hanesan esperansa ba sira atu bele atua konfronta ne’ebé mosu.

Jestór Prinsipál Fundasaun Mahein (FM), Abel Amaral afirma, la sala, bainhira Naimori hanesan lider partidu ka hanesan membru Konsellu Estadu ida iha direitu atu hetan eskolta. Maibé, FM sente ladún konkorda, tanba iha video badak ida ne’ebé viral loos hatudu katak, prezensa eskoltu ne’ebé la uza farda instituisaun seguransa nian.

Fundasaun Mahein la konkorda, tanba durante ne’e, ema barak, no liu-liu públiku tomak no FM rasik, kestiona kona-bá kilat sira ne’ebé deskonfia ema utiliza ilegál, satán, ho eskolta ida ne’ebé maka ba fó seguransa ba lider partidu hanesan Naimori, ne’ebé uza farda sivíl, ka baibain ema bolu dehan “preman”.

“Ha’u hanoin, kestaun ida ne’e pertinente tebes. Ida ne’e, Fundasaun Mahein lamenta, ne’ebé husu ba Ministériu Interiór no komandu jerál PNTL atu toma atensaun ba ida-ne’e, no husu atu hato’o ba públiku katak, seguransa ka eskolta ne’ebé maka fornese ba Naimori, ida ne’e, hosi instituisaun Estadu no tenke uza farda instituisaun seguransa,” Abel Amaral hateten ba jornalista sira iha kna’ar fatin, Bairru Grilhos, Díli, Segunda (18/04/2022).

Jestór prinsipál iha FM ne’e afirma tán katak, lider nasionál no lider partidu sira ne’ebé maka Estadu konsidera katak, importante tenke iha eskoltu, konserteza estadu fornese pesoál seguransa ba nia, ne’ebé mak tenke mai hosi instituisaun Estadu hanesan PNTL ka FALITNIL -orsa Defeza Timor-Leste (F-FDTL).

Kona-bá deskonfia iha sirkulasaun kilat ilegál, Abel Amaral hateten, durante ne’e, Fundasaun Mahein hato’o beibeik ona liuhosi relatóriu no mós halo publikasaun  órgaun komunikasaun sosiál  sira. Maibé, ho prezensa hosi eskoltu Naimori nian, FM konsidera hanesan la ordena ho didi’ak tanba  uza fali roupa sivíl ho kilat boot.

“Ida ne’e espekulasaun komunidade, públiku, bele kestiona katak, kilat ne’e mai hosi ne’ebé? Ne’ebé, ha’u hanoin, di’ak liután ne’e, instituisaun estadu hanesan Ministru Interiór, Taur Matan Ruak, vise-ministru interior António Armindo ho komandu PNTL, husu atu halo klarifikasaun loloos kona-bá asuntu ida ne’e,” Abel Amaral hateten.

Ministru Interiór Orienta Komandu PNTL Asegura Naimori ho CSP Na’in-Tolu

Primeiru Ministru (PM) Taur Matan Ruak ne’ebé assume mós kargu hanesan Ministru Interiór (MI), hatún despaxu ba Komandu Polísia Nasionál Timor Leste (PNTL), hodi fó orientasaun atu oferese membru hosi Corpo Segurança Pessoal (CSP) na’in tolu atu asegura Konselleiru Másimu Partidu Kmanek Haburas Unidade Nasionál Timoro Oan (KHUNTO), José dos Santos “Naimori” Bucar.

Komandante unidade CSP, Inspetór Xefe Polísia, Marcos Lopes Soares hateten, desizaun CSP atu halo mós seguransa ka eskolta ba Naimori, tanba hetan despaxu hosi Komandante Jerál PNTL, Komisáriu Faustino da Costa.

“Orientasaun hodi fó seguransa ba Naimori ne’e, tanba hetan mós despaixu hosi Primeiru Ministru (PM), Taur Matan Ruak, haruka ba iha komandante Jerál PNTL, depois ba iha komandante unidade, hafoin halo kolokasaun membru. Ha’u hanesan operasionál, koloka membru bazeia ba orientasaun komandu,”  Inspetór Xefe Polisia, Marcos Lopes Soares hateten, hafoin abertura formasaun ba membru sira iha kuartél Unidade Especial da Policia (UEP), Bairru-Pité, Díli, Tersa (25/01/2022).

Inspetór Xefe Polísia ne’e, esplika, PNTL nu’udár autoridade seguransa Estadu nian, no tuir lei ne’ebé atribui katak, PNTL iha kna’ar atu asegura kualkér sidadaun, bainhira iha despaxu ruma hosi komandu.

“Situasaun agora ladún ameasa, entaun koloka na’in-tolu iha ne’e. Ita nia lei asegura kualkér sidadaun, sé mak iha ameasa, halo karta ba entidade, hetan aprovasaun, despaxu mai, ha’u koloka,” Inspetór Xefe Polisia ne’e, subliña.

Jornalista: Rogério Cárceres