Hatutan.com, (18 Abríl 2022), Díli–Situasaun kazu dengue iha Timor-Leste to’o Segunda (18/04/2022), rejista  4255 kazu no kumulativu óbitu (mate) na’in-50.

Dengue. Foto/Google

Komunikadu imprensa ne’ebé Hatutan.com asesu husi Ministériu Saúde, Diresaun Nasionál Saúde Publika, Departamentu Vijilánsia Epidemiolojia, ba loron ohin nian katak, maioria kazu dengue deteta husi Munisípiu  Díli ho totál 2880, Baucau ho kazu 251, Manatuto ho kazu 172, Manufahi (168), Lautem (153), Covalima (141), Ermera (118), Liquiça (113), Aileu (87), Viqueque (69), Bobonaro (53), Ainaro (45), no RAEOA ho kazu lima (5).

Situasaun kazu dengue iha Díli to’o ohin loron relata ona kazu  2880 no óbitu na’in-27. Tuir kalendáriu epidemiolojia 2022, iha primeira semana Munisípiu Díli relata ona 38 kazu, iha segunda semana relata 158 kazu, iha terseira semana relata ona 123 kazu, iha kuarta semana relata kazu ho total 243, iha kinta semana relata kazu ho total 281, iha sesta semana relata kazu ho total 257, iha sétima semana relata kazu 202, iha oitavu semana relata kazu ho total 115, iha nono semana relata kazu ho total 218, iha désimu  semana relata kazu ho total 200, iha désimu primeiru relata kazu ho total 223 kazu, iha désimu segundu semana relata kazu ho total 183, iha désimu terseiru semana relata kazu ho total 195 kazu, iha désimu kuartu semana relata kazu ho total 162, iha désimu kintu semana kazu ho total 157, iha désimu sestu semana relata kazu ho total 119 no iha désimu sétimu semana relata kazu ho total neen (6).

MS Apela

Ministériu Saúde (MS) apela ba populasaun iha Díli laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu husi profisionál saúde sira.

Apela mós ba populasaun iha Díli laran no mós iha munisípiu sira seluk atu;  halo limpeza jerál iha suku no bairru laran, tanke fase bidón ka balde tau bee semana ida dala-ida, hamoos sasán ka limpeza hanesan roda at, vazu ai-funan atu susuk labele tau tolun, haloot roupa ho di’ak iha uma-laran, uza roupa ne’ebé liman-naruk karik toba iha tempu loron, uza ai-moruk hanesan repelente ka autan, uza moskiteiru karik toba iha tempu loron, no soe lixu iha nia fatin.

Jornalista: Elio dos Santos da Costa