Hatutan.com, (01 Maiu 2024), Natarbora– Padre Pároku Parókia Maria Imaculada Conceição, Natarbora,  Pe. Eusebios Puru Duli, hateten traballadór sira tenke halo servisu ho responsabilidade no domin hodi serbí ema seluk.

Lee Mós: Hasa’e Saláriu Mínimu bá $150.00

Misa agradesimentu bá Padrueiru São José Operáriu Abat-Oan, Natarbora, Kuarta (01/05/2024). Foto/Vito Salvadór

Mensajen ne’e Padre Pároku Parókia Maria Imaculada Conceição Natarbora, Pe. Eusebios Puru Duli hato’o bá sarani sira iha Estasaun Misionáriu São José Operáriu Abat-Oan ne’ebé selebra aniversáriu estasaun nian hodi hanoin mós selebrasaun loron mundiál traballadór  sira-nian ne’ebé komemora kada tinan iha loron 01 fulan-Maiu.

Pe. Eusebios Puru Duli hateten hanesan sarani no ema fiar na’in mai hotu-hotu haree bá realidade moris ema ida-idak nian.

Hanesan sarani sakrifísiu saida mak ema ida-idak halo iha nia servisu sira hodi hatán ba knaar Santa ne’ebé Maromak fó bá ema tuir kbiit ida-idak nian.

Nia afirma ho selebrasaun loron Padrueiru São José Operáriu nian, ohin, ema hotu selebra mós loron Mundiál Traballadór, iha loron ne’e ema ida-idak tenke sente iha nia moris oinsá nia servisu sira hetan folin di’ak no lae, la’ós to’o iha ne’e de’it, maibé tenke reflete katak nia halo servisu hotu ho responsabilidade no domin ka lae.

“Selebrasaun loron mundiál traballadór la’ós ho de’it demonstrasaun atu ezije direitu sira maibé buka halo reflesaun saida mak ha’u tenke halo atu mellora servisu sira hodi tulun sosiedade. Fó valór bá servisu ne’ebé iha nu’udár karan domin Maromak nian,” Pe. Eusebios Puru Duli iha nia omilia iha selebrasaun misa agradesimentu bá Padrueiru São José Operáriu Abat-Oan, Natarbora, Kuarta (01/05/2024).

Saserdote ne’e hatutan hakaribit hahalok aat sira iha knaar loron-loron, atu hetan bensaun bá servisu sira. Haree ema servisu di’ak presiza louva, fó apresiasaun hanesan motivassun atu harii sosiedade ida nakonu ho domin no dame.

Padre Pároku Parókia Maria Imaculada Conceição Natarbora, Pe. Eusebios Puru Duli. Foto/Vito Salvadór

Bá funsionáriu públiku sira hotu, mestre sira tenke hadomi profisaun,  labele abandona servisu, halo knaar ho responsabilidade ne’e mak hatudu ema sarani fiar na’in nia neon loos bá knaar be nia simu.

“Serbí ho domin atu hamosu domin hodi fahe domin bá ema seluk,” Nia subliña. Sarani suku Abat-Oan ne’ebé hili São José Operáriu bá Padrueiru iha Estasaun misionáriu ne’e, tenke banati tuir São José Operáriu nia karakter, katak Servisu iha nonok nia laran no nunka rejeita Maromak Nia planu sira katak la protesta ho responsabilidade ne’ebé iha.

Bá Timoroan sira tenke servisu ho kolen rasik, responsabilidade atu tulun ema seluk, servisu ho domin no fiar.

Iha selebrasaun loron Padrueiru Estasaun misionáriu São José Operáriu ne’e, Padre Pároku Parókia Maria Imaculada Conceição Natarbora Pe. Eusebios Puru Duli, fó mós sakramentu Baptismu bá labarik hamutuk 46, Sakramentu Matrimóniu bá kabe-na’in par 5 no primeira komuñaun bá joven sira hamutuk 59.

Jornalista: Vito Salvadór