Hatutan.com, (04 Dezembru 2023), Ermera— Governu liu hosi Ministériu Saúde (MS) esforsu hela atu halo de’it kontrolu bá autór sira ne’ebé involve iha Servisu Sex Komersiál iha Timor-Leste (TL).

Vise-Ministru bá Operasionalizasaun Ospitais nian, Flávio Brandão Mendes de Araújo.

Kestaun ne’e hato’o hosi Vise-Ministru bá Operasionalizasaun Ospitais nian, Flávio Brandão Mendes de Araújo hodi hatán bá Hatutan.com kona-bá esforsu ne’ebé halo hosi Institutu Nasionál bá Kombate HIV/SIDA, Institutu Públika (INCSIDA I.P-sigla Portugés), atu legaliza no lokaliza Servisu Sex Komersiál iha Timor-Leste.

Lee Mós: Servisu Sex Komersiál Eziste, INKSIDA Esforsu Legaliza no Lokaliza

“Diskusaun sira la’o hela. Ita lakohi halo espekulasaun bá buat ne’e, maibé iha pontu de vista saúde nian maka ne’e, buat hotu tenke kontrola. Ida ne’e mak importante,” Flávio Brandão hateten hafoin halo lansamentu fundu bá “reforsa sistema saúde komunitária hodi promove hahalok saudável liuhosi mudansa hahalok sosiál iha komunidade”, iha Suku Katrai Kraik, Postu Administrativu Letefoho, Munisipiu Ermera, Kinta (30/11/2023).

Governante ne’e dehan, atu lokaliza ka la lokaliza, ne’e asuntu ne’ebé tékniku liu, maibé importante liu maka sidadaun sira ne’ebé hala’o servisu prostituisaun, tenke hetan kontrolu, nune’e bele hetan tratamentu bá sira nian saúde.

Vise-Ministru ne’e reforsa katak, buat importante liu maka pessoál sira ne’e hetan kontrolu regulár hosi pessoál saúde sira nune’e ema hotu-hotu hetan oportunidade hanesan atu hetan tratamentu no atu halo prevensaun bá moras sira.

Jornalista: Rogério Pereira Cárceres